ବଙ୍ଗରେ ଶୁଭେନ୍ଦୁ କ୍ୟାବିନେଟ୍‌ ମହା-ସମ୍ପ୍ରସାରଣ, ଲୋକଭବନରେ ୩୫ ମନ୍ତ୍ରୀଙ୍କ ଶପଥ ଗ୍ରହଣ !

କୋଲକାତା, ୧।୬: ପଶ୍ଚିମବଙ୍ଗରେ ନୂଆ ବିଜେପି ସରକାର ଗଠନର ପ୍ରାୟ ମାସେ ପରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ କ୍ୟାବିନେଟ୍ର ବଡ଼ ସମ୍ପ୍ରସାରଣ ହୋଇଛି । କୋଲକାତାସ୍ଥିତ ଲୋକଭବନରେ ଆୟୋଜିତ ଏକ ଭବ୍ୟ ସମାରୋହରେ ଆଜି ୩୫ ଜଣ ନେତା ମନ୍ତ୍ରୀ ପଦର ଶପଥ ନେଇଛନ୍ତି । ରାଜ୍ୟପାଳ ଆର.ଏନ. ରବି ସମସ୍ତ ନୂତନ ମନ୍ତ୍ରୀଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ଏହି ସମ୍ପ୍ରସାରଣ ପରେ ଶୁଭେନ୍ଦୁ ସରକାରଙ୍କ ମୋଟ୍ ମନ୍ତ୍ରୀଙ୍କ ସଂଖ୍ୟା ୪୧ରେ ପହଞ୍ଚିଛି । ସୂଚନାଯୋଗ୍ୟ, ସରକାର ଗଠନ ସମୟରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସହ ମାତ୍ର ୫ ଜଣ ବିଧାୟକ ମନ୍ତ୍ରୀ ଭାବେ ଶପଥ ନେଇଥିଲେ । ଆଜିର ଏହି ବୃହତ୍ କ୍ୟାବିନେଟ୍ ବିସ୍ତାରରେ ଆଞ୍ଚଳିକ ଏବଂ ସାମାଜିକ ସନ୍ତୁଳନ ରକ୍ଷା କରିବାକୁ ବିଜେପି ଚେଷ୍ଟା କରିଥିବା ଦେଖିବାକୁ ମିଳିଛି ।

କ୍ୟାବିନେଟ୍ ମନ୍ତ୍ରୀ ଭାବେ ଶପଥ ନେଇଥିବା ପ୍ରମୁଖ ଚେହେରା:

ଆଜି ଶପଥ ଗ୍ରହଣ କରିଥିବା ୩୫ ଜଣ ବିଧାୟକଙ୍କ ମଧ୍ୟରେ ବିଜେପିର କେତେକ ପ୍ରତିଷ୍ଠିତ ଏବଂ ପ୍ରଭାବଶାଳୀ ନେତା ଦୀପକ ବର୍ମନ, ତପସ ରାୟ, ମନୋଜ କୁମାର ଓରାମ, ଶଙ୍କର ଘୋଷ, ଅର୍ଜୁନ ସିଂ, ଗୌରୀ ଶଙ୍କର ଘୋଷ ସାମିଲ ଅଛନ୍ତି । ମନ୍ତ୍ରୀମଣ୍ଡଳରେ ସ୍ଥାନ ପାଇବାକୁ ଥିବା ସମ୍ଭାବ୍ୟ ନେତାଙ୍କ ତାଲିକାରେ ଶଙ୍କର ଘୋଷ, ରୁଦ୍ରନୀଲ ଘୋଷ, ଶରଦ୍ୱତ ଟୁଡୁ, ପ୍ରଣତ ଟୁଡୁ, ରୂପା ଗାଙ୍ଗୋପାଧ୍ୟାୟ, କଲ୍ୟାଣ ଚକ୍ରବର୍ତ୍ତୀ, ଚନ୍ଦନା ବାଉରୀ, ଜଗନ୍ନାଥ ଚାଟାର୍ଜୀ, ଅଶୋକ ଡିଣ୍ଡା ଏବଂ ସୁବ୍ରତ ମୈତ୍ରାଙ୍କ ଭଳି ପ୍ରମୁଖ ନେତାଙ୍କ ନାମ ମଧ୍ୟ ଆଲୋଚନାରେ ରହିଛି ।

ସ୍ଵପନ ଦାସଗୁପ୍ତଙ୍କୁ ମିଳିପାରେ ଶିକ୍ଷା ବିଭାଗ:

ଏହି କ୍ୟାବିନେଟ୍ ସମ୍ପ୍ରସାରଣରେ ସବୁଠାରୁ ଚର୍ଚ୍ଚିତ ନାମ ହେଉଛି ବରିଷ୍ଠ ବିଜେପି ନେତା ତଥା ରାଶ ବିହାରୀ ଆସନରୁ ବିଧାୟକ ସ୍ଵପନ ଦାସଗୁପ୍ତ । ରାଜନୈତିକ ମହଲରେ ଚର୍ଚ୍ଚା ଚାଲିଛି ଯେ ତାଙ୍କୁ ସରକାରରେ ଏକ ଗୁରୁତ୍ଵପୂର୍ଣ୍ଣ ଦାୟିତ୍ଵ ଦିଆଯାଉଛି । ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ତାଙ୍କୁ ପୂର୍ବରୁ ହିଁ ଶିକ୍ଷା ବିଭାଗର ଦାୟିତ୍ଵ ଦେବା ନେଇ ସଙ୍କେତ ଦେଇଥିବାରୁ, ସେ ପଶ୍ଚିମବଙ୍ଗର ପରବର୍ତ୍ତୀ ଶିକ୍ଷା ମନ୍ତ୍ରୀ ହେବା ପ୍ରାୟ ନିଶ୍ଚିତ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି ।

ଅଭିଜ୍ଞ ତପସ ରାୟଙ୍କୁ ନୂଆ ଦାୟିତ୍ଵ:

ସେହିପରି ମାଣିକତଲା ବିଧାନସଭା କ୍ଷେତ୍ରରୁ ବଡ଼ ବିଜୟ ହାସଲ କରିଥିବା ଅଭିଜ୍ଞ ରାଜନେତା ତପସ ରାୟଙ୍କୁ ମଧ୍ୟ ମନ୍ତ୍ରୀମଣ୍ଡଳରେ ଏକ ମହତ୍ଵପୂର୍ଣ୍ଣ ପଦବୀ ମିଳିବାକୁ ଯାଉଛି । ନୂଆ ସରକାର ଗଠନ ପରେ ସେ କାର୍ଯ୍ୟକାରୀ ବାଚସ୍ପତି ଭାବେ କାର୍ଯ୍ୟ ତୁଲାଉଥିଲେ ଏବଂ ନୂତନ ବିଧାୟକମାନଙ୍କୁ ଶପଥ ପାଠ କରାଇଥିଲେ । ଦଳୀୟ ସୂତ୍ର ଅନୁସାରେ ତାଙ୍କର ଦୀର୍ଘ ରାଜନୈତିକ ଅଭିଜ୍ଞତାକୁ ଦେଖି ତାଙ୍କୁ କ୍ୟାବିନେଟ୍ରେ ବଡ଼ ବିଭାଗ ମିଳିବ ।

ପୂର୍ବରୁ ଶପଥ ନେଇଥିବା ୫ ମନ୍ତ୍ରୀ ଓ ସେମାନଙ୍କ ବିଭାଗ:

ସୂଚନାଯୋଗ୍ୟ ଯେ, ମେ ୯ ତାରିଖରେ ମୁଖ୍ୟମନ୍ତ୍ରୀଙ୍କ ସହ ୫ ଜଣ ବରିଷ୍ଠ ନେତା ଶପଥ ଗ୍ରହଣ କରିଥିଲେ ଏବଂ ସେମାନଙ୍କ ମଧ୍ୟରେ ବିଭାଗ ବଣ୍ଟନ ସରିଛି:

କହିରଖୁଛୁ ଯେ, ପଶ୍ଚିମବଙ୍ଗରେ ବିଜେପିର ଏହି ପ୍ରଥମ ସରକାରରେ ପ୍ରଶାସନିକ କାର୍ଯ୍ୟକୁ ଅଧିକ ଗତିଶୀଳ ଏବଂ ସ୍ଵଚ୍ଛ କରିବା ପାଇଁ ଏହି ସମ୍ପ୍ରସାରଣ କରାଯାଇଛି । ଆଗାମୀ ଦିନରେ ନୂଆ ମନ୍ତ୍ରୀମାନଙ୍କ ବିଭାଗ ବଣ୍ଟନ ସମ୍ପର୍କରେ ଆନୁଷ୍ଠାନିକ ବିଜ୍ଞପ୍ତି ପ୍ରକାଶ ପାଇବ ।