ବଲାଙ୍ଗୀର,୦୧/୦୧: ବଲାଙ୍ଗୀର ସହରରେ ଜିରୋ ନାଇଟ୍ ସେଲିବ୍ରେସନ୍ରେ ବୁଲିଲା ଖଣ୍ଡା । ମଙ୍ଗଳବାର ରାତିରେ ତୁଳସୀନାଗାର ପଡାରେ ସେଲିବ୍ରେସନ ବେଳେ ଆକ୍ରମଣ କରିଲେ ଦୁଇ ଦୁର୍ବୃତ୍ତ । ଖଣ୍ଡା ଚୋଟର ଶିକାର ହୋଇ ତୁଳସୀନଗର ପଡା ମଧୁସୂଦନ ବଗର୍ତି ଏବଂ ଅଗ୍ନିକୁମାର ବିଶି ଗୁରୁତର ହୋଇଛନ୍ତି । ଆକ୍ରମଣକାରୀଙ୍କ ଭିତରୁ ଜଣକର ନାଁ ବବଲୁ ଷାଣ୍ଢ ବୋଲି ଜଣାପଡ଼ିଥିବା ବେଳେ ଅନ୍ୟ ଜଣଙ୍କ ପରିଚୟ ମିଳି ପାରି ନାହିଁ । ବଲାଙ୍ଗୀର ଜିଲ୍ଲାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ମଙ୍ଗଳବାର ରାତିରେ ତୁଳସୀନାଗାର ପଡାରେ ଛୋଟ ଛୋଟ ଛୁଆଙ୍କ ସହିତ ଯୁବକ ମାନେ ଜିରୋନାଇଟ ସେଲିବ୍ରେସନ କରୁଥିଲେ । ଏହି ସମୟରେ ଦୁଇଜଣ ଯୁବକ ସେଲିବ୍ରେସନ କରାଯାଉଥିବା ସ୍ଥାନରେ ଦ୍ରୁତ ଗତିରେ ବାରମ୍ବାର ବାଇକ୍ରେ ଯିବା ଆସିବା କରିଥିଲେ । ଏହା ଦେଖି ସ୍ଥାନୀୟ ଯୁବକ ମାନେ ବାରଣ କରିଥିଲେ । ବାରଣ କରିବାରୁ ଖଣ୍ଡା ବାହାର କରି ବାଇକରେ ଥିବା ଦୁଇଜଣ ଯୁବକ ଆକ୍ରମଣ ଆରମ୍ଭ କରିଥିଲେ । ପ୍ରତିବାଦ କରୁଥିବା ତୁଳସୀନଗର ପଡା ମଧୁସୂଦନ ବଗର୍ତି ଏବଂ ଅଗ୍ନିକୁମାର ବିଶିଙ୍କୁ ଖଣ୍ଡାରେ ଆକ୍ରମଣ କରିଥିଲେ । ମଧୁସୂଦନଙ୍କ ହାତରେ ଏବଂ ଅଗ୍ନିଙ୍କ ମୁଣ୍ଡରେ ଆଘାତ ଲାଗିଛି । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଯୁବକ ଦ୍ୱୟଙ୍କୁ ଗୁରୁତର ଅବସ୍ଥାରେ ବଲାଙ୍ଗିର ଭୀମଭୋଇ ମେଡିକାଲ କଲେଜ ହସପିଟାଲରେ ଭର୍ତ୍ତି କରିଛି ପୋଲିସ । ତେବେ ଆକ୍ରମଣକାରୀଙ୍କ ଭିତରୁ ଜଣକର ନାଁ ବବଲୁ ଷାଣ୍ଢ ବୋଲି ଜଣାପଡିଛି । ଅନ୍ୟଜଣଙ୍କର ନାଁ ଜଣା ପଡ଼ି ନାହିଁ । ଅଭିଯୁକ୍ତ ମାନେ ଫେରାର ଥିବା ବେଳେ ଟାଉନ ପୋଲିସ ଘଟଣା ସ୍ଥଳରେ ଉପସ୍ଥିତ ରହି ତଦନ୍ତ ଜାରି ରଖିଛି ।
