ଭୁବନେଶ୍ୱର,୩୧/୩: ଭାଇ ଭାଇ ଭିତରେ ଜମି ବାଡ଼ି ବିବାଦକୁ ନେଇ ଭରତପୁରରେ ବୁଲିଲା କଟୁରୀ । ସାନ ଭାଇକୁ ଗୁଣ୍ଡା ଲଗାଇ ହାଣିଲା ବଡ ଭାଇ। ଆକ୍ରମଣରେ ଜଣେ ଗୁରୁତର ହୋଇଥିବା ବେଳେ ତିନିଜଣ ଆହତ ହୋଇଛନ୍ତି । ଆହତ ତିନିଜଣ ହେଲେ ଅଶୋକ, ବୁଦ୍ଧିଆ ଏବଂ ଜଗନ୍ । ରାଜଧାନୀ ଭୁବନେଶ୍ୱରର ଭରତପୁର ଅଞ୍ଚଳର ବନଦୂର୍ଗା ବସ୍ତିରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି।
ସୂଚନା ମୁତାବକ, ଭାଇ ଭାଇ ଭିତରେ ଜମି ବାଡ଼ି ବିବାଦକୁ ନେଇ ଭରତପୁର ବନଦୂର୍ଗା ବସ୍ତି ପାଲଟିଲା ରଣକ୍ଷେତ୍ର । ଅନେକ ଦିନରୁ ଲାଗି ରହିଥିବା ବିବାଦକୁ ନେଇ ରବିବାର ଭରତପୁର ଥାନାରେ ଦୁଇ ଭାଇଙ୍କ ମଧ୍ୟରେ ଆପୋଷ ବୁଝାମଣା ହୋଇଥିଲା । କିନ୍ତୁ ବିଳମ୍ବିତ ରାତିରେ ଏହା ଉଗ୍ରରୂପ ନେଇଥିଲା। ବଡ ଭାଇ ସାହି ବାହାରୁ ଗୁଣ୍ଡା ଡକାଇ ସାନ ଭାଇକୁ ମରଣାନ୍ତକ ଆକ୍ରମଣ କରିଥିଲା । ଯାହାକୁ ପ୍ରତିବାଦ କରିଥିବା ସ୍ଥାନୀୟ ଲୋକେ ମଧ୍ୟ ଆକ୍ରମଣର ଶିକାର ହୋଇଥିଲେ । ଖବର ପାଇ ଦୁଇଟି ପିସିଆର୍ ଏବଂ ଭରତପୁର ଥାନା ପୋଲିସ ପହଞ୍ଚି ଥିଲେ ମଧ୍ୟ ସ୍ଥାନୀୟ ଲୋକେ ହାଣିଥିବା ଲୋକକୁ ଛାଡ଼ିବାକୁ ନାରାଜ ହୋଇଥିଲେ । ଉତ୍ତେଜନା ବଢିବାରୁ ଅଭିଯୁକ୍ତକୁ ଥାନାକୁ ନେବା ପାଇଁ ଦୁଇ ସେକ୍ସନ ଫୋର୍ସ ମୁତୟନ କରାଯାଇଥିଲା। ତେବେ ରାସ୍ତା ଅବରୋଧ କରିଥିବା ଲୋକଙ୍କୁ ଭରତପୁର ଥାନା ଅଧିକାରୀ ବୁଝାଇବା ସହ ପ୍ରଥମ ପର୍ଯ୍ୟାୟରେ ଅଭିଯୁକ୍ତଙ୍କ ପରିବାରକୁ ଗାଡ଼ିରେ ନେଇଥିଲେ । କିନ୍ତୁ ମୁଖ୍ୟ ଦୁଇ ଅଭିଯୁକ୍ତଙ୍କୁ ନେବା ସମୟରେ ଲୋକେ ବିରୋଧ କରିଥିଲେ। ପୋଲିସ ଜବରଦସ୍ତି ନେବାକୁ ସ୍ଥିର କରିବା ବେଳେ ଆହୁରି ଉତ୍ତେଜନା ପ୍ରକାଶ ପାଇଥିଲା । ଏମିତିକି ଉତ୍ୟକ୍ତ ଲୋକ ଏବଂ ପୋଲିସ ମଧ୍ୟରେ ଧସ୍ତାଧସ୍ତି ହୋଇଥିଲା । ଫଳରେ ଉଭୟ ପୋଲିସ ଏବଂ ସ୍ଥାନୀୟ ଲୋକଙ୍କ ମଧ୍ୟରୁ ଏକାଧିକ ବ୍ୟକ୍ତି ମାନେ ଆହତ ହୋଇ ଚିକିତ୍ସିତ ହେଉଛନ୍ତି । ସେପଟେ ଘଟଣାର ସମସ୍ତ ଅଭିଯୁକ୍ତ ପୋଲିସ ହେପାଜତରେ ଥିବା ବେଳେ ଚାପା ଉତ୍ତେଜନା ପରିସ୍ଥିତି ପାଇଁ ଘଟଣାସ୍ଥଳରେ ଏକ ପ୍ଲାଟୁନ ଫୋର୍ସ ମୁତୟନ କରାଯାଇଛି।
