ପାଟନା: ଭୋଜପୁରୀ ଫିଲ୍ମ ଅଭିନେତା ଏବଂ ଗାୟକ ପବନ ସିଂହ ବିହାର ବିଧାନସଭା ନିର୍ବାଚନ ଲଢ଼ିବେ । ଜାମସେଦପୁରରେ ପବନ ସିଂହ କହିଛନ୍ତି ଯେ, ୨୦୨୪ ଲୋକସଭା ନିର୍ବାଚନ ପରେ ସେ ଏବେ ବିହାର ବିଧାନସଭା ନିର୍ବାଚନ ଲଢ଼ିବେ। ଭାରତୀୟ ଜନତା ପାର୍ଟି (ବିଜେପି)ରୁ ନିର୍ବାଚନ ଲଢ଼ିବା ବିଷୟରେ ପଚରାଯିବାରୁ ପବନ ସିଂହ କହିଛନ୍ତି ଯେ, ଏକଥା ସମୟ କହିବ ଏବଂ ସେ ବର୍ତ୍ତମାନ ସ୍ପଷ୍ଟ ଭାବରେ କିଛି କହିପାରିବେ ନାହିଁ ।
ସେ କହିଛନ୍ତି, ତାଙ୍କ ବିଜୟ ଅପେକ୍ଷା ପରାଜୟ ବିଷୟରେ ଅଧିକ ଆଲୋଚନା ହେଉଛି। ପବନ ସିଂହ ମଙ୍ଗଳବାର (୪ ମାର୍ଚ୍ଚ) ଝାଡ଼ଖଣ୍ଡର ଜାମସେଦପୁରରେ ଏକ ଚଳଚ୍ଚିତ୍ରର ପ୍ରଚାର ସମୟରେ ଏହା କହିଛନ୍ତି । ଉଲ୍ଲେଖନୀୟ ଯେ, ପବନ ସିଂହଙ୍କ ପତ୍ନୀ ଜ୍ୟୋତି ସିଂହ ମଧ୍ୟ କିଛି ଦିନ ପୂର୍ବରୁ ଘୋଷଣା କରିଥିଲେ ଯେ, ସେ ରୋହତାସରୁ ନିର୍ବାଚନ ଲଢ଼ିବେ ।
ବିହାରରେ ବିଧାନସଭା ନିର୍ବାଚନ ଚଳିତ ବର୍ଷ ଅକ୍ଟୋବର-ନଭେମ୍ବରରେ ଅନୁଷ୍ଠିତ ହେବାର ସମ୍ଭାବନା ରହିଛି। ପୂର୍ବରୁ ୨୦୨୪ ଲୋକସଭା ନିର୍ବାଚନରେ ପଶ୍ଚିମବଙ୍ଗରୁ ଲୋକସଭା ନିର୍ବାଚନ ଲଢ଼ିବାକୁ ବିଜେପି ତାଙ୍କୁ ଟିକେଟ୍ ଦେଇଥିଲା । କିନ୍ତୁ ସେ ଟିକେଟ୍ ଫେରାଇ ଦେଇଥିଲେ ଏବଂ ବିହାରର କରାକଟ ଲୋକସଭା ଆସନରୁ ସ୍ବାଧୀନ ପ୍ରାର୍ଥୀ ଭାବରେ ନାମାଙ୍କନ ଭରିଥିଲେ । ଭୋଜପୁରୀ ଗାୟକରୁ ରାଜନେତା ହୋଇଥିବା ପବନ ସିଂହଙ୍କୁ ବିଜେପି ବହିଷ୍କାର କରିଥିଲା । ପରେ ସେ ନିର୍ବାଚନରେ ପରାସ୍ତ ମଧ୍ୟ ହୋଇଥିଲେ ।
ପବନ ସିଂହ କରାକଟ ଆସନରୁ ସ୍ୱାଧୀନ ପ୍ରାର୍ଥୀ ଭାବରେ ଲୋକସଭା ନିର୍ବାଚନ ଲଢ଼ିଥିଲେ। ନିର୍ବାଚନ କମିଶନଙ୍କ ନିକଟରେ ସେ ୨୦୨୪ ମେ’ମାସରେ ଦାଖଲ କରିଥିବା ଏକ ସତ୍ୟପାଠ ଅନୁଯାୟୀ ତାଙ୍କର ସ୍ଥାବର ଏବଂ ଅସ୍ଥାବର ସମ୍ପତ୍ତି ୧୬.୭୫ କୋଟି ଟଙ୍କାରୁ ଅଧିକ ଥିଲା। ।
ପବନଙ୍କ ପାଖରେ ୫.୦୪ କୋଟି ଟଙ୍କା ମୂଲ୍ୟର ସ୍ଥାବର ସମ୍ପତ୍ତି ଏବଂ ୧୧.୭୦ କୋଟି ଟଙ୍କା ମୂଲ୍ୟର ଅସ୍ଥାବର ସମ୍ପତ୍ତି ରହିଛି । ସିଂହଙ୍କ ସ୍ଥାବର ସମ୍ପତ୍ତିରେ ପାଞ୍ଚଟି ବ୍ୟାଙ୍କ ଆକାଉଣ୍ଟ, ତିନୋଟି ଚାରି ଚକିଆ ଗାଡ଼ି, ୧.୩୯ କୋଟି ଟଙ୍କା ମୂଲ୍ୟର ଏକ ମୋଟରସାଇକେଲ ଏବଂ ୩୧.୦୯ ଲକ୍ଷ ଟଙ୍କା ମୂଲ୍ୟର ଅଳଙ୍କାର ଅନ୍ତର୍ଭୁକ୍ତ ଏବଂ ତାଙ୍କ ପାଖରେ ୬୦,୦୦୦ ଟଙ୍କା ନଗଦ ଅଛି । ୨୦୨୨-୨୦୨୩ ବର୍ଷରେ ତାଙ୍କର ଆୟ ୫୧.୫୮ ଲକ୍ଷ ଟଙ୍କା ଥିଲା ।
