ନୂଆଦିଲ୍ଲୀ: ଆମେରିକାରେ ପୁଣି ବିମାନ ଦୁର୍ଘଟଣା । ଉତ୍ତର କାରୋଲିନାର ଓକ୍ ଦ୍ୱୀପ ନିକଟରେ ସମୁଦ୍ରରେ ଏହି ଦୁର୍ଘଟଣା ଘଟିଥିଲା ବୋଲି ଜଣାପଡ଼ିଛି । ଲୋକମାନେ ଦ୍ୱୀପର କୂଳରେ ଚାଲି ଚାଲି ଯାଉଥିବା ସମୟରେ ଏକ ବିମାନ ସମୁଦ୍ରରେ ଖସିପଡ଼ିଥିଲା । ଦୁର୍ଘଟଣାର ସମ୍ମୁଖୀନ ହୋଇଥିବା ବିମାନଟି ଏକ ଛୋଟ ସିଙ୍ଗଲ-ଇଞ୍ଜିନ୍ ବିମାନ ଥିଲା । ଅଗଷ୍ଟ ୨, ଶନିବାର ଏହି ବିମାନ ଦୁର୍ଘଟଣା ଘଟିଥିବା ଜଣାପଡ଼ିଛି ।  ବିମାନଟି ସମୁଦ୍ରରେ ଦୁର୍ଘଟଣାଗ୍ରସ୍ତ ହେବା ପରେ, ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା ଫଳରେ ପାଇଲଟଙ୍କ ଜୀବନ ବଞ୍ଚିଯାଇଛି । ପାଇଲଟଙ୍କୁ ସାମାନ୍ୟ ଆଘାତ ଲାଗିଥିଲା ଏବଂ ତାଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଯାଇଛି ।

ସମୁଦ୍ରରେ ଖସିପଡ଼ିଥିବା ବିମାନକୁ ପାଣିରୁ ବାହାର କରିବା ପାଇଁ ଅନ୍ୟ ଜାହାଜର ସାହାଯ୍ୟ ନିଆଯାଇଛି । ଅଧିକାରୀଙ୍କ ଅନୁଯାୟୀ, ବିମାନରେ କେବଳ ପାଇଲଟ ଥିଲେ । ଫେଡେରାଲ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଘଟଣାର କାରଣ ଖୋଜିବା ପାଇଁ ତଦନ୍ତ କରୁଛି । ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ, ବିମାନଟି ପାଣିରେ ଅବତରଣ କରିବା ପରି ତଳକୁ ଖସି ପଡ଼ିଥିଲା । ଏହି ଦୁର୍ଘଟଣା ପରେ ସମୁଦ୍ର କୂଳରେ ଥିବା ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । କାହିଁକି ବିମାନକୁ ପାଣିରେ ଅବତରଣ କରିବାକୁ ପାଇଲଟ୍‌ ଚେଷ୍ଟା କରିଥିଲେ ତାହା ଜଣାପଡ଼ି ନାହିଁ । 

ପ୍ରାରମ୍ଭିକ ତଦନ୍ତ ପରେ ହିଁ ଘଟଣା ସମ୍ପର୍କରେ ଅଧିକ ସୂଚନା ମିଳିବ ବୋଲି ଆଶା କରାଯାଉଛି। ସୂଚନାଯୋଗ୍ୟ, ବିଶ୍ବରେ ବିମାନ ଦୁର୍ଘଟଣା ସଂଖ୍ୟା ବୃଦ୍ଧି ପାଇଛି । ଭାରତର ଅହମ୍ମଦାବାଦରେ ୧୨ ଜୁନ ୨୦୨୫ରେ ଭୟଙ୍କର ବିମାନ ଦୁର୍ଘଟଣା ସମଗ୍ର ବିଶ୍ବକୁ ଦୋହଲାଇ ଦେଇଥିଲା । ଏହି ବିମାନ ଦୁର୍ଘଟଣାରେ ୨୬୦ ଲୋକଙ୍କ ଜୀବନ ଯାଇଥିଲା । ସେପଟେ ଏହି ବର୍ଷ ଜାନୁଆରୀରେ ଆମେରିକାର ସେନାର ଏକ ବ୍ଲାକ୍ ହକ୍ ହେଲିକପ୍ଟର ଏବଂ ଆମେରିକୀୟ ଏୟାରଲାଇନ୍ସର ଏକ ଆଞ୍ଚଳିକ ଯାତ୍ରୀବାହୀ ଜେଟ୍ ରେଗାନ୍ ୱାଶିଂଟନ୍ ଜାତୀୟ ବିମାନବନ୍ଦର ନିକଟରେ ଆକାଶରେ ଧକ୍କା ହୋଇଥିଲା । 

ଜାନୁଆରୀ ୨୯ ତାରିଖରେ ଏହି ଦୁର୍ଘଟଣାରେ ୬୭ ଜଣଙ୍କର ମୃତ୍ୟୁ ହୋଇଥିଲା। ଏଥିରେ ହେଲିକପ୍ଟରର ତିନି ଜଣ କ୍ରୁ ସଦସ୍ୟ ମଧ୍ୟ ଥିଲେ। ଜାନୁଆରୀ ୩୦ ତାରିଖରେ ଆମେରିକାରେ ଆଉ ଏକ ଦୁର୍ଘଟଣା ଘଟିଥିଲା । ଯେଉଁଥିରେ ଫିଲାଡେଲଫିଆରେ ଏକ ଏୟାର ଆମ୍ବୁଲାନ୍ସ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ୮ ଜଣଙ୍କର ମୃତ୍ୟୁ ହୋଇଥିଲା। ଏପ୍ରିଲ ୧୦ ତାରିଖରେ ଆମେରିକାର ନ୍ୟୁ ଜର୍ସି ସହରରେ ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା। ହେଲିକପ୍ଟରଟି ହଡସନ୍ ନଦୀରେ ଖସି ପଡ଼ିଥିଲା। ଏହି ଦୁର୍ଘଟଣାରେ ୫ ଜଣଙ୍କର ମୃତ୍ୟୁ ହୋଇଥିଲା। ମେ ୨୨ରେ ଆମେରିକାର ସାନ ଡିଏଗୋରେ ଏକ ସେନା ବିମାନ ଦୁର୍ଘଟଣାଗ୍ରସ୍ତ ହୋଇଥିଲା । ଏହି ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ହୋଇଥିଲା।