ପାଟ୍ନା,୦୩/୦୬: ବିହାରରେ ଚଳିତବର୍ଷ ଶେଷଆଡ଼କୁ ବିଧାନସଭା ନିର୍ବାଚନ ଅନୁଷ୍ଠିତ ହେବାର ଅଛି । ରିପୋର୍ଟ ଅନୁସାରେ, ସେଠାରେ ୩ଟି ପର୍ଯ୍ୟାୟରେ ବିଧାନସଭା ନିର୍ବାଚନ ହୋଇପାରେ । ଦୀପାବଳି ଓ ଛଟ୍ ପର୍ବକୁ ଦୃଷ୍ଟିରେ ରଖି ଭୋଟ ତାରିଖ ଘୋଷଣା ହେବ । ଇତିମଧ୍ୟରେ ମୁଖ୍ୟ ନିର୍ବାଚନ ଅଧିକାରୀ ଜ୍ଞାନେଶ କୁମାରଙ୍କ ଅଧ୍ୟକ୍ଷତାରେ ନିର୍ବାଚନ ଆୟୋଗର ଟିମ୍ ଚଳିତ ମାସରେ ପ୍ରସ୍ତୁତି ନେଇ ସମୀକ୍ଷା କରିବାକୁ ରାଜ୍ୟ ଗସ୍ତରେ ଯିବେ । ଅବଶ୍ୟ ସେ ସଂପର୍କିତ ତାରିଖ ସାମ୍ନାକୁ ଆସିନାହିଁ ।
ନୀତୀଶ ସରକାରଙ୍କ କାର୍ଯ୍ୟକାଳ ଚଳିତବର୍ଷ ନଭେମ୍ବର ୨୨ ତାରିଖରେ ଶେଷ ହେବାର ଅଛି । ତେଣୁ ତା’ ପୂର୍ବରୁ ନିର୍ବାଚନ ପ୍ରକ୍ରିୟା ଶେଷ ହେବ । ଏଭଳିକ୍ଷେତ୍ରରେ ସେପ୍ଟେମ୍ବରର ଶେଷ ସପ୍ତାହରେ ନିର୍ବାଚନ ଆରମ୍ଭ ହୋଇ ଅକ୍ଟୋବର ମାସ ସାରା ଜାରି ରହିପାରେ । ଅକ୍ଟୋବର ମାସରେ ୩ଟି ବଡ଼ ପର୍ବ ରହିଛି । ତାକୁ ଦୃଷ୍ଟିରେ ରଖି ୩ଟି ପର୍ଯ୍ୟାୟରେ ବିଧାନସଭା ନିର୍ବାଚନ ହୋଇପାରେ । ନଭେମ୍ବର ମାସର ପ୍ରଥମ ସପ୍ତାହରେ ଫଳାଫଳ ସାମ୍ନାକୁ ଆସିପାରେ ବୋଲି ଚର୍ଚ୍ଚା ଚାଲିଛି ।
ଏନ୍ଡିଏ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ୱରେ ବିଧାନସଭା ନିର୍ବାଚନ ଲଢ଼ିବାର ସଙ୍କେତ ଦେଇଛି । ବେରୋଜଗାରୀ, ଆଇନଶୃଙ୍ଖଳା, ବିକାଶ ପ୍ରସଙ୍ଗରେ ବିରୋଧୀ ଦଳ ଏନ୍ଡିଏକୁ ଘେରିପାରନ୍ତି । ସେପଟେ ମହାମେଣ୍ଟରେ ମୁଖ୍ୟମନ୍ତ୍ରୀ ଚେହେରାକୁ ନେଇ କୌଣସି ସହମତି ହୋଇପାରିନାହିଁ । ଆର୍ଜେଡିର ତେଜସ୍ୱୀ ଯାଦବ ମହାମେଣ୍ଟର ନେତୃତ୍ୱ ନେଇପାରନ୍ତି ବୋଲି ଚର୍ଚ୍ଚା ଚାଲିଛି । କିନ୍ତୁ କଂଗ୍ରେସ ଅନେକ ଥର ଏହାକୁ ଖଣ୍ଡନ କରିଛି । ପ୍ରଶାନ୍ତ କିଶୋରଙ୍କ ପାର୍ଟି ମଧ୍ୟ ଏଥରକ ନିର୍ବାଚନ ମଇଦାନରେ ରହିଛି । ତେଣୁ ନୂଆ ସମୀକରଣ ବି ସୃଷ୍ଟି ହୋଇପାରେ । ଏହା ପୂର୍ବରୁ ୨୦୨୦ର ବିହାର ବିଧାନସଭା ନିର୍ବାଚନ ୩ଟି ପର୍ଯ୍ୟାୟରେ ହୋଇଥିଲା । ନଭେମ୍ବର ୧୦ ତାରିଖରେ ଫଳାଫଳ ସାମ୍ନାକୁ ଆସିଥିବାବେଳେ ସେଥିରେ ଏନ୍ଡିଏ ସର୍ବାଧିକ ୧୨୫ଟି ଆସନ ଜିତିଥିଲା । ତା’ ପୂର୍ବରୁ ୨୦୧୫ରେ ସେଠାରେ ୫ଟି ପର୍ଯ୍ୟାୟରେ ବିଧାନସଭା ନିର୍ବାଚନ ହୋଇଥିଲା ।
