ଭୁବନେଶ୍ୱର,୧୪/୦୪: ରାଜ୍ୟରେ ଆନେମିଆ (ରକ୍ତ ହୀନତା) ସ୍ଥିତି ଉଦ୍ବେଗଜନକ । ଗତବର୍ଷ ଏପ୍ରିଲ ମାସରୁ ସେପ୍ଟେମ୍ବର ପର୍ଯ୍ୟନ୍ତ ରାଜ୍ୟରେ ମୋଟ ୬୭ ଲକ୍ଷ ୪୯ ହଜାର ୫୬୨ ଜଣଙ୍କ ପରୀକ୍ଷା କରାଯାଇଥିବା ବେଳେ ସେମାନଙ୍କ ମଧ୍ୟରୁ ୩୨ ଲକ୍ଷ ୨୨ ହଜାର ୫୮୦ ଜଣ ଆନେମିଆରେ ପୀଡ଼ିତ । ୨୩ ଲକ୍ଷ ୮୨ ହଜାର ୮୧୩ ଜଣ ନିମ୍ନ, ୮୧ ହଜାର ୩୨୧୬ ମଧ୍ୟମ ଓ ୨୬ ହଜାର ୫୫୧ ଜଣ ଗୁରୁତର ଆନେମିଆରେ ପୀଡ଼ିତ । ସର୍ବାଧିକ ୭ ଲକ୍ଷ ୮୧ ହଜାର ୮୬୯ ଶିଶୁ (୬ରୁ ୫୯ ମାସ) ଆନେମିଆରେ ଆକ୍ରାନ୍ତ ଥିବା ପରୀକ୍ଷାରୁ ଜଣାପଡ଼ିଛି ।
ରାଜ୍ୟ ସରକାରଙ୍କ ସ୍ୱାସ୍ଥ୍ୟ ରିପୋର୍ଟରୁ ଏଭଳି ତଥ୍ୟ ହସ୍ତଗତ ହୋଇଛି । ତଥ୍ୟ କହୁଛି, ୪ଲକ୍ଷ ୫୦ହଜାର ୩୭୯ କିଶୋର/କିଶୋରୀ(୫- ୯ବର୍ଷ), ୪ଲକ୍ଷ ୨୨ହଜାର ୪୭୦ ସ୍କୁଲ ଛାତ୍ରଛାତ୍ରୀ (୧୦- ୧୯ବର୍ଷ), ୨ଲକ୍ଷ ୨୦ହଜାର ୮୮୨ ଝିଅ(୧୦ରୁ ୧୯ବର୍ଷ), ୩ଲକ୍ଷ ୧୧ହଜାର ୪୫୧ ଯୁବତୀ, ୫ଲକ୍ଷ ୯୫ ହଜାର ୯୫୩ ଗର୍ଭବତୀ, ୪ ଲକ୍ଷ ୩୯ ହଜାର ୫୭୬ ପ୍ରସୂତିଙ୍କ ଶରୀରରେ ଆନେମିଆ ରହିଛି। ରାଜ୍ୟରେ ଏହି ଆନେମିଆର ହାର ୪୭.୭ ପ୍ରତିଶତ । ଆନେମିଆ ଦୂର କରିବା ପାଇଁ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଆନେମିଆ ମୁକ୍ତ ଲକ୍ଷ୍ୟ ଅଭିଯାନ (ଅମ୍ଳାନ) ଆରମ୍ଭ ହୋଇଛି ।
ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ଯେ, ଆନେମିଆ ଚିହ୍ନଟ ପାଇଁ ବିଭିନ୍ନ କାର୍ଯ୍ୟକ୍ରମ ଚାଲିଛି । ସମସ୍ତ ସରକାରୀ ଓ ସରକାରୀ ଅନୁଦାନପ୍ରାପ୍ତ ବିଦ୍ୟାଳୟରେ ପଢ଼ୁଥିବା ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ଆନେମିଆ ପରୀକ୍ଷା କରାଯାଇ ଡାକ୍ତରୀ ପରାମର୍ଶ ଦିଆଯାଉଛି ।
