୭ ମହଲା ବିଲଡିଂରେ ଭୟଙ୍କର ବିସ୍ଫୋରଣ: ୧୪ ଜଣଙ୍କ ମୃତ୍ୟୁ, ୧୦୦ରୁ ଉର୍ଦ୍ଧ୍ବ ଗୁରୁତର
ଢାକା ୦୭/ ୦୩: ବାଂଲାଦେଶର ରାଜଧାନୀ ଢାକା ସ୍ଥିତ ଗୁଲିସ୍ତାନର ଏକ ବିଲଡିଂରେ ଭୟଙ୍କର ବିସ୍ଫୋରଣ ହୋଇଛି । ଯେଉଁଥିରେ ୧୪ ଜଣଙ୍କର ମୃତ୍ୟୁ ଘଟିଥିବା ବେଳେ ୧୦୦ରୁ ଉର୍ଦ୍ଧ୍ବ ଲୋକ ଗୁରୁତର ଆହତ ହୋଇଥିବା ସୂଚନା ମିଳିଛି । ଗୁରୁତରଙ୍କ ମଧ୍ୟରୁ କିଛି ବ୍ୟକ୍ତିଙ୍କ ସ୍ବାସ୍ଥ୍ୟାବସ୍ଥା ଅତ୍ୟନ୍ତ ସାଂଘାତିକ ଥିବା କାରଣରୁ ମୃତ୍ୟୁସଂଖ୍ୟା ଆହୁରି ମଧ୍ୟ ବୃଦ୍ଧି ପାଇବା ନେଇ ଆଶଙ୍କା କରାଯାଉଛି ।
ମଙ୍ଗଳବାର ଅପରାହ୍ନ ୪ଟା ବେଳେ ଏହି ବିସ୍ଫୋରଣ ହୋଇଥିଲା । ବିସ୍ଫୋରଣ ପରେ ତୁରନ୍ତ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଆହତ ମାନଙ୍କୁ ଉଦ୍ଧାର କରାଯାଇ ଢାକା ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ବିଲଡିଂର ଭଗ୍ନାବଶେଷ ତଳେ ଆହୁରି କିଛି ଲୋକ ଫସିରହିଥିବା ଅନୁମାନ କରାଯାଉଛି । ୧୧ଟି ଅଗ୍ନିଶମ ବାହିନୀ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ବିଲଡିଂରେ ଏକାଧିକ ଗୋଦାମ ଗୃହ ଥିବା ବେଳେ ବିଭିନ୍ନ କମ୍ପାନୀର ସୋ’ ରୁମ୍ ମଧ୍ୟ ରହିଥିଲା । ବିସ୍ଫୋରଣ ଫଳରେ ବ୍ୟାପକ କ୍ଷୟକ୍ଷତି ମଧ୍ୟ ହୋଇଛି ।
୭ ମହଲା ବିଲଡିଂରେ ବିସ୍ଫୋରଣ ହେବା ଫଳରେ କେଉଁ କାରଣରୁ ବିସ୍ଫୋରଣ ହେଲା ସେ ନେଇ ବର୍ତ୍ତମାନ ସୁଦ୍ଧା ସ୍ପଷ୍ଟ ସୂଚନା ମିଳିନଥିବା ବେଳେ ଉଦ୍ଧାର କାର୍ଯ୍ୟ ଏବେ ବି ଜାରି ରହିଛି । ତଳ ମହଲାରେ ବିସ୍ଫୋରଣ ହୋଇଥିବାରୁ ଏହାର ପ୍ରଭାବ ଉପର ମହଲାଗୁଡିକରେ ମଧ୍ୟ ପଡିଥିଲା । କିଛି ଲୋକ ଭିତରେ ଫଶି ରହିଥିବା ଅନୁମାନ କରାଯାଉଛି । ଉଦ୍ଧାରକାରୀ ଟିମ୍ ରେସ୍କ୍ୟୁ ଅପରେସନ ଜାରି ରଖିଛନ୍ତି ।
