ନୂଆଦିଲ୍ଲୀ,୦୮/୦୩:ଅଯୋଧ୍ୟାରେ ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟକୁ ବେଆଇନ ଭାବେ ମନ୍ଦିର ଜମି ବିକ୍ରି ଅଭିଯୋଗ । ଏନେଇ ଆନନ୍ଦ ଭବନ ପୁରୋହିତଙ୍କ ବିରୋଧରେ ମାମଲା ରୁଜୁ କରାଯାଇଛି। ପୋଲିସର ସୂଚନା ଅନୁଯାୟୀ, ଅଯୋଧ୍ୟାର ଅତିରିକ୍ତ ମୁଖ୍ୟ ନ୍ୟାୟିକ ମାଜିଷ୍ଟ୍ରେଟ ମହେନ୍ଦ୍ର ସିଂହ ପାଶୱାନଙ୍କ ନିର୍ଦ୍ଦେଶ ପରେ ମାମଲା ରୁଜୁ କରାଯାଇଛି। ଫୈଜାବାଦ ସହର କୋତୱାଲି ପୋଲିସ ଆନନ୍ଦ ଭବନ ମନ୍ଦିରର ପୂଜାରୀଙ୍କ ବିରୋଧରେ ମାମଲା ରୁଜୁ କରିଥିବା ଜଣାପଡ଼ିଛି ।
ତେବେ ମନ୍ଦିର ପରିଚାଳନା କମିଟିର ସଦସ୍ୟ ଆନନ୍ଦ ପ୍ରକାଶ ପାଠକଙ୍କ ଅଭିଯୋଗ ଅନୁଯାୟୀ, ପୂଜକ ରମାକାନ୍ତ ପାଠକ ସେପ୍ଟେମ୍ବର ୨୧,୨୦୨୪ରେ ରାମ ଜନ୍ମଭୂମି ମନ୍ଦିର ପରିସର ସଂଲଗ୍ନ ୨୧,୧୯୮.୮ ବର୍ଗଫୁଟ ଜମିକୁ ୬ କୋଟି ଟଙ୍କାରେ ବିକ୍ରି କରିଥିଲେ। ସିଟି କୋତୱାଲି ଥାନା ପ୍ରଭାରୀ ଇନ୍ସପେକ୍ଟର ଅଶ୍ୱନୀ ପାଣ୍ଡେ କହିଛନ୍ତି ଯେ, ମୁଖ୍ୟ ଅଭିଯୁକ୍ତ ରମାକାନ୍ତ ପାଠକଙ୍କ ବିରୋଧରେ ଠକେଇ ଏବଂ ଅନ୍ୟାନ୍ୟ ଅପରାଧ ଅଭିଯୋଗରେ ମାମଲା ରୁଜୁ କରାଯାଇଛି। ସ୍ଥାନୀୟ ଥାନାରେ ମାମଲା ରୁଜୁ କରିବା ପାଇଁ ଚେଷ୍ଟା କରାଯିବା ପରେ ମନ୍ଦିର ଜମିର ଅବୈଧ ବିକ୍ରୟ ସମ୍ପର୍କରେ ଜଣାପଡ଼ିଥିଲା। କିନ୍ତୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିଲା। ଅଭିଯୋଗକାରୀ କୋର୍ଟଙ୍କ ଦ୍ୱାରସ୍ଥ ହୋଇଥିଲେ, ଯେଉଁଠାରେ ମାମଲା ପଞ୍ଜିକରଣ ପାଇଁ ନିର୍ଦ୍ଦେଶ ଦିଆଯାଇଥିଲା। ଏସଏଚଓ ପାଣ୍ଡେ କହିଛନ୍ତି ଯେ, କୋର୍ଟଙ୍କ ନିର୍ଦ୍ଦେଶ ପରେ ମାମଲା ରୁଜୁ ହୋଇଛି ଏବଂ ଏବେ ତଦନ୍ତ ଚାଲିଛି। ଅଧିକାରୀମାନେ ଏହି ଘଟଣାର ତଦନ୍ତ କରୁଛନ୍ତି।
