ବଲିଉଡରେ ଅମିତାଭଙ୍କ ୫୦ ବର୍ଷ ପୂରଣ, ଅଭିଷେକ ଲେଖିଲେ ଭାବପୂର୍ଣ୍ଣ ଚିଠି
ମୁମ୍ବାଇ,୧୫।୨: ବଲିଉଡର ମହାନାୟକ ବିଗ୍ ବି ଅମିତାଭ ବଚ୍ଚନ ଆଜି ଇଣ୍ଡଷ୍ଟ୍ରୀରେ ପୂରଣ କରିଛନ୍ତି ୫୦ ବର୍ଷ। ‘ସାତ ହିନ୍ଦୁସ୍ତାନୀ’ ଫିଲ୍ମରୁ ନିଜର ଅଭିନୟ କ୍ୟାରିୟର ଆରମ୍ଭ କରିଥିଲେ ବିଗ୍ ବି। ଏହି ଅବସରରେ ଅମିତାଭଙ୍କ ପୁଅ ଅଭିଷେକ ବଚ୍ଚନ ତାଙ୍କ ବାପାଙ୍କୁ ଶୁଭେଚ୍ଛା ଜଣାଇବା ସହ ଖୁବ୍ ଭାବପୂର୍ଣ୍ଣ ଶବ୍ଦରେ ଇନଷ୍ଟାଗ୍ରାମରେ ଏକ ଚିଠି ଲେଖିଛନ୍ତି । ସେ ଉଲ୍ଲେଖ କରିଛନ୍ତି ‘ମୋର ଆଇକନ୍ ମୋର ବାପା, ମୋର ବନ୍ଧୁ, ପଥପ୍ରଦର୍ଶକ, ସବୁଠାରୁ ବଡ ସମାଲୋଚକ, ସମର୍ଥକ, ମୋର ଆଇଡଲ ଓ ହିରୋ। ୫୦ ବର୍ଷ ପୂର୍ବରୁ ଏହି ଦିନ ସେ ଫିଲ୍ମ ଦୁନିଆକୁ ଆସିଥିଲେ। ଯେତେବେଳେ ସେ ପ୍ରଥମେ ଆସିଥିଲେ ସେଭଳି ଉତ୍ସାହ ଆଜି ବି ତାଙ୍କ ପାଖରେ ରହିଛି। ପ୍ରିୟ ପା ଆମେ ଆପଣଙ୍କ ସେହି ପ୍ରତିଭା, ଉତ୍ସାହ ଓ ବୁଦ୍ଧିମତାର ଦିନକୁ ପାଳନ କରୁଛୁ। ଆପଣଙ୍କୁ ଆଗାମୀ ୫୦ ବର୍ଷ ପର୍ଯ୍ୟନ୍ତ ଏଭଳି କାମ କରୁଥିବାର ଦେଖିବାକୁ ଚାହେଁ।ଏହାପରେ ଅଭିଷେକ ଆହୁରି ଲେଖିଛନ୍ତି ଯେ, ମୁଁ ଆପଣଙ୍କ ଠାରୁ ବହୁତ କିଛି ଶିଖିବାକୁ ପାଇଛି। ଆଜି ଯେତେବେଳେ ସକାଳେ ଉଠିଲି ଓ ତାଙ୍କୁ ଶୁଭେଚ୍ଛା ଜଣାଇବାକୁ ଯାଉଥିଲି ତାଙ୍କୁ ପ୍ରସ୍ତୁତ ହୋଇ ବାହାରକୁ ଯାଉଥିବାର ଦେଖିଲି। ପଚାରିଲି କୁଆଡେ ଯାଉଛନ୍ତି? ସେ କହିଲେ କାମକୁ ଯାଉଛି। ଏହା ହେଉଛି ଜଣେ ଅଭିନେତାର ସବୁଠାରୁ ବଡ ଉପଲବ୍ଧି ବୋଲି କହିଛନ୍ତି ଅଭିଷେକ। ଏଠାରେ ଉଲ୍ଲେଖନୀୟ ଯେ, ଖୁବ୍ ଶୀଘ୍ର ଅମିତାଭ ବଚ୍ଚନଙ୍କ ଫିଲ୍ମ ‘ବଦଲା’ ରିଲିଜ୍ ହେବାକୁ ଯାଉଛି। ଯାହାକୁ ନେଇ ବିଗ୍ ବି ଖୁବ୍ ଉତ୍ସାହିତ। ଅଭିଷେକ ବଚ୍ଚନଙ୍କ ସହ ସେ ବଣ୍ଟି ଔର ବବଲି, ସରକାର ଏବଂ ପା ଭଳି ଫିଲ୍ମରେ ଅଭିନୟ କରିସାରିଛନ୍ତି।
