ଜିମ୍ବାୱେ ସବୁଠୁ ଦୟନୀୟ ଦେଶ, ସ୍ୱିଜରଲାଣ୍ଡ ସବୁଠୁ ଖୁସି: ୧୦୩ ନମ୍ବରରେ ଭାରତ
ନୂଆଦିଲ୍ଲୀ,୨୫/୦୫: ବିଶିଷ୍ଟ ଅର୍ଥନୀତିଜ୍ଞ ଷ୍ଟିଭ୍ ହାଙ୍କେଙ୍କ ଆନୁଆଲ ମିଜରି ଇଣ୍ଡେକ୍ସ (ଏଚଏଏମ୍ଆଇ) ବା ବାର୍ଷିକ ଦୁର୍ଦ୍ଦଶା ସୂଚକାଙ୍କ ଅନୁସାରେ ଜିମ୍ବାୱେ ବିଶ୍ୱର ସବୁଠୁ ଦୟନୀୟ ଦେଶ । ମୋଟ ୧୫୭ ଦେଶକୁ ନେଇ ଏହି ସୂଚକାଙ୍କ ପ୍ରସ୍ତୁତ କରାଯାଇଥିବାବେଳେ ଜିମ୍ବାୱେ ୧ ନମ୍ବରରେ ରହିଛି । ଦେଶଗୁଡ଼ିକର ଆର୍ଥିକ ସ୍ଥିତି ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଛି ।
ଏହା ମୁତାବକ, ଆଫ୍ରିକୀୟ ଦେଶ ଜିମ୍ବାୱେ ଅତ୍ୟନ୍ତ ଗମ୍ଭୀର ସ୍ଥିତି ଦେଇ ଗତି କରୁଛି । ଯୁଦ୍ଧଗ୍ରସ୍ତ ୟୁକ୍ରେନ୍, ସିରିୟା, ସୁଦାନ ଭଳି ଦେଶଠାରୁ ଜିମ୍ବାୱେରେ ଲୋକେ ସବୁଠୁ ଦୟନୀୟ ଭାବେ ବଞ୍ଚିଛନ୍ତି । ଏଠାରେ ମୁଦ୍ରାସ୍ଫୀତି ଗତବର୍ଷ ୨୪୩.୮%କୁ ବଢ଼ିଥିଲା । ମୁଦ୍ରାସ୍ଫୀତି, ବେରୋଜଗାରୀ, ଅତ୍ୟଧିକ ଋଣ, ଜିଡିପି ହ୍ରାସ ଆଦି କାରଣ ପାଇଁ ଜିମ୍ବାୱେର ଏପରି ଅବସ୍ଥା ବୋଲି ଷ୍ଟିଭ୍ ହାଙ୍କେ ଟୁଇଟ୍ କରିଛନ୍ତି । ସୂଚକାଙ୍କର ଶୀର୍ଷ ୧୫ ଭିତରେ ଭେନେଜୁଏଲା, ସିରିୟା, ଲେବାନନ୍, ଆର୍ଜେଣ୍ଟିନା, ୟେମେନ, ୟୁକ୍ରେନ୍, କ୍ୟୁବା, ତୁର୍କୀ, ଶ୍ରୀଲଙ୍କା, ହାଇତି, ଆଙ୍ଗୋଲା, ଟୋଙ୍ଗା ଏବଂ ଘାନା ରହିଛନ୍ତି ।
ଭାରତର ସ୍ଥାନ ୧୦୩ ରହିଛି । ଭାରତ ଏହି ସ୍ଥାନରେ ରହିବା ପାଛର ବଡ଼ କାରଣ ହେଉଛି ଦେଶରେ ବଢ଼ୁଥିବା ବେରୋଜଗାରୀ । ଆମେରିକା ୧୩୪ତମ ସ୍ଥାନରେ ରହିଛି । ସେହିପରି ସବୁଠୁ ଖୁସି ଦେଶ ସୁଇଜରଲ୍ୟାଣ୍ଡ ବୋଲି ରିପୋର୍ଟରେ କୁହାଯାଇଛି । ସୁଇଜରଲ୍ୟାଣ୍ଡ ପରେ କୁଏତ, ଆୟର୍ଲାଣ୍ଡ୍, ମାଲେସିଆ, ତାଇୱାନ, ନାଇଜର, ଥାଇଲାଣ୍ଡ, ଟୋଗୋ ଏବଂ ମାଲ୍ଟା ରହିଛି
