କୃଷ୍ଣନଗର: ପଶ୍ଚିମବଙ୍ଗର ନଦୀୟା ଜିଲ୍ଲାରେ ଭାରତ-ବାଂଲାଦେଶ ସୀମା ନିକଟ ହାଲଦରପାରା ସୀମା ଚୌକି ନିକଟରେ ବୁଧବାର ଏକ ମୁକାବିଲାରେ ଜଣେ ବାଂଲାଦେଶୀ ତସ୍କର ନିହତ ହୋଇଥିବା ବେଳେ ଜଣେ ବିଏସଏଫ (ସୀମା ସୁରକ୍ଷା ବାହିନୀ) ଜବାନ ଆହତ ହୋଇଛନ୍ତି। ଏହି ଘଟଣା ୩୨ତମ ବାଟାଲିଅନ ଅଧୀନରେ ଘଟିଥିବା ନେଇ ବିଏସଏଫ ଅଧିକାରୀମାନେ ସୂଚନା ଦେଇଛନ୍ତି।
ବିଏସଏଫ ଦେଇଥିବା ସୂଚନା ଅନୁଯାୟୀ, ହାଲଦରପାରା ନିକଟରେ ଥିବା ସୀମା ଚୌକି ନିକଟରେ ସୁନା ତସ୍କରୀ ରୋକିବା ପାଇଁ ଏକ ଅତର୍କିତ ଅପରେସନ କରାଯାଇଥିଲା। ମଧ୍ୟାହ୍ନ ସମୟ ପ୍ରାୟ ୧୨ଟା ୧୦ ସମୟରେ ଚାରିରୁ ପଞ୍ଚଜଣ ଅସ୍ତ୍ରଧାରୀ ବାଂଲାଦେଶୀ ତସ୍କର ନଦୀ ପାର କରି ଭାରତୀୟ ଅଞ୍ଚଳରେ ପ୍ରବେଶ କରୁଥିବା ଦେଖାଯାଇଥିଲା। ବିଏସଏଫ ଜବାନମାନେ ସେମାନଙ୍କୁ ମୌଖିକ ଭାବେ ଚେତାବନୀ ଦେଇଥିଲେ। କିନ୍ତୁ ତସ୍କରମାନେ ଏହାକୁ ଅଣଦେଖା କରି ଆଗକୁ ବଢ଼ିଥିଲେ ଏବଂ ଜଣେ ଜବାନଙ୍କୁ ଘେରି ତୀକ୍ଷ୍ଣ ଅସ୍ତ୍ର ସାହାଯ୍ୟରେ ଆକ୍ରମଣ କରିଥିଲେ।
ଆତ୍ମରକ୍ଷା ପାଇଁ ବିଏସଏଫ ଜବାନମାନେ ପ୍ରଥମେ ପମ୍ପ ଆକ୍ସନ ଗନ (ପିଏଜି) ବ୍ୟବହାର କରି ଆକାଶ ଆଡ଼କୁ ଗୁଳି ଚଳାଇଥିଲେ। କିନ୍ତୁ ତସ୍କରମାନେ ଆକ୍ରମଣ ଜାରି ରଖିଥିଲେ। ଏହି ସମୟରେ ଜଣେ ଜଓ୍ୱାନଙ୍କୁ ରକ୍ଷା କରିବା ପାଇଁ ଅନ୍ୟ ଜଣେ ଜବାନ ତାଙ୍କର ଇନସାସ ରାଇଫଲରୁ ଗୁଳି ଚଳାଇଥିଲେ। ଯାହା ଜଣେ ତସ୍କରଙ୍କ ତଳିପେଟରେ ବାଜିଥିଲା। ଆହତ ତସ୍କର ଘଟଣାସ୍ଥଳରେ ହିଁ ଟଳି ପଡ଼ିଥିଲେ ଏବଂ ଅନ୍ୟ ତସ୍କରମାନେ ବାଂଲାଦେଶ ଆଡ଼କୁ ପଳାଇଥିଲେ।
ଆହତ ତସ୍କରଙ୍କୁ କୃଷ୍ଣଗଞ୍ଜ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଆହତ ବିଏସଏଫ ଜବାନଙ୍କୁ ମଧ୍ୟ ସେହି ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ଘଟଣାସ୍ଥଳରୁ ଏକ କଟର ଏବଂ ଚାରି ତୀକ୍ଷ୍ଣ ଅସ୍ତ୍ର ଉଦ୍ଧାର କରାଯାଇଛି। ଯାହା କୃଷ୍ଣଗଞ୍ଜ ପୁଲିସକୁ ହସ୍ତାନ୍ତର କରାଯାଇଛି।
ବିଏସଏଫ ଏକ ବିବୃତିରେ କହିଛି ଯେ ତସ୍କରମାନଙ୍କ ଆକ୍ରମଣ ସତ୍ତ୍ୱେ ଜବାନମାନେ ଅତ୍ୟନ୍ତ ସଂଯମ ଦେଖାଇଥିଲେ ଏବଂ କେବଳ ଆତ୍ମରକ୍ଷା ପାଇଁ ଗୁଳି ଚଳାଇଥିଲେ। ଏହି ଘଟଣା ଭାରତ-ବାଂଲାଦେଶ ସୀମାରେ ତସ୍କରୀ ଏବଂ ସୀମା ସୁରକ୍ଷା ସମ୍ବନ୍ଧୀୟ ଚ୍ୟାଲେଞ୍ଜକୁ ପୁଣି ଥରେ ସାମ୍ନାରେ ରଖିଛି।
