ହଂକଂ, ୧୧/୬ : ଏଏଫ୍ସି ଏସିଆ କପ୍୨୦୨୭ ଯୋଗ୍ୟତା ପର୍ଯ୍ୟାୟର ତୃତୀୟ ରାଉଣ୍ଡର ଏକ ମ୍ୟାଚ୍ରେ ଆଜି ଭାରତ ଘରୋଇ ହଂକଂ ଠାରୁ ୧-୦ ଗୋଲରେ ପରାଜିତ ହୋଇଛି । ଭାରତ ପରବର୍ତ୍ତୀ ମ୍ୟାଚ୍ରେ ସିଙ୍ଗାପୁରକୁ ଭେଟିବ । ଏହି ମ୍ୟାଚ୍ ଅକ୍ଟୋବର ୯ ତାରିଖରେ ଖେଳାଯିବ ।
ଗତକାଲିର ମ୍ୟାଚ ବେଶ ସଂଘର୍ଷପୂର୍ଣ୍ଣ ହୋଇଥିଲା । ୪୨,୫୭୦ ଦର୍ଶକ ମ୍ୟାଚର ପ୍ରତ୍ୟକ୍ଷ ରୋମାଞ୍ଚ ନେଇଥିଲେ । ପ୍ରତି ମୁହୂର୍ତ୍ତରେ ହୋଇଥିଲା ଆକ୍ରମଣ ଓ ପ୍ରତିଆକ୍ରମଣ । ଫଳରେ ଖେଳର ପ୍ରଥମାର୍ଦ୍ଧ ଗୋଲ ଶୂନ୍ୟ ରହିଥିଲା । ଦ୍ୱିତୀୟାର୍ଦ୍ଧରେ ମଧ୍ୟ ସମାନ ଖେଳ ଦେଖିବାକୁ ମିଳିଥିଲା । ୯୦ ମିନିଟ ପର୍ଯ୍ୟନ୍ତ କେହି ଗୋଲ ଖାତା ଖୋଲି ପାରିନଥିଲେ । ଇନ୍ଜ୍ୟୁରୀ ଟାଇମରେ ଗୋଲ୍ ଦେଇ ହଂକଂ ଶେଷରେ ବିଜୟୀ ହୋଇଥିଲା । ୯+୪ ମିନିଟରେ ହଂକଂକୁ ମିଳିଥିଲା ପେନାଲ୍ଟି । ଘରୋଇ ତାରକା ଷ୍ଟେଫାନ ପେରେଇରା ତ୍ରୁଟି ନକରି ଭାରତ ଗୋଲପୋଷ୍ଟରେ ବଲ ପୂରାଇ ବିଜୟ ଛଡ଼ାଇ ନେଇଥିଲେ । ଢାକାରେ ଖେଳାଯାଇଥିବା ଅନ୍ୟ ଏକ ମ୍ୟାଚ୍ରେ ସିଙ୍ଗାପୁର ୨-୧ ଗୋଲରେ ବାଂଲାଦେଶକୁ ପରାଜିତ କରିଥିଲା । ପୂର୍ବରୁ ଭାରତ ଗତ ୪ ତାରିଖରେ ଥାଇଲାଣ୍ଡ ସହ ଏକ ବନ୍ଧୁତ୍ୱପୂର୍ଣ୍ଣ ଅନ୍ତର୍ଜାତୀୟ ମ୍ୟାଚ ଖେଳିଥିଲା । ଏହି ମ୍ୟାଚ୍ରେ ଥାଇଲାଣ୍ଡ ୨-୦ ଗୋଲରେ ବିଜୟୀ ହୋଇଥିଲା । ଶେଷ ପର୍ଯ୍ୟନ୍ତ ଭାରତ ଗୋଲ ଖାତା ଖୋଲି ପାରିନଥିଲା ।
