ନୂଆଦିଲ୍ଲୀ,୧୫।୭: ପୃଥିବୀ ଫେରିଲେ ଶୁଭାଂଶୁ ଶୁକ୍ଲା। ମହାକାଶରେ ୧୮ ଦିନ ରହିବା ପରେ ଫେରିଲେ ଶୁଭାଂଶୁଙ୍କ ସହ ୪ ମହାକାଶଚାରୀ।ଅପରାହ୍ନ ୩ଟାରେ ପ୍ରଶାନ୍ତ ମହାସାଗରର କାର୍ଲିଫର୍ଣ୍ଣିଆ ଉପକୂଳରେ ସ୍ପେସ୍ ଡ୍ରାଗନ୍ କଲା ସଫଳ ଅବତରଣ। ପ୍ରାୟ ୨୩ ଘଣ୍ଟାର ଯାତ୍ରା ପରେ ସେମାନଙ୍କ ଡ୍ରାଗନ୍ ସ୍ପେସ୍କ୍ରାଫ୍ଟ ମଙ୍ଗଳବାର ଅପରାହ୍ନ ପ୍ରାୟ ୩ଟାରେ କାଲିଫର୍ଣ୍ଣିଆ ତଟରେ ଜଳାବତରଣ କରିଛି । ଏହି ଅବତରଣ ପ୍ରକ୍ରିୟାକୁ ‘ସ୍ପ୍ଲାସ୍ଡାଉନ୍’ କୁହାଯାଏ ।
ସୋମବାର ଅପରାହ୍ନ ପ୍ରାୟ ୨ଟା ୧୫ରେ ୪ ଜଣ ମହାକାଶଚାରୀ ଡ୍ରାଗନ୍ କ୍ୟାପ୍ସୁଲ୍ରେ ପ୍ରବେଶ କରିଥିଲେ । ଏହାପରେ ସନ୍ଧ୍ୟା ୪ଟା ୪୫ରେ କ୍ୟାପ୍ସୁଲ୍ଟି ଆଇଏସ୍ଏସ୍ର ହାର୍ମନି ମଡ୍ୟୁଲ୍ରୁ ଅନ୍ଡକ୍ ହୋଇଥିଲା । ଆଜି ଅପରାହ୍ନ ପ୍ରାୟ ୩ଟାରେ ଏହା କାଲିଫର୍ଣ୍ଣିଆ ତଟରେ ଜଳାବତରଣ କରିଛି। ମହାକାଶ ଯାନଟି ୨୬୩ କିଲୋଗ୍ରାମ୍ରୁ ଅଧିକ ଓଜନର ସାମଗ୍ରୀ ସହ ପ୍ରତ୍ୟାବର୍ତ୍ତନ କରୁଛି । ଏଥିରେ ନାସାର ହାର୍ଡୱେର ଓ ୬୦ରୁ ଅଧିକ ପ୍ରୟୋଗର ତଥ୍ୟ ସାମିଲ ରହିଛି । ଏହା ମହାକାଶ ଗବେଷଣା ପାଇଁ ଅତ୍ୟନ୍ତ ମହତ୍ତ୍ୱପୂର୍ଣ୍ଣ । ଆକ୍ସିଓମ୍-୪ ମିଶନର ଏହି ଟିମ୍ ଜୁନ୍ ୨୬ ସନ୍ଧ୍ୟା ୪ଟା ୧ରେ ଅନ୍ତର୍ଜାତୀୟ ମହାକାଶ ଷ୍ଟେସନରେ ପହଞ୍ଚିଥିଲା । ଜୁନ୍ ୨୫ ଅପରାହ୍ନ ପ୍ରାୟ ୧୨ଟାରେ ସେମାନେ ଯାତ୍ରା ଆରମ୍ଭ କରିଥିଲେ । ସ୍ପେସ୍ଏକ୍ସର ଫାଲ୍କନ୍-୯ ରକେଟ୍ ସହ ଜଡ଼ିତ ଡ୍ରାଗନ୍ କ୍ୟାପ୍ସୁଲ୍ରେ ସେମାନେ କେନେଡି ମହାକାଶ କେନ୍ଦ୍ରରୁ ଉଡ଼ାଣ ଭରିଥିଲେ । ବୈଷୟିକ ସମସ୍ୟା ଓ ପ୍ରତିକୂଳ ପାଣିପାଗକୁ ନେଇ ମିଶନକୁ ୬ ଥର ରୋକାଯାଇଥିଲା ।
ଅବତରଣ ପରେ ନାସାର ଜନସନ ସ୍ପେସ୍ ସେଣ୍ଟର ଯିବେ ଶୁଭାଂଶୁ । କିଛି ଦିନ ମେଡିକାଲ ସୁପରଭିଜନରେ ରହିବେ । ଶୁଭାଂଶୁ ଓ ମିଶନ -୪ କ୍ରିୟୁ ମହାକାଶରେ ୬୦ଟି ପରୀକ୍ଷା କରିଛନ୍ତି । ଇସ୍ରୋ ପାଇଁ ୭ଟି ପରୀକ୍ଷଣ କରାଯାଇଛି । ଶୁଭାଂଶୁଙ୍କ ସ୍ପେସ୍ ଅଭିଜ୍ଞତା ଭାରତର ନିଜସ୍ବ ସ୍ପେସ୍ ଷ୍ଟେସନ୍ ପାଇଁ ବହୁ ଉପଯୋଗୀ ହେବ ।
