ଆନନ୍ଦପୁର,୦୨/୧୨: କେନ୍ଦୁଝର ଜିଲ୍ଲା ଖଣିବିଭାଗ ଏନଫୋର୍ସମେଣ୍ଟ ସ୍କ୍ୱାର୍ଡ ଉପରେ ବାଲି ମାଫିଆଙ୍କ ଆକ୍ରମଣ । ରବିବାର ବିଳମ୍ୱିତ ରାତିରେ ଜୁନିୟର ମାଇନିଂ ଅଫିସର ସୁରଜ ହେମ୍ବ୍ରମ ଏବଂ ୩ ଜଣ ସୁରକ୍ଷା କର୍ମିଙ୍କୁ ଧରି ଆନନ୍ଦପୁର ଅଞ୍ଚଳରରେ ଚୋରାବାଲି ଧରପକଡ ପାଇଁ ଆସିଥିବା ସମୟରେ ତାଙ୍କ ଟିମ୍ ଉପରେ ଆକ୍ରମଣ ହୋଇଛି ।
ସୂଚନା ମୁତାବକ, ଚଢାଉ ପାଇଁ ଖଣି ଅଧିକାରୀ ଜଣକ ରବିବାର କେନ୍ଦୁଝର କାର୍ଯ୍ୟାଳୟ ଠାରୁ ବାହାରି ପ୍ରଥମେ ହରିଚନ୍ଦନପୁର ଅଞ୍ଚଳକୁ ଯାଇଥିଲେ । ସେହି ଠାରୁ ହିଁ ୨ଟି ଗାଡି ତାଙ୍କୁ ପିଛା କରିଥିଲା । ପରେ ସେ ଆନନ୍ଦପୁର ପହଁଞ୍ଚିବାପରେ ପ୍ରଥମେ ବୈତରଣୀ ବ୍ରିଜ୍ ପାରି ହୋଇ ଆନନ୍ଦପୁର କଲେଜ ପର୍ଯ୍ୟନ୍ତ ଯାଇଥିଲେ । ସେଠାରୁ ଫେରି ଆନନ୍ଦପୁର ବସଷ୍ଟାଣ୍ଡ ଦେଇ ଘଷିପୁରା ପଟକୁ ଫେରିବା ସମୟରେ ଆନନ୍ଦପୁର ବ୍ରିଜ୍ ଛକ ଠାରେ ଥିବା ଆଉ ୫-୬ଟି ୪ଚକିଆ ଗାଡିରେ କିଛି ଲୋକ ତାଙ୍କୁ ପିଛା କରିଥିଲେ । ବ୍ରିଜ୍ ପାରି ହେବାପରେ ହମ୍ସ ଠାରେ ଗାଡି ସ୍ଲୋ ହେବାର ସୁଯୋଗ ନେଇ ତାଙ୍କ ଗାଡି ଆଗରେ ଗାଡି ରଖି ଅତର୍କିତ ଆକ୍ରମଣ କରିଥିଲ । ଲୁହା ପାଇପରେ ଗାଡି କାଚ ସବୁ ଭାଙ୍ଗି ଦେଇଥିଲେ । ଏହା ସହ ଗାଡି ଭିତରେ ବସିଥିବା ଖଣି ଅଧିକାରୀ ସୁରଜ ହେମ୍ବ୍ରମଙ୍କ ସହ ସିକ୍ୟୁରିଟି ଗାର୍ଡ ଓ ଡ୍ରାଇଭରକୁ ମାରି ଲହୁଲୁହାଣ କରିଥିଲେ । ଆହତ ଅବସ୍ଥାରେ ସମସ୍ତ ୫ଜଣ ସ୍କ୍ୱାର୍ଡ ସଦସ୍ୟ ଘସିପୁରା ଥାନାରେ ପହଁଞ୍ଚି ଲିଖିତ ଅଭିଯୋଗ କରିବାପରେ ପୋଲିସ୍ ଆକ୍ରମଣକାରୀଙ୍କୁ ଧରିବାକୁ ପ୍ରୟାସ ଆରମ୍ଭ କରିଛି ।
