ଗିନିଜ ବୁକ ଅଫ୍ ରେକର୍ଡରେ ବିର୍ସା ମୁଣ୍ଡା ଷ୍ଟାଡିୟମ୍, ରାଜ୍ୟବାସୀଙ୍କୁ ଅଭିନନ୍ଦନ ଜଣାଇଲେ ମୁଖ୍ୟମନ୍ତ୍ରୀ
ଭୁବନେଶ୍ୱର,୨୯/୦୧: ମାତ୍ର ୧୫ ମାସ ମଧ୍ୟରେ ରାଉରକେଲାରେ ଗଢ଼ି ଉଠିଥିଲା ୨୧,୮୦୦ ଦର୍ଶକ ଧାରଣ କ୍ଷମତା ରଖିଥିବା ବିର୍ସା ମୁଣ୍ଡା ହକି ଷ୍ଟାଡିୟମ । ହକି ବିଶ୍ୱକପ୍ ଶେଷ ହେବାକୁ ଆଉ ଗୋଟିଏ ଦିନ ବାକି ରହିଛି । ରାଜ୍ୟବାସୀଙ୍କ ପାଇଁ ଆସିଛି ଖୁସି ଖବର । ବିଶ୍ୱର ସର୍ବାଧିକ ଦର୍ଶକ ଧାରଣ କ୍ଷମତା ରଖିଥିବା ଷ୍ଟାଡିୟମ ଭାବେ ବିର୍ସା ମୁଣ୍ଡା ହକି ଷ୍ଟାଡିୟମ ‘ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡ’ରେ ସ୍ଥାନ ପାଇଛି । ୫-ଟି ସଚିବ ଭି.କେ ପାଣ୍ଡିଆନ ଏ ଖବର ପ୍ରଥମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଜଣାଇଥିଲେ । ମୁଖ୍ୟମନ୍ତ୍ରୀ ଏହା ଶୁଣି ବହୁତ ଖୁସି ପ୍ରକାଶ କରିଥିଲେ । ସେ କହିଥିଲେ, ଓଡ଼ିଶାବାସୀ ଏବଂ ଦଳଗତ କାର୍ଯ୍ୟ ଯୋଗୁ ବିର୍ସା ମୁଣ୍ଡା ଷ୍ଟାଡିୟମର ନିର୍ମାଣ ସମ୍ଭବ ହୋଇପାରିଛି । ତେଣୁ ସମସ୍ତଙ୍କୁ ମୁଁ ଏହି ଅବସରରେ ଅଭିନନ୍ଦନ ଜଣାଉଛି ।’
ବିର୍ସା ମୁଣ୍ଡା ଷ୍ଟାଡିୟମ ‘ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡ’ରେ ସାମିଲ ହେବା ନେଇ ୫-ଟି ସଚିବ ଶ୍ରୀ ପାଣ୍ଡିଆନ ଏବଂ ମୁଖ୍ୟମନ୍ତ୍ରୀ ନବୀନଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଶ୍ରୀ ପାଣ୍ଡିଆନ ପ୍ରଥମେ ମୁଖ୍ୟମନ୍ତ୍ରୀଙ୍କୁ ଏ ଖବର ଜଣାଉଛନ୍ତି । ସେ କହୁଛନ୍ତି, ‘ସାର୍! ଓଡ଼ିଶା ପାଇଁ ଏକ ଖୁସିର ଖବର । ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡ ପକ୍ଷରୁ ଆମକୁ ସୂଚନା ଆସିଛି ଯେ ବିର୍ସା ମୁଣ୍ଡା ଷ୍ଟାଡିୟମ ବିଶ୍ୱରେ ସର୍ବାଧିକ ଦର୍ଶକ ଧାରଣ କ୍ଷମତା ରଖୁଥିବା ହକି ଷ୍ଟାଡିୟମ । ଯାହା ଅଫିସିଆଲ ଭାବେ ଘୋଷଣା ହୋଇଛି ।’ ମୁଖ୍ୟମନ୍ତ୍ରୀ ଏହା ଶୁଣି ଖୁସି ପ୍ରକାଶ କରୁଛନ୍ତି । ସେ କହୁଛନ୍ତି, ‘ଏହା ଅତି ଖୁସିର ବିଷୟ । ବିର୍ସା ମୁଣ୍ଡା ଷ୍ଟାଡିୟମକୁ ବିଶ୍ୱର ସର୍ବାଧିକ ଦର୍ଶକ ଧାରଣ କ୍ଷମତା ରଖୁଥିବା ହକି ଷ୍ଟାଡିୟମ ଭାବେ ‘ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡ’ରେ ସ୍ୱୀକୃତି ମିଳିଛି ।’
ପୁଣି ଶ୍ରୀ ପାଣ୍ଡିଆନ କହୁଛନ୍ତି, ‘ସାର ! ମାତ୍ର ୧୫ ମାସ ମଧ୍ୟରେ ଏହି ଷ୍ଟାଡିୟମର ନିର୍ମାଣ କାର୍ଯ୍ୟ ସଂପୂର୍ଣ୍ଣ ହୋଇଥିଲା । ଆମ ସମସ୍ତଙ୍କ ପାଇଁ ଏହା ଗୌରବର ମୁହୂର୍ତ୍ତ ।’ ମୁଖ୍ୟମନ୍ତ୍ରୀ କହୁଛନ୍ତି, ମାତ୍ର ୧୫ ମାସ ମଧ୍ୟରେ ଷ୍ଟାଡିୟମ କାର୍ଯ୍ୟ ଶେଷ ହେବା ପ୍ରକୃତରେ ଓଡ଼ିଶାବାସୀଙ୍କ ପାଇଁ ବହୁ ବଡ଼ ସଫଳତା ଥିଲା । ଧନ୍ୟବାଦ ।’ ମୁଖ୍ୟମନ୍ତ୍ରୀ ଓ ଶ୍ରୀ ପାଣ୍ଡିଆନ ଜୟ ଜଗନ୍ନାଥ କହି ଭିଡିଓଟିକୁ ଶେଷ କରୁଛନ୍ତି । ରାଜ୍ୟସଭା ସାଂସଦ ମାନସ ମଙ୍ଗରାଜ ଏ ବିଷୟରେ ଟ୍ୱିଟ୍ କରି କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଢ଼ ଏବଂ ଦୂରଦୃଷ୍ଟିତା ସମ୍ପନ୍ନ ନେତୃତ୍ୱରେ ଏହା ସମ୍ଭବ ହୋଇପାରିଛି ।
