ନୂଆଦିଲ୍ଲୀ: ବାର କାଉନସିଲ ଅଫ୍ ଇଣ୍ଡିଆ (BCI) ଆଜି (ସୋମବାର) ଆଇନଜୀବୀ ରାକେଶ କିଶୋରଙ୍କୁ ସୁପ୍ରିମକୋର୍ଟରେ ଆଇନ ଅଭ୍ୟାସ କରିବାରୁ ତୁରନ୍ତ ନିଲମ୍ବିତ କରିଛି। ସୁପ୍ରିମକୋର୍ଟର କାର୍ଯ୍ୟକାଳ ସମୟରେ ଭାରତର ମୁଖ୍ୟ ବିଚାରପତି (CJI) ବି.ଆର. ଗଭାଇଙ୍କ ପ୍ରତି ଓକିଲଙ୍କ ଅସମ୍ମାନଜନକ ଆଚରଣକୁ ଆଧାର କରି BCI ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ବାର କାଉନସିଲ ଅଫ୍ ଇଣ୍ଡିଆର ସଭାପତି ମନନ କୁମାର ମିଶ୍ରଙ୍କ ଦ୍ୱାରା ସ୍ୱାକ୍ଷରିତ ଏହି ଆଦେଶରେ ସ୍ପଷ୍ଟ କରାଯାଇଛି ଯେ, ରାକେଶ କିଶୋର ନିଲମ୍ବନ ଅବଧି ମଧ୍ୟରେ ଭାରତର କୌଣସି କୋର୍ଟ କିମ୍ବା ଟ୍ରିବ୍ୟୁନାଲରେ ହାଜର ହୋଇପାରିବେ ନାହିଁ। ତାଙ୍କ ନାମରେ ଜାରି କରାଯାଇଥିବା ସମସ୍ତ ପରିଚୟପତ୍ର କିମ୍ବା ପ୍ରବେଶ ପାସକୁ ତୁରନ୍ତ ନିଷ୍କ୍ରିୟ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
ସୋମବାର ଦିନ ଭାରତର ମୁଖ୍ୟ ବିଚାରପତିଙ୍କ କୋର୍ଟରେ ଘଟିଥିବା ଘଟଣାର ଉଦ୍ଧୃତି ଦେଇଛି BCI । ଆଦେଶରେ କୁହାଯାଇଛି ଯେ, ପ୍ରଥମ ଦୃଷ୍ଟି ସାକ୍ଷୀଙ୍କ ଠାରୁ ପ୍ରମାଣ ମିଳୁଛି ଯେ ଅକ୍ଟୋବର ୬, ୨୦୨୫ ରେ, ପ୍ରାୟ ୧୧.୩୫ ସମୟରେ, ଆଇନଜୀବୀ ରାକେଶ କିଶୋର ସୁପ୍ରିମକୋର୍ଟର କୋର୍ଟ ନମ୍ବର ୧ ରେ ଭାରତର ମୁଖ୍ୟ ବିଚାରପତି (CJI)ଙ୍କ ଉପରକୁ ଜୋତା ଖୋଲି ଫିଙ୍ଗିବାକୁ ଚେଷ୍ଟା କରିଥିଲେ। ସେଠାରେ ଉପସ୍ଥିତ ସୁରକ୍ଷା କର୍ମୀ ମାନେ ତାଙ୍କୁ ତୁରନ୍ତ ଅଟକ ରଖିଥିଲେ।
ସଦ୍ୟ ନିର୍ଦ୍ଦେଶରେ କୁହାଯାଇଛି ଯେ ଏହି କାର୍ଯ୍ୟାନୁଷ୍ଠାନ ଓକିଲ ଆଇନ, 1961 ଏବଂ ବାର କାଉନସିଲ ଅଫ୍ ଇଣ୍ଡିଆ ନିୟମ ଅନୁଯାୟୀ ନିଆଯାଉଛି। ଏହି ନିୟମ ଗୁଡ଼ିକ କୋର୍ଟ ପ୍ରତି ଓକିଲଙ୍କ ଆଚରଣ, ମର୍ଯ୍ୟାଦା ଏବଂ ସମ୍ମାନ ସହିତ ଜଡିତ। ବାର କାଉନସିଲ ଅଫ୍ ଇଣ୍ଡିଆ (BCI) କହିଛି ଯେ, ଏହି ନିର୍ଦ୍ଦେଶ ମଧ୍ୟବର୍ତ୍ତୀକାଳୀନ। ଓକିଲଙ୍କୁ କାରଣ ଦର୍ଶାଅ ନୋଟିସ୍ ମଧ୍ୟ ଜାରି କରାଯାଇଛି। ଆଇନ ଅନୁଯାୟୀ ଆହୁରି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
