ଟୋକିଓ: ବ୍ରିଟିଶ ରୟାଲ ଏୟାର ଫୋର୍ସର ଏକ ଏଫ୍-୩୫ ଯୁଦ୍ଧବିମାନ ଜାପାନରେ ଜରୁରୀ ଅବତରଣ କରିଛି। ଯାହା ଚୀନର ରାଷ୍ଟ୍ରୀୟ ଗଣମାଧ୍ୟମ ଗ୍ଲୋବାଲ ଟାଇମ୍ସରେ ବ୍ରିଟେନର ସାମରିକ ସାମର୍ଥ୍ୟ ଉପରେ ଉପହାସର କାରଣ ହୋଇଛି। ଏହି ଘଟଣା ରବିବାର ଜାପାନ, ଯୁକ୍ତରାଷ୍ଟ୍ର ଏବଂ ବ୍ରିଟେନ ମଧ୍ୟରେ ଚାଲିଥିବା ଏକ ଯୌଥ ସାମରିକ ଅଭ୍ୟାସ ସମୟରେ ଘଟିଛି। ଯେଉଁଠାରେ ବିମାନଟି ଟେକ୍ନିକାଲ ତ୍ରୁଟି ହେତୁ ଜାପାନର କାଗୋଶିମା ବିମାନବନ୍ଦରରେ ସକାଳ ପ୍ରାୟ ୧୧:୩୦ରେ ନିରାପଦ ଅବତରଣ କରିଥିଲା। ବିମାନ ଚଳାଉଥିବା ପାଇଲଟ ସୁରକ୍ଷିତ ଥିବା ନେଇ ସୂଚନା ମିଳିବା ସହ ବିମାନର କୌଣସି କ୍ଷତି ହୋଇନଥିବା ଜଣାପଡିଛି।
ସବୁଠୁ ଆଶ୍ଚର୍ଯ୍ୟର କଥା ହେଉଛି ଏହା ଗତ ଦୁଇ ମାସ ମଧ୍ୟରେ ଏସିଆରେ ବ୍ରିଟିଶ ଏଫ୍-୩୫ ବିମାନର ଦ୍ୱିତୀୟ ଜରୁରୀ ଅବତରଣ। ଖବର ମୁତାବକ, ଜୁନ୍ ମାସରେ ଏକ ଅନ୍ୟ ଏଫ୍-୩୫ ବିମାନ ହାଇଡ୍ରୋଲିକ ତ୍ରୁଟି ହେତୁ ଭାରତର ତିରୁଅନନ୍ତପୁରମ ଅନ୍ତର୍ଜାତୀୟ ବିମାନବନ୍ଦରରେ ଜରୁରି ଅବତରଣ କରିଥିଲା। ବୌଷୟିକ ତ୍ରୁଟି ଯୋଗୁଁ ପ୍ରାୟ ଏକ ମାସ ଧରି ସେଠାରେ ଅଟକି ରହିଥିଲା।
ଚାଇନାର ସରକାରୀ ଗଣମାଧ୍ୟମ ଗ୍ଲୋବାଲ ଟାଇମ୍ସ ଏହି ଘଟଣାକୁ ନେଇ ବ୍ରିଟିଶ ନୌସେନାର ଏଫ୍-୩୫ ପରିଚାଳନା କ୍ଷମତା ଉପରେ ପ୍ରଶ୍ନ ଉଠାଇଛି। ଏହାର ସମ୍ପାଦକ ଓ୍ଵାଙ୍ଗ ଯା’ନାନ କହିଛନ୍ତି, “ବ୍ରିଟେନର ନୌସେନା ପୂର୍ବ ଭଳି ନାହିଁ।” ସେ ଆହୁରି ମତ ଦେଇଛନ୍ତି ଯେ ବ୍ରିଟେନ ଏଫ୍-୩୫ ର ଜଟିଳ ପ୍ରଯୁକ୍ତିବିଦ୍ୟା ଏବଂ ରକ୍ଷଣାବେକ୍ଷଣ ଆବଶ୍ୟକତା ସହିତ ଦୂରବର୍ତ୍ତୀ ଅଞ୍ଚଳରେ ସଂଘର୍ଷ କରୁଛି। ସେ ବ୍ରିଟେନକୁ ଯୁକ୍ତରାଷ୍ଟ୍ରର ସ୍ୱାର୍ଥକୁ ସମର୍ଥନ କରିବାରେ ନୀତି ପୁନର୍ବିଚାର କରିବାକୁ ପରାମର୍ଶ ଦେଇଛନ୍ତି।
ପ୍ରତିରକ୍ଷା ବିଶେଷଜ୍ଞମାନେ କହିଛନ୍ତି ଯେ ଜାପାନରେ ହୋଇଥିବା ଅବତରଣ ଏକ ମାନକ ସତର୍କତାମୂଳକ ପଦକ୍ଷେପ ଥିଲା ଏବଂ ଏଥିରେ କୌଣସି ବଡ଼ ଧରଣର ଯାନ୍ତ୍ରୀକ ତ୍ରୁଟି ପରିଲକ୍ଷିତ ହୋଇନଥିଲା। ତେବେ ଏହାକୁ ନେଇ ଏବେ ଅନେକ ଦେଶ ନିଜର ମତ୍ତ ବଦଳାଇବାକୁ ଲାଗିଛନ୍ତି।
ଏହି ଘଟଣା ବ୍ରିଟେନର ଏଚଏମଏସ ପ୍ରିନ୍ସ ଅଫ ୱେଲ୍ସ ବିମାନବାହୀ ଜାହାଜରୁ ଅପରେଟ କରୁଥିବା ଏଫ୍-୩୫ବି ବିମାନର ସମ୍ପୃକ୍ତିରେ ଘଟିଛି। ଯାହା ଏକ ଅତ୍ୟାଧୁନିକ ଷ୍ଟେଲଥ ଯୁଦ୍ଧବିମାନ ହୋଇଥିବା ବେଳେ ଏହା ଆମେରିକୀୟ ଯୁଦ୍ଧାସ୍ତ୍ର ନିର୍ମାଣକାରୀ କମ୍ପାନୀ ଲକହିଡ ମାର୍ଟିନ ଦ୍ୱାରା ନିର୍ମାଣ କରାଯାଇଛି। ଏହା ପୂର୍ବରୁ ଭାରତରେ ଅବତରଣ କରିଥିବା ବିମାନଟି ହାଇଡ୍ରୋଲିକ ତ୍ରୁଟି ହେତୁ ୩୭ ଦିନ ଧରି କେରଳରେ ଅଟକି ରହିଥିଲା। ଏବଂ ଶେଷରେ ଗତ ଜୁଲାଇ ୨୨ ତାରିଖରେ ସଫଳତାର ସହିତ ଅଷ୍ଟ୍ରେଲିଆର ଡାରୱିନ ବିମାନବନ୍ଦର ଅଭିମୁଖେ ଉଡ଼ାଣ ଭରିଥିଲା।
ଏହି ଘଟଣା ଏଫ୍-୩୫ ବିମାନର ଜଟିଳ ପ୍ରଯୁକ୍ତିବିଦ୍ୟା ଏବଂ ଦୂରବର୍ତ୍ତୀ ଅଞ୍ଚଳରେ ଏହାର ରକ୍ଷଣାବେକ୍ଷଣ ସମ୍ବନ୍ଧୀୟ ଚ୍ୟାଲେଞ୍ଜ ଉପରେ ଆଲୋକପାତ କରିଛି। ଏହାସହ ଅନେକ ଦେଶ ଏହି ପଞ୍ଚମ ପିଢିର ଆମେରିକୀୟ ଯୁଦ୍ଧ ବିମାନକୁ କ୍ରୟ କରିବାରୁ ଏଡାଇବାକୁ ଚାହୁଁଥିବା ଜଣାପଡିଛି। ଖାଲି ଏତିକି ନୁହେଁ ନିଜେ ବ୍ରିଟେନ ବାକି ଥିବା ଆଉ ସମସ୍ତ ଏଫ୍-୩୫ ବିମାନର କ୍ରୟ ଉପରେ ମଧ୍ୟ ରହିତାଦେଶ ଜାରି କରିଛି।
