ବ୍ରହ୍ମପୁର, ୦୩/୦୪: ଗୁରୁବାର ମଧ୍ୟରାତ୍ରିରୁ ଆରମ୍ଭ ହେବ ବ୍ରହ୍ମପୁରର ଦ୍ୱିବାର୍ଷିକ ମା’ ବୁଢ଼ୀ ଠାକୁରାଣୀ ଯାତ୍ରା । ଏହା ଆସନ୍ତା ୨୮ ତାରିଖ ମଧ୍ୟରାତ୍ରରେ ସମାପନ ହେବ। ଯାତ୍ରାରମ୍ଭ ଦୃଷ୍ଟିରୁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି । ପରମ୍ପରା ଅନୁଯାୟୀ ମା’ ଠାକୁରାଣୀ ବାପ ଘର ବୁଲିବାକୁ ଆସନ୍ତି । ଯାତ୍ରା ଅବଧି କାଳରେ ଠାକୁରାଣୀ ଅଞ୍ଚଳର ବିଭିନ୍ନ ସାହିକୁ ପ୍ରତି ସନ୍ଧ୍ୟାରେ ପରିକ୍ରମା କରିଥାନ୍ତି । ଏଥିସହ କଳାକୁଞ୍ଜ ଓ ରଥ ମଧ୍ୟ ଅଞ୍ଚଳବାସୀଙ୍କ ତରଫରୁ ନିର୍ମାଣ କରି ପ୍ରଦର୍ଶିତ ହୋଇଥାଏ । ଯାତ୍ରା ଦୃଷ୍ଟିରୁ ଦେବୀଙ୍କ ବାପ ଘର ଦେଶୀବେହେରା ସାହି ସମେତ ସମଗ୍ର ବଡ଼ବଜାର ଏବେ ଚଳଚଞ୍ଚଳ । ଅସ୍ଥାୟୀ ମଣ୍ଡପ ନିର୍ମାଣ ସରିଛି ।
ପ୍ରଶାସନ ତରଫରୁ ଯାତ୍ରା ହେଉଥିବା ଅଞ୍ଚଳରେ ପାନୀୟ ଜଳ ବ୍ୟବସ୍ଥା, ରାସ୍ତା ମରାମତି ମଧ୍ୟ କରାଯାଇଛି । ମା’ଙ୍କୁ ସ୍ୱାଗତ ପାଇଁ ସ୍ଥାନୀୟ ବ୍ୟବସାୟୀ ସଂଘ, ଅଞ୍ଚଳବାସୀ ତତ୍ପର ହୋଇ ରହିଛନ୍ତି । ଗୁରୁବାର ରାତି ସାଢ଼େ ୧୧ଟା ପରେ ଦେବୀଙ୍କୁ ସ୍ଥାୟୀ ମନ୍ଦିରରୁ ଅସ୍ଥାୟୀ ପୀଠକୁ ଆଣିବା ପାଇଁ ଦେଶୀବେହେରା ସାହିରୁ ପଟୁଆର ବାହାରିବ । ସ୍ଥାୟୀ ପୀଠରେ ପୂଜାର୍ଚ୍ଚନା ହୋଇ ଆଜ୍ଞାମାଳ ମିଳିବା ପରେ ରାତି ୨ଟାରୁ ଭୋର୍ ୪ଟା ମଧ୍ୟରେ ସ୍ଥାୟୀ ପୀଠରୁ ବାହାରି ବାପ ଘର ଅସ୍ଥାୟୀ ପୀଠକୁ ମା’ ସାଆନ୍ତାଣୀ ଆସିବେ ।
