ନୂଆଦିଲ୍ଲୀ: ବାଂଲାଦେଶରେ ହିନ୍ଦୁ ସଂପ୍ରଦାୟ ଉପରେ ହେଉଥିବା ଆକ୍ରମଣକୁ ନେଇ ଭାରତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏହାକୁ ନେଇ ସରକାର ମଧ୍ୟ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି । କିନ୍ତୁ ଏହି ସବୁ ଅଭିଯୋଗରେ କୌଣସି ସତ୍ୟତା ନାହିଁ ବୋଲି କହିଛନ୍ତି ବାଂଲାଦେଶର ଅନ୍ତରୀଣ ପ୍ରଧାନମନ୍ତ୍ରୀ ଏବଂ ନୋବେଲ ଶାନ୍ତି ପୁରସ୍କାର ବିଜେତା ଅର୍ଥନୀତିଜ୍ଞ ମହମ୍ମଦ ୟୁନୁସ୍ । ତାଙ୍କ ଦେଶରେ ହିନ୍ଦୁ ସମ୍ପ୍ରଦାୟ ବିରୁଦ୍ଧରେ ହିଂସାର ରିପୋର୍ଟକୁ ‘ସମ୍ପୂର୍ଣ୍ଣ ମିଥ୍ୟା ଖବର’ବୋଲି ସେ କହିଛନ୍ତି। ସେ ଦାବି କରିଛନ୍ତି ଯେ, ମିଥ୍ୟା ଖବର ପ୍ରଚାର କରିବା ଭାରତର ଏକ ବିଶେଷତ୍ୱ ପାଲଟିଛି। ମହମ୍ମଦ ୟୁନୁସ୍ ସାମ୍ବାଦିକ ମେହେଦି ହାସନଙ୍କ ସହିତ ଏକ ସାକ୍ଷାତକାରରେ ଏହି ପ୍ରତିକ୍ରିୟା ଦେଇଛନ୍ତି ।
ହାସନ ତାଙ୍କୁ ପଚାରିଥିଲେ, ‘ଗତ ବର୍ଷ ନଭେମ୍ବରରେ ପ୍ରାୟ ୩୦,୦୦୦ ହିନ୍ଦୁ ଆପଣଙ୍କ ଶାସନ ବିରୋଧରେ ପ୍ରତିବାଦ କରିଥିଲେ। ସେମାନେ କହିଥିଲେ ଯେ, ସେମାନଙ୍କ ସମ୍ପ୍ରଦାୟ ଉପରେ ବାରମ୍ବାର ଆକ୍ରମଣ ହେଉଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ବାଂଲାଦେଶରେ ହିଂସାକୁ ବର୍ବର ବୋଲି ବର୍ଣ୍ଣନା କରିଥିଲେ। ତେବେ, ଏହି ହିଂସାକୁ ବନ୍ଦ କରିବା ପାଇଁ ଆପଣ କ'ଣ ପଦକ୍ଷେପ ନେଇଛନ୍ତି ?’ ମେହେଦି ହାସନଙ୍କ ପ୍ରଶ୍ନର ଉତ୍ତରରେ ୟୁନୁସ କହିଛନ୍ତି, ‘ପ୍ରଥମେ, ଏହି ସମସ୍ତ ରିପୋର୍ଟଗୁଡ଼ିକ ମିଥ୍ୟା । ଏଗୁଡ଼ିକୁ ବିଶ୍ୱାସ କରାଯାଇପାରିବ ନାହିଁ। ମିଥ୍ୟା ଖବର ଆଜି ଭାରତର ଏକ ପ୍ରମୁଖ ବୈଶିଷ୍ଟ୍ୟ।’ ସେ ଆହୁରି କହିଛନ୍ତି, କେତେବେଳେ ଜମି ବିବାଦ, ପାରିବାରିକ ବିବାଦ କିମ୍ବା ବ୍ୟକ୍ତିଗତ ସମସ୍ୟା ହୋଇଥାଏ । ଯଦି ମୋର ଜଣେ ହିନ୍ଦୁ ପଡ଼ୋଶୀ ଅଛନ୍ତି ଏବଂ ଆମର ଏକ ଜମିକୁ ନେଇ ବିବାଦ ଅଛି, ତେବେ ଲୋକମାନେ ଏହାକୁ ହିନ୍ଦୁ-ମୁସଲିମ ବିବାଦ ବୋଲି କହୁଛନ୍ତି । ବାସ୍ତବରେ ଏହା ନୁହେଁ।
ୟୁନୁସ୍ କହିଛନ୍ତି ଯେ, ଶେଖ ହସିନାଙ୍କୁ କ୍ଷମତାରୁ ବାହାର କରିବା ପରେ ଗଠିତ ମଧ୍ୟବର୍ତ୍ତୀକାଳୀନ ସରକାର ଏହି ପ୍ରସଙ୍ଗରେ ବହୁତ ସତର୍କ ରହିଛି। ଭାରତ ସର୍ବଦା ଏହି ପ୍ରସଙ୍ଗ ଉଠାଉଛି । ତେଣୁ ଆମେ ବିଶେଷ ଯତ୍ନ ନେଉଛୁ। ଯେତେବେଳେ ୟୁନୁସଙ୍କୁ ପଚରାଗଲା ଯେ, ସେ ବାଂଲାଦେଶର ହିନ୍ଦୁ ସମ୍ପ୍ରଦାୟକୁ କ’ଣ ବାର୍ତ୍ତା ଦେବାକୁ ଚାହାଁନ୍ତି ? ସେ କହିଛନ୍ତି, ‘ମୁଁ ସେମାନଙ୍କୁ କହୁଛି ଯେ, ଏଭଳି କୁହନ୍ତୁନି ଯେ ମୁଁ ଜଣେ ହିନ୍ଦୁ, ମୋତେ ସୁରକ୍ଷା ଦିଅ। କୁହ, ମୁଁ ଏହି ଦେଶର ଜଣେ ନାଗରିକ ଏବଂ ମୁଁ ସେହି ସମସ୍ତ ଅଧିକାର ଚାହୁଁଛି ଯାହା ଏହାର ନାଗରିକମାନଙ୍କୁ ମିଳୁଛି।’ ୟୁନୁସ ସାକ୍ଷାତକାରରେ କହିଛନ୍ତି, ଶେଖ ହସିନାଙ୍କୁ ଶରଣ ଦେବା ପାଇଁ ଭାରତର ନିଷ୍ପତ୍ତି ଦୁଇ ଦେଶ ମଧ୍ୟରେ ସମ୍ପର୍କରେ ଏକ ବଡ଼ ପ୍ରତିବନ୍ଧକ ପାଲଟିଛି। ସେ ଏହା ମଧ୍ୟ ସ୍ପଷ୍ଟ କରିଛନ୍ତି, ବାଂଲାଦେଶରେ ପରବର୍ତ୍ତୀ ନିର୍ବାଚନ ୬ ମାସ ମଧ୍ୟରେ ଅନୁଷ୍ଠିତ ହେବ।
