PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • କେନ୍ଦ୍ରାପଡ଼ା : ସିମେଣ୍ଟ ଇଟାଭାଟି ମାଲିକଙ୍କୁ ବିଭତ୍ସ ଭାବେ ହତ୍ୟା, ରକ୍ତ ଜୁଡୁବୁଡୁ ମୃତଦେହ ଉଦ୍ଧାର
  • ||
  • କେନ୍ଦ୍ରାପଡ଼ା: ବାଲିଆ ବାଣ ବିସ୍ଫୋରଣ ଅଘଟଣ: ଏସ୍‌ସିବିରେ ଆଉ ଜଣଙ୍କ ମୃତ୍ୟୁ, ଆହୁରି ୧୧ ଜଣଙ୍କ ଅବସ୍ଥା ଗୁରୁତର
  • ||
  • କଟକ: ଡିସେମ୍ବର ୯ରୁ ମାଟ୍ରିକ୍‌ ଏସ୍‌ଏ-୧ ଖାତା ଦେଖା, ୫୬ଟି କେନ୍ଦ୍ରରେ ହେବ ମୂଲ୍ୟାୟନ
  • ||
  • ଭୁବନେଶ୍ୱର: ରାଜ୍ୟରେ ଶୀତ ଲହରୀ ଅସମ୍ଭାଳ: ୧୦ ଡିଗ୍ରୀ ତଳେ ୭ ସହର, ସେମିଳିଗୁଡା ସବୁଠୁ ଥଣ୍ଡା
  • ||

ସ୍ୱତନ୍ତ୍ର ଜିଲ୍ଲା ମାନ୍ୟତା ପାଇବ କି ରାଜଧାନୀ ? କଳେବର ବଢ଼ିବା ପରେ ତେଜୁଛି ଦାବି

ଭୁବନେଶ୍ୱର ୧୮/୧୧: ୧୯୯୩ରେ ପୁରୀ ଜିଲ୍ଲା ୩ ଖଣ୍ଡ ହୋଇ ଖୋର୍ଦ୍ଧା, ପୁରୀ ଓ ନୟାଗଡ଼ ହୋଇଥିଲା । ଭୁବନେଶ୍ୱର ସେବେଠୁ ଖୋର୍ଦ୍ଧା ଜିଲ୍ଲାରେ ରହି ଆସିଛି । ଗତ ୩୦ ବର୍ଷ ଭିତରେ ରାଜ୍ୟର ରାଜଧାନୀ ଭୁବନେଶ୍ୱରର କାୟା ଢେର ବଦଳି ଯାଇଛି । କେବଳ ଭୁବନେଶ୍ୱର ମହାନଗର ନିଗମର ଲୋକସଂଖ୍ୟା ୨୦ ଲକ୍ଷ ଟପିଗଲାଣି । ବର୍ଦ୍ଧିତ ଜନସଂଖ୍ୟାକୁ ଦୃଷ୍ଟିରେ ରଖି ଭୁବନେଶ୍ୱରକୁ ସ୍ୱତନ୍ତ୍ର ଜିଲ୍ଲା ମାନ୍ୟତା ଜରୁରି ହୋଇପଡିଛି ।

ଏବେ ଖୋର୍ଦ୍ଧା ଜିଲ୍ଲାରେ ୧୦ଟି ବ୍ଲକ୍‌, ଗୋଟିଏ ମହାନଗର ନିଗମ, ଦୁଇଟି ମ୍ୟୁନିସିପାଲଟି, ଦୁଇଟି ଏନଏସି ରହିଛି । ୨୦୧୧ ଜନଗଣନା ଅନୁଯାୟୀ ଜିଲ୍ଲାର ଲୋକସଂଖ୍ୟା ୨୨ ଲକ୍ଷ ୫୧ ହଜାର । ଗତ ୧୦ ବର୍ଷରେ ଏହି ଲୋକସଂଖ୍ୟା ନିହାତି ଭାବେ ୩୫ ଲକ୍ଷ ଟପିଥିବାର ଆକଳନ କରାଯାଉଛି । ଏହି ୧୦ଟି ବ୍ଲକ୍‌ ଦୁଇଟି ସବଡିଭିଜନରେ ବିଭକ୍ତ । ଭୁବନେଶ୍ୱର ସବଡିଭିଜନରେ ଭୁବନେଶ୍ୱର ବ୍ଲକ୍‌, ବାଲିଅନ୍ତା, ବାଲିପାଟଣା ଓ ଜଟଣୀ ରହିଛି । ଖୋର୍ଦ୍ଧା ଉପଖଣ୍ଡରେ ୬ଟି ବ୍ଲକ୍‌ ଖୋର୍ଦ୍ଧା, ଟାଙ୍ଗୀ, ବେଗୁନିଆ, ବୋଲଗଡ଼, ଚିଲିକା ଓ ବାଣପୁର ରହିଛି । 

ଭୁବନେଶ୍ୱର ବିଧାନସଭା ଆସନ ଇତି ମଧରେ ୩ଟି ହୋଇଛି । ଭୁବନେଶ୍ୱର ମଧ୍ୟ, ଉତ୍ତର ଭୁବନେଶ୍ୱର ଓ ଏକାମ୍ର । ସହରର ପରିସୀମା ପ୍ରତି ବର୍ଷ ବଢ଼ି ଚାଲିଛି । ଖୋର୍ଦ୍ଧାରେ ଜିଲ୍ଲାପାଳଙ୍କ ଅଫିସ୍‌ ରହିଛି । ଖୋର୍ଦ୍ଧା ଜିଲ୍ଲାର ସୀମା ବାଲିପାଟଣାରୁ ଆରମ୍ଭ କରି ଚିଲିକା-ବାଣପୁର ପର୍ଯ୍ୟନ୍ତ ପରିବ୍ୟାପ୍ତ । ଭୁବନେଶ୍ୱରର ୩ ନିର୍ବାଚନ ମଣ୍ଡଳୀ ସହିତ ବାଲିପାଟଣା, ବାଲିଅନ୍ତା, ପିପିଲି ଓ ଜଟଣୀକୁ ନେଇ ଏହି ନୂତନ ଜିଲ୍ଲା ଗଠନ ହେଲେ ପ୍ରଶାସନିକ ସ୍ତରରେ କାର୍ଯ୍ୟ ସୁଗମ ହୋଇପାରିବ । ଯେହେତୁ ଭୁବନେଶ୍ୱର ରାଜ୍ୟର ରାଜଧାନୀ ଏଠାରେ ଜନସଂଖ୍ୟା ଆଗକୁ ଆହୁରି ବୃଦ୍ଧି ପାଇବ । ରାଜସ୍ୱ ପରିଚାଳନା, ଆଇନ ଶୃଙ୍ଖଳା ପରିସ୍ଥିତି, ଅପରାଧ ନିୟନ୍ତ୍ରଣ କ୍ଷେତ୍ରରେ ନୂତନ ଜିଲ୍ଲା ଗଠନ ସହାୟକ ହୋଇପାରିବ ।