ନୂଆଦିଲ୍ଲୀ,୦୯/୦୩: ଇରାନର ତେହରାନ ଠାରେ ଆୟୋଜିତ ଷଷ୍ଠ ଏସିଆନ୍ ମହିଳା କବାଡ଼ି ଚାମ୍ପିଅନସିପ୍ରେ ଭାରତ ଟାଇଟଲ୍ ବଜାୟ ରଖିବାରେ ସଫଳ ହୋଇଛି । ଆଜି ଫାଇନାଲ୍ ମୁକାବିଲାରେ ଦଳ ୩୨-୨୫ରେ ଆୟୋଜକ ଇରାନକୁ ପରାସ୍ତ କରିଥିଲା । ଏଥିସହ ଡିଫେଣ୍ଡିଂ ଚାମ୍ପିଅନ୍ ଭାରତ ପଞ୍ଚମ ଥର ଏସୀୟ ଟାଇଟଲ୍ ଜିତିବାର ସୌଭାଗ୍ୟ ଲାଭ କରିଛି ।
ସୋନାଲି ସିଙ୍ଗାଟଙ୍କ ନେତୃତ୍ୱରେ ଭାରତୀୟ ଦଳ ଗ୍ରୁପ୍-ଏ’ରେ ବାଂଲାଦେଶକୁ ୬୪-୨୩ରେ, ଥାଇଲାଣ୍ଡକୁ ୭୬-୨୧ରେ ଏବଂ ନେପାଳକୁ ୪୭-୧୪ରେ ହରାଇ ସେମି ଫାଇନାଲ୍ରେ ପ୍ରବେଶ କରିଥିଲା । ସେମିରେ ଦଳ ନେପାଳକୁ ୩୬-୧୮ରେ ପରାଜିତ କରି ଫାଇନାଲ୍ରେ ସ୍ଥାନ ପକ୍କା କରିଥିଲା । ଏହି ଟୁର୍ଣ୍ଣାମେଣ୍ଟରେ ୭ଟି ଦଳ ୨ଟି ଗ୍ରୁପ୍ରେ ଭାଗ ନେଇଥିଲେ । ଇରାନ ତୃତୀୟ ଥର ଏହି ପ୍ରତିଯୋଗିତା ଆୟୋଜନ କରିଥିଲା । ପୂର୍ବରୁ ଇରାନ ୨୦୦୭, ୨୦୧୭ ସଂସ୍କରଣକୁ ସଫଳତାର ସହ ଆୟୋଜନ କରିଥିଲା ।
