ନୂଆଦିଲ୍ଲୀ, ୨୯/୦୮: ଭାରତରେ ଦ୍ରୁତ ଗତିରେ କମୁଛି ଜନ୍ମହାର। କମୁଛି ସ୍କୁଲରେ ପିଲାଙ୍କ ନାମ ଲେଖାଇବା ସଂଖ୍ୟା। ପୂର୍ବ ବର୍ଷ ଅପେକ୍ଷା ୨୦୨୪-୨୫ରେ କମିଛନ୍ତି ୧୧ ଲକ୍ଷ ପିଲା । ଜିଲ୍ଲା ସ୍ତରୀୟ ତଥ୍ୟକୁ ଆଧାର କରି ଶିକ୍ଷା ମନ୍ତ୍ରାଳୟ ଏହି ସୂଚନା ଦେଇଛି । ଖାଲି ସେତିକି ନୁହେଁ, ସରକାରୀ ଓ ସହାୟତା ପ୍ରାପ୍ତ ସ୍କୁଲ ଗୁଡ଼ିକରେ ପିଲାଙ୍କ ନାମାଙ୍କନ କମିଛି । ମାତ୍ର ଘରୋଇ ସ୍କୁଲରେ ଆଡମିଶନ ସଂଖ୍ୟା ବଢିଛି । ୨୦୨୪-୨୫ରେ ମୋଟ ୨୪.୬୯ କୋଟି ପିଲା ନାମ ଲେଖାଇଛନ୍ତି । ୨୦୨୨-୨୩ରେ ପ୍ରଥମ ଥର ପାଇଁ ପିଲାଙ୍କ ନାମଲେଖାରେ ହ୍ରାସ ଘଟିଛି ।
ଏହା ପୂର୍ବରୁ ୨୦୨୩-୨୪ରେ ୨୪.୮୦ କୋଟି ଛାତ୍ରଛାତ୍ରୀ ଆଡମିଶନ କରିଥିଲେ । ୨୦୨୨-୨୩ରେ ୨୫.୧୮ କୋଟି ପିଲା ନାମ ଲେଖାଇଥିଲେ। ଦୁଇ ବର୍ଷକୁ ତୁଳନା କଲେ ପ୍ରାୟ ୪୯ ଲକ୍ଷ ପିଲା ଆଡମିଶନ କରି ନାହାନ୍ତି । ଜନ୍ମହାର କମିବା ଯୋଗୁଁ ପିଲାଙ୍କ ନାମ ଲେଖାଇବା ସଂଖ୍ୟା କମିଥିବା ଶିକ୍ଷା ମନ୍ତ୍ରାଳୟ ଅନୁମାନ କରୁଛି । ଜନଗଣନା ପରେ ଏହାର ପ୍ରକୃତ କାରଣ ଜଣାପଡ଼ିବ ବୋଲି ଶିକ୍ଷା ବିଭାଗ କହିଛି ।
ଭାରତରେ ଏବେ ଜନ୍ମହାର କମୁଥିବା ବିଶେଷଜ୍ଞମାନେ ଚେତାବନୀ ଦେଇଛନ୍ତି। ଆସନ୍ତା ଦୁଇ ଦଶନ୍ଧି ଯାଏଁ ଏହାର ପ୍ରଭାବ ପଡ଼ିବ ନାହିଁ । ୨୦୫୦ ବେଳକୁ ବଡ଼ ପରିବର୍ତ୍ତନ ଦେଖିବାକୁ ମିଳିବ । ମହଙ୍ଗା ଶିକ୍ଷା, ଚିକିତ୍ସା, ଓ ଅନ୍ୟ ସମସ୍ୟା କାରଣରୁ ଲୋକମାନେ ପିଲାଜନ୍ମ କରିବା କଥା ଚିନ୍ତା କରୁନାହାଁନ୍ତି । ସେହିପରି ସରକାରୀ ସ୍କୁଲ୍ ଗୁଡ଼ିକରେ ଲଗାତର ୩ ବର୍ଷ ହେବ ନାମଲେଖା ସଂଖ୍ୟା କମୁଛି। ଘରୋଇ ସ୍କୁଲରେ ପିଲାଙ୍କୁ ପଢାଇବାକୁ ଅଭିଭାବକମାନେ ଇଚ୍ଛା ପ୍ରକାଶ କରୁଛନ୍ତି। ସରକାରୀ ସ୍କୁଲରେ ୨୦୨୪-୨୫ରେ ୧୨.୧୬ କୋଟି ପିଲା ନାମ ଲେଖାଇଥିବା ବେଳେ ଘରୋଇ ସ୍କୁଲରେ ୯.୫୯ କୋଟି ପିଲା ଆଡମିଶନ କରିଛନ୍ତି। ସେହିପରି ୨୦୨୨ରେ ଘରୋଇ ସ୍କୁଲରେ ୮.୪୨ କୋଟି ପିଲା ଆଡମିଶନ କରିଥିବା ବେଳେ ସରକାରୀ ସ୍କୁଲରେ ୧୨.୭୫ କୋଟି ପିଲା ନାମ ଲେଖାଇଛନ୍ତି।
