ବାଇକ୍କୁ ଧକ୍କା ଦେଲା ପିକଅପ୍ , ୨ ଯୁବକ ମୃତ
ବାଲେଶ୍ୱର, ୨୯/୩ : ବାଇକ୍କୁ ଧକ୍କା ଦେଲା ପିକଅପ୍। ବାଲେଶ୍ୱର ସହର ଉପକଣ୍ଠ କଣ୍ଟାବଣିଆ ନିକଟରେ ବୁଧବାର ଏହି ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ୨ ବାଇକ୍ଆରୋହୀଙ୍କର ଘଟଣା ସ୍ଥଳରେ ମୃତ୍ୟୁ ହୋଇଛି। ମୃତ ଯୁବକଙ୍କ ପରିଚୟ ମିଳିପରିନାହିଁ।
ସୂଚନା ଅନୁଯାୟୀ, ବୁଧବାର ମଧ୍ୟାହ୍ନରେ ୨ଜଣ ଯୁବକ ବାଲେଶ୍ୱରକୁ କୌଣସି କାମରେ ଆସିଥିଲେ। ବାଲେଶ୍ୱରରୁ ବାଇକରେ ଫେରିବା ବେଳେ କଣ୍ଟାବଣିଆ ଛକ ନିକଟରେ ବିପରୀତ ଦିଗରୁ ଆସୁଥିବା ଏକ ପିକଅପ୍ ସେମାନଙ୍କୁ ଧକ୍କା ଦେଇଥିଲା। ଘଟଣା ସ୍ଥଳରେ ବାଇକଟି ଜଳିଯାଇଥିଲା। ଦୁଇ ବାଇକ ଆରୋହୀଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିଲା। ଅପର ପକ୍ଷରେ ଭାରସାମ୍ୟ ହରାଇ ପିକଅପଟି ରାସ୍ତା ତଳକୁ ଓଲଟି ପଡିଥିଲା। ଦୁର୍ଘଟଣା ପରେ ପିକଅପ ଡ୍ରାଇଭର ଫେରାର ହୋଇଯାଇଛି। ସ୍ଥାନୀୟ ଲୋକେ ଦୁଇ ଯୁବକଙ୍କୁ ଉଦ୍ଧାର କରି ବାଲେଶ୍ୱର ହସ୍ପିଟାଲକୁ ଆଣିଥିଲେ। ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ଏହି ଘଟଣାକୁ ନେଇ ସ୍ଥାନୀୟ ଲୋକେ ଫୁଲାଡି-ଵାଲେଶ୍ୱର ରାସ୍ତା ବନ୍ଦ କରିଥିଲେ। ସହଦେଵଖୁଣ୍ଟା ପୁଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ରାସ୍ତାରୋକ ହଟାଇଥିଲେ।
