ଆବୁଧାବି,୧୧/୦୯: ଆଜି ଏସିଆ କପ୍ର ଗ୍ରୁପ୍ ବି’ରେ ବାଂଲାଦେଶ ଓ ହଂକଂ ପରସ୍ପରକୁ ଭେଟିବେ । ଦୁର୍ବଳ ହଂକଂ ବିପକ୍ଷରେ ବଡ଼ ବିଜୟ ସହ ପ୍ରାରମ୍ଭରୁ ରନ୍ ରେଟ୍କୁ ଊଦ୍ଧ୍ୱର୍ରେ ରଖିବାକୁ ବାଂଲାଦେଶ ପ୍ରୟାସ କରିବ । ପ୍ରଥମ ମ୍ୟାଚରେ ଆଫଗାନିସ୍ତାନ ଠାରୁ ପରାଜିତ ହୋଇ ସାରିଥିବା ହଂକଂ ଦଳ ପାଇଁ ଏହି ମ୍ୟାଚ୍ ‘କର ବା ମର’ ପରିସ୍ଥିତି ସୃଷ୍ଟି କରିଛି । ଆଜି ହାରିଲେ ହଂକଂର ବିଦାୟ ଏକ ପ୍ରକାର ନିଶ୍ଚିତ ହୋଇଯିବ ।
ଏସିଆ କପ୍ ପୂର୍ବରୁ ବାଂଲାଦେଶ କ୍ରମାନ୍ୱୟରେ ୩ଟି ଟି-ଟ୍ୱେଣ୍ଟି ସିରିଜ ଜିତି ସାରିଛି । ଦଳର ମନୋବଳ ଊଦ୍ଧ୍ୱର୍ରେ ରହିଛି । ବୋଲିଂ ବିଭାଗ ସନ୍ତୁଳିତ ଥିବା ବେଳେ ବିସ୍ଫୋରକ ବ୍ୟାଟରମାନେ ଫର୍ମ ଫେରି ପାଇଛନ୍ତି । ତଥାପି ହଂକଂ ପ୍ରତି ବାଂଲାଦେଶକୁ ସତର୍କ ରହିବାକୁ ପଡ଼ିବ । କାରଣ ବାଂଲାଦେଶ ୨୦୧୪ ଟି-ଟ୍ୱେଣ୍ଟି ବିଶ୍ୱକପ୍ରେ ହଂକଂ ଠାରୁ ନିଜ ଘରୋଇ ଗ୍ରାଉଣ୍ଡ୍ରେ ପରାଜିତ ହୋଇଥିଲା । ୧୧ବର୍ଷ ତଳର ସେହି ବିଜୟ ଦଳର ୨ଜଣ ସଦସ୍ୟ ବାବର ହୟାତ ଓ ନିଜାକତ ଖାନ ଚଳିତ ଏସିଆ କପ୍ ଦଳରେ ମଧ୍ୟ ରହିଛନ୍ତି।
ହଂକଂ ଦଳକୁ ବିଜୟ ସ୍ୱାଦ ଚାଖିବାକୁ ହେଲେ ସବୁ ବିଭାଗରେ ଉନ୍ନତ ପ୍ରଦର୍ଶନ କରିବାକୁ ପଡ଼ିବ । ବିଶେଷ କରି ବ୍ୟାଟିଂରେ ଉନ୍ନତି ଆଣିବା ଜରୁରି । ଆଫଗାନିସ୍ତାନ ବିପକ୍ଷ ମ୍ୟାଚ୍ରେ କୌଣସି ବ୍ୟାଟର କ୍ରିଜରେ ତିଷ୍ଠି ପାରିନଥିଲେ । ପେସ୍ ବୋଲିଂ ବିଭାଗକୁ ମଧ୍ୟ ଶୃଙ୍ଖଳିତ ବୋଲିଂ କରିବାକୁ ହେବ ।
ଆଜି ବାଂଲାଦେଶ ଓପନର ତନଜିଦ ହାସାନଙ୍କ ଉପରେ ନଜର ରହିବ । ସେ ସମ୍ପ୍ରତି ଉନ୍ନତ ଫର୍ମରେ ରହିଛନ୍ତି ଓ ବିସ୍ଫୋରକ ବ୍ୟାଟିଂ କରୁଛନ୍ତି । ସେହିପରି ବାବର ହୟାତଙ୍କ ଅଲରାଉଣ୍ଡ ପ୍ରଦର୍ଶନ ଉପରେ ହଂକଂ ଦଳ ନିର୍ଭର କରିବ । ସେ ଆଫଗାନିସ୍ତାନ ବିପକ୍ଷ ମ୍ୟାଚ୍ରେ ୩୯ ରନ କରିଥିଲେ ।
ଆବୁଧାବି ପିଚ ବ୍ୟାଟିଂ ପାଇଁ ବେଶ୍ ଅନୁକୂଳ । ତଥାପି ପ୍ରାରମ୍ଭରୁ ପିଚ୍ ପେସ୍ ବୋଲରଙ୍କୁ ସହାୟତା କରିବ । ପ୍ରଥମ ମ୍ୟାଚ୍ରେ ଆଫଗାନିସ୍ତାନ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲେ ହେଁ ପରେ ବିସ୍ଫୋରକ ବ୍ୟାଟିଂ କରି ୧୮୮ ରନ ସଂଗ୍ରହ କରିଥିଲା । ଆଜି ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକା ପ୍ରକାର ନିଶ୍ଚିତ ।
ବାଂଲାଦେଶ: ତନଜିଦହାସ , ପରଭେଜ ହୋସେନ ଇମୋନ, ଲିଟନ ଦାସ (ଅଧିନାୟକ), ତୋହିଦ ହୃଦୟ, ଶମିମି ହୋସେନ, ଜାକର ଅଲି, ମେହଦି ହାସାନ, ତନଜିମ ହାସାନ, ରିଶଦ ହୋସେନ, ଟସ୍କିନ ଅହମ୍ମଦ, ମୁସ୍ତାଫିଜୁର ରେହମାନ ।
ହଂକଂ: ଜିସନ ଅଲି, ଅଂଶୁମାନ ରଥ, ବାବର ହୟାତ, ନିଜାକତ ଖାନ, କାଲହାନ ଚାଲୁ, କିଞ୍ଚିତ ଶାହ, ୟସିମ ମୁର୍ତାଜା(ଅଧିନାୟକ), ଏଜାଜ ଖାନ, ଆୟୂଶ ଶୁକ୍ଳା, ଆତିକ ଇକବାଲ, ଏହସନ ଖାନ ।
