ଛତ୍ରପୁର,୨୭/୮: ମହା ଆଡ଼ମ୍ବରରେ ଚାଲିଛି ଅଗ୍ରପୂଜ୍ୟ ଗଣେଶଙ୍କ ପୂଜା । ସ୍କୁଲ ଠାରୁ କଲେଜ ପର୍ଯ୍ୟନ୍ତ ସବୁଠି ପୂଜା ପାଉଛନ୍ତି ବିଘ୍ନ ବିନାଶକ । ହେଲେ ଗଞ୍ଜାମ ଜିଲ୍ଲାର ଛତ୍ରପୁର ବ୍ଲକ୍ ଅନ୍ତର୍ଗତ ନୋଳିଆନୂଆ ଗାଁ ସରକାରୀ ଉନ୍ନୀତ ଉଚ୍ଚ ପ୍ରାଥମିକ ବିଦ୍ୟାଳୟରେ ଗଣେଶ ପୂଜା ହୋଇପାରିଲା ନାହିଁ । ଶିକ୍ଷକ ଓ ସ୍କୁଲ ପରିଚାଳନା କମିଟି ମଧ୍ୟରେ ତିକ୍ତତା ଯୋଗୁ ସ୍କୁଲ୍ ଫାଟକରେ ତାଲା ପକାଇଲା ସ୍କୁଲ୍ କମିଟି । ଯାହା ଫଳରେ ପ୍ରଭୁ ଗଣେଶଙ୍କ ପୂଜାଅର୍ଚ୍ଚନା ହୋଇପାରିନାହିଁ । ଏଣୁ ଛାତ୍ରଛାତ୍ରୀମାନେ ପୂଜା ଥାଳି ଧରି ନିରାଶରେ ଘରକୁ ଫେରିଛନ୍ତି ।
ଅନ୍ୟ ପକ୍ଷରେ ସ୍କୁଲ୍ ଫାଟକରେ ତାଲା ପଡ଼ିଥିବା ଦେଖି ସ୍କୁଲକୁ ଆସିଥିବା ଶିକ୍ଷକ ଓ ଶିକ୍ଷୟିତ୍ରୀମାନେ ବାହାରେ ଠିଆ ହୋଇଥିଲେ । ସେଥି ମଧ୍ୟରୁ ଜଣେ ଶିକ୍ଷୟିତ୍ରୀ ମୂର୍ଚ୍ଛା ହୋଇଯାଇଥିଲେ । ତାଙ୍କୁ ସଙ୍ଗେ ସଙ୍ଗେ ସ୍କୁଲ କମିଟି ଓ ଶିକ୍ଷକମାନେ ମିଶି ଛତ୍ରପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ପରେ ସେଠାରୁ ତାଙ୍କୁ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଛି । ଗଣେଶ ପୂଜା ପାଇଁ ପ୍ରସ୍ତୁତି ନେଇ ଆଲୋଚନା ପାଇଁ ସ୍କୁଲ ପରିଚାଳନା କମିଟି, ପ୍ରଧାନ ଶିକ୍ଷକ ଏବଂ ଶିକ୍ଷୟିତ୍ରୀଙ୍କୁ ଡାକିଥିଲେ । କିନ୍ତୁ ସେମାନେ ନଯିବାରୁ କମିଟି ଗଣେଶ ଚତୁର୍ଥୀରେ ବିଦ୍ୟାଳୟରେ ତାଲା ପକାଇଛି ।
