ନୂଆଦିଲ୍ଲୀ ୧୨/୦୪: ଆଉ ନାହାଁନ୍ତି ବଲିଉଡ୍ର ମେଲୋଡି କ୍ୱିନ୍ ଆଶା ଭୋସଲେ। ୯୨ ବର୍ଷ ବୟସରେ ଦୁନିଆକୁ କହିଛନ୍ତି ଅଲବିଦା। ମୁମ୍ବାଇର ବ୍ରିଚକାଣ୍ଡି ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ଆଶାଙ୍କୁ ହରାଇ ଶୋକରେ ବୁଡିଛି ପୁରା ସଂଗୀତ ଜଗତ।
ସଙ୍ଗୀତ ଜଗତରେ, ଏପରି କିଛି ନାମ ଅଛି ଯେଉଁମାନେ କେବଳ ନିଜ ସ୍ୱର ପାଇଁ ନୁହେଁ ବରଂ ତାଙ୍କର ସଂଘର୍ଷ ସହିତ ମଧ୍ୟ ଲୋକଙ୍କ ହୃଦୟରେ ସ୍ଥାନ ସୃଷ୍ଟି କରିଛନ୍ତି। ଏପରି ଏକ କାହାଣୀ ହେଉଛି ଆଶା ଭୋସଲେଙ୍କର, ଯାହାଙ୍କ ଜୀବନ ଉତ୍ଥାନ-ପତନ, ଯନ୍ତ୍ରଣା ଏବଂ ସାହସରେ ପରିପୂର୍ଣ୍ଣ। ଜୀବନରେ ଅନେକ କିଛି ସହିଥିଲେ ଆଶା। ଏପରିକି ଆଖି ସାମ୍ନାରେ ନିଜ ପୁଅ-ଝିଅଙ୍କୁ ହରାଇଥିଲେ, ଯାହା ତାଙ୍କୁ ମାନସିକ ଭାବରେ ଭାଙ୍ଗି ପକାଇଥିଲା।
ସେପ୍ଟେମ୍ବର ୮, ୧୯୩୩ ମସିହାରେ ମହାରାଷ୍ଟ୍ରର ସାଙ୍ଗଲିରେ ଜନ୍ମଗ୍ରହଣ କରିଥିବା ଆଶାଙ୍କ ପିଲାଦିନ, ସଙ୍ଗୀତ ପରିବେଶରେ ବଢିଥିଲା। ଗାୟିକା ଛୋଟ ଥିବା ବେଳେ ତାଙ୍କ ବାପା ଦୀନନାଥ ମଙ୍ଗେସକରଙ୍କ ମୃତ୍ୟୁ ପରିବାରକୁ ଭାଙ୍ଗି ପକାଇଥିଲା। ଆର୍ଥିକ ପ୍ରତିବନ୍ଧକ ତାଙ୍କୁ ଏବଂ ତାଙ୍କ ଭଉଣୀ ଲତା ମଙ୍ଗେସକରଙ୍କୁ କମ୍ ବୟସରେ କାମ କରିବା ପାଇଁ ବାଧ୍ୟ କରିଥିଲା ଏବଂ ପୁନେରୁ ନେଇ ମୁମ୍ବାଇ ଯାତ୍ରା ଏକ ସଂଘର୍ଷପୂର୍ଣ୍ଣ ଥିଲା। ମାତ୍ର ୧୬ ବର୍ଷ ବୟସରେ, ଆଶା ତାଙ୍କଠାରୁ ବୟସରେ ଖୁବ୍ ବଡ଼ ଗଣପତରାଓ ଭୋସଲେଙ୍କୁ ବିବାହ କରିଥିଲେ। ତାଙ୍କର ଏହି ନିଷ୍ପତ୍ତି ପରିବାର ମଧ୍ୟରେ ବିବାଦ ସୃଷ୍ଟି କରିଥିଲା । ସମୟ ସହିତ ହୁଏତ ପରିସ୍ଥିତିରେ ଉନ୍ନତି ହୋଇଥିଲେ ମଧ୍ୟ, ସେମାନଙ୍କର ବୈବାହିକ ଜୀବନ ସମସ୍ୟାରେ ପରିପୂର୍ଣ୍ଣ ଥିଲା।
କୁହାଯାଏ ଯେ ତାଙ୍କ ସ୍ୱାମୀଙ୍କ କଠୋର ଆଚରଣ ଆଶାଙ୍କୁ ମାନସିକ ଏବଂ ଶାରୀରିକ ଭାବେ ଯନ୍ତ୍ରଣା ଦେଇଥିଲା। ପରିସ୍ଥିତି ଏତେ ଭୟଙ୍କର ହୋଇଗଲା ଯେ ସେ ତାଙ୍କ ଗର୍ଭାବସ୍ଥାରେ ଆତ୍ମହତ୍ୟା କରିବାକୁ ଚେଷ୍ଟା ମଧ୍ୟ କରିଥିଲେ, କିନ୍ତୁ ଭାଗ୍ୟବଶତଃ ସେ ବଞ୍ଚିଯାଇଥିଲେ। ଶେଷରେ ସେ ୧୯୬୦ ମସିହାରେ ସମ୍ପର୍କର ଅନ୍ତ ଘଟାଇଥିଲେ। ପରେ ସେ ସଂଗୀତଜ୍ଞ ଆର.ଡି. ବର୍ମନଙ୍କୁ ବିବାହ କରିଥିଲେ।
ତାଙ୍କର କଷ୍ଟକର ସମୟ ସେଠାରେ ଶେଷ ହୋଇନଥିଲା। ୨୦୧୨ ମସିହାରେ, ତାଙ୍କ ଝିଅ ବର୍ଷା ଭୋସଲେ ଆତ୍ମହତ୍ୟା କରିଥିଲେ, ଯାହା ତାଙ୍କୁ ଅତି ଭୟଙ୍କର ଆଘାତ ଦେଇଥିଲା। ଏହାର କିଛି ବର୍ଷ ପରେ, ୨୦୧୫ ମସିହାରେ, ତାଙ୍କ ପୁଅ ହେମନ୍ତ ଭୋସଲେ କର୍କଟ ରୋଗରେ ମୃତ୍ୟୁବରଣ କରିଥିଲେ। ଏତେ ଦୁଃଖ ଏବଂ ସଂଘର୍ଷ ସତ୍ତ୍ୱେ, ଆଶା କେବେ ହାର ମାନି ନଥିଲେ। ସେ ତାଙ୍କ ଯନ୍ତ୍ରଣାକୁ ତାଙ୍କ କଣ୍ଠସ୍ୱରରେ ସଜାଇ ଦର୍ଶକଙ୍କୁ ଭେଟି ଦେଇଥିଲେ ସୁପରହିଟ୍ ଗୀତ। ହେଲେ ଆଜି ଆଶାଙ୍କୁ ହରାଇ ସ୍ତବ୍ଧ ପାଲଟିଛି ସାରା ସଙ୍ଗୀତ ଜବତ।
ଆହୁରି ପଢ଼ନ୍ତୁ...ନୀରବି ଗଲା ଭଏସ୍ ଅଫ୍ ବଲିଉଡ୍...୯୨ ବର୍ଷ ବୟସରେ ଆଖି ବୁଜିଲେ ଆଶା ଭୋସଲେ
