ମାଲକାନଗିରି/ଖଇରପୁଟ - ବିଜ୍ଞାନ ମେଳା ପାଇଁ ବିଇଓଙ୍କୁ ଦୀର୍ଘ ସମୟ ଧରି ଅପେକ୍ଷା କରିବା ପରେ ଉଦଘାଟନ କଲେ ବିଡିଓ। ଏହାର ଘଣ୍ଟେ ବିଳମ୍ବରେ ପହଁଚି ଓଲଟି ଏବିଇଓଙ୍କ ଉପରେ ଗର୍ଜିଲେ ବିଇଓ। ଏପରି ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ଖଇରପୁଟ ବ୍ଲକ୍ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ। ଉକ୍ତ ବିଦ୍ୟାଳୟ ପରିସରରେ ଗୁରୁବାର ଅନୁଷ୍ଠିତ ହୋଇଥିଲା ବ୍ଲକ୍ ସ୍ତରୀୟ ବିଜ୍ଞାନମେଳା।
ଏଠାରେ କିଛି ଅବ୍ୟବସ୍ଥା ଓ ଦାୟିତ୍ଵ ହୀନତା ଦେଖାଯାଇ ଥିଲା। ଉଦ୍ଘାଟନ ଉତ୍ସବର ନିମନ୍ତ୍ରିତ ମୁଖ୍ୟ ଅତିଥି ତଥା ଗୋଷ୍ଠୀ ଉନ୍ନୟନ ଅଧିକାରୀ ଉମାଶଙ୍କର କୋୟା ଓ ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ଡାକ୍ତର ଦାସ, ଏବିଓ ଓ ବିଭିନ୍ନ ସ୍କୁଲରୁ ଆସିଥିବା ଛାତ୍ରଛାତ୍ରୀଙ୍କ ସହିତ ଦୀର୍ଘ ସମୟ ଧରି ବ୍ଲକଶିକ୍ଷା ଅଧିକାରୀ ସୁମି଼ତ୍ ବିଶ୍ୱାସଙ୍କୁ ଦୀର୍ଘ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡିଥିବା ଦେଖାଯାଇ ଥିଲା।
ଆନୁଷ୍ଠାନିକ ଭାବେ ସକାଳ ନଅ ଘଣ୍ଟା ସମୟରେ ଉକ୍ତ ଉତ୍ସବ ଉଦ୍ଘାଟନ ହେବ ବୋଲି ନିମନ୍ତ୍ରଣ ପତ୍ରରେ ଉଲ୍ଲେଖ ଥିଲେ ମଧ୍ୟ ବିଇଓ ଶ୍ରୀ ବିଶ୍ୱାସ ପହଁଚିବାରେ ବିଳମ୍ବ ଘଟିଥିଲା। ଅତିଥି ଓ ଅନ୍ୟ ମାନଙ୍କ ଅପେକ୍ଷାକୁ ଦୃଷ୍ଟିରେ ରଖି ଉପସ୍ଥିତ ଅତିରିକ୍ତ ବ୍ଲକ ଶିକ୍ଷା ଅଧିକାରୀ ବ୍ଲକ ଶିକ୍ଷା ଅଧିକାରୀଙ୍କୁ ଫୋନ୍ ଯୋଗେ ବାରମ୍ବାର ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ସେ ଫୋନ୍ ଉଠାଇ ନଥିଲେ। ଶେଷରେ ସମୟ ୧୦ଟା ୧୦ ରେ ଉତ୍ସବ ଉଦ୍ଘାଟନ କରାଯାଇଥିଲା।
ଉଦ୍ଘାଟନର ଘଣ୍ଟାଏ ବିଳମ୍ବରେ ଗୋଷ୍ଠୀ ଶିକ୍ଷା ଅଧିକାରୀ ପହଞ୍ଚିଥିବା ଦେଖିବାକୁ ମିଳିଥିଲା। ସେ ପହଁଚି ଅତିରିକ୍ତ ବ୍ଲକ ଶିକ୍ଷା ଅଧିକାରିଙ୍କ ଉପରେ ଗର୍ଜନ କରି ଥିଲେ ଏବଂ କହିଥିଲେ , ମୋ ଅନୁପସ୍ଥିତିରେ କାର୍ଯ୍ୟକ୍ରମ ଆରମ୍ଭ କରି ଦେଲେ ମୁଁ ଆଉ କାହିଁକି ରହିବି । ଏହା କହି ମଞ୍ଚ ଛାଡି ପଳାଇବାକୁ ଚେଷ୍ଠା କରିବାରୁ ତାଙ୍କୁ ଅନ୍ୟ ଅତିଥି ମାନେ ବୁଝା ଶୁଝା କରି ଅଟକାଇ ଥିଲେ।
ଛାତ୍ରଛାତ୍ରୀଙ୍କ ବିକାଶ ନିକଟରେ ଜଣେ ବ୍ଲକ୍ ଶିକ୍ଷା ଅଧିକାରୀଙ୍କ ଏପରି ଅସମୟାନୁବର୍ତ୍ତିତାକୁ ବୁଦ୍ଧିଜୀବୀ,ଅଭିଭାବକ ଓ କିଛି ଅବସର ପ୍ରାପ୍ତ ସରକାରୀ କର୍ମଚାରୀ ନାପସନ୍ଦ କରିଥିବା ବେଳେ ,ଏପରି ହେଲେ ପିଲାମାନେ ସମୟାନୁବର୍ତ୍ତିତା କିପରି ଶିଖିବେ ବୋଲି ବିଇଓଙ୍କ ଉପରେ ଆଙ୍ଗୁଠି ଉଠାଇଛନ୍ତି।
