ଅହମଦନଗର ୩୦/୧: ସାମାଜିକକର୍ମୀ ଆନ୍ନା ହଜାରେ ବୁଧବାର ଲୋକପାଳ ଓ ଲୋକାୟୁକ୍ତ ଦାବି ନେଇ ରାଲେଗଣ-ସିଦ୍ଧି ଗାଁରେ ଅନଶନ ଆରମ୍ଭ କରିଦେଇଛନ୍ତି । ତାଙ୍କର ଜଣେ ସହଯୋଗୀ ସୂଚନା ଦେଇଛନ୍ତି ଯେ ୮୧ ବର୍ଷୀୟ ଆନ୍ନା ତ୍ରିରଙ୍ଗା ନେଇ ଅନେକ ସମର୍ଥକଙ୍କ ସହିତ ଗାଁ ଅଭିମୁଖେ ବାହାରିଲେ । ସେଠାରେ ତ୍ରିରଙ୍ଗା ଉଡାଇ ଅନିଶ୍ଚିତକାଳ ପର୍ଯ୍ୟନ୍ତ ଉପବାସ ଆରମ୍ଭ କଲେ ।

ଆନ୍ନା ଆନ୍ଦୋଳନ ଆରମ୍ଭ କରିବା ପୂର୍ବରୁ ଶହୀଦ ଦିବସ ଅବସରରେ ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳୀ ଅର୍ପଣ କଲେ । ୩ ଦିନ ପୂର୍ବରୁ ଆନ୍ନା ରାଜ୍ୟରେ ଲୋକାୟୁକ୍ତ ଲାଗୁ କରିବା ପାଇଁ ଦାବି କରି ମହାରାଷ୍ଟ୍ର ସରକାରଙ୍କୁ ଏକ ଅଲ୍ଟିମେଟମ ଦେଇଥିଲେ ଏବଂ ଏପରି ନକଲେ ଅନଶନ ଆରମ୍ଭ କରିବାର ଚେତାବନୀ ଦେଇଥିଲେ ।

ଏହା ପୂର୍ବରୁ ସେ ଲୋକପାଳ ପ୍ରାଧିକରଣ ଲାଗୁ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ପତ୍ର ଲେଖିଥିଲେ । କିନ୍ତୁ ସେ କହିଛନ୍ତି ଯେ ତାଙ୍କ କଥାକୁ କିଛି ଗୁରୁତ୍ୱ ଦିଆଗଲାନି ।

ତେବେ ମହାରାଷ୍ଟ୍ର ସରକାର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଲୋକାୟୁକ୍ତଙ୍କ କ୍ଷମତା ଅନ୍ତୁର୍ଭୁକ୍ତ କରିବାର ପ୍ରକ୍ରିୟା ଆରମ୍ଭ କରିସାରିଛନ୍ତି କିନ୍ତୁ ଆନ୍ନା କହିଛନ୍ତି ଯେଉଁ ପର୍ଯ୍ୟନ୍ତ ଏହା ବାସ୍ତବରେ ସମ୍ପୂର୍ଣ୍ଣ ନହୋଇଛି ସେ ପର୍ଯ୍ୟନ୍ତ ସେ ଅନଶନ କରିବେ ।