ବେଙ୍ଗାଲୁରୁ: ବାଲେଶ୍ୱରର ସୌମ୍ୟାଶ୍ରୀ ଘଟଣାକୁ ନେଇ ଦେଶ ପଡୁଥିବା ଉଠୁଥିବା ବେଳେ କର୍ଣ୍ଣାଟକର ବେଙ୍ଗାଲୁରୁରୁ ସାମ୍ନାକୁ ଆସିଛି ଆଉ ଏକ ଲଜ୍ଜାକର ଘଟଣା। ଏକ ଘୃଣ୍ୟ ଘଟଣାରେ, ଜଣେ କଲେଜ ଛାତ୍ରୀଙ୍କୁ ଅନେକଥର ଦୁଷ୍କର୍ମ ଓ ବ୍ଲାକମେଲ କରିବା ଅଭିଯୋଗରେ ଦୁଇ ଅଧ୍ୟାପକ ଏବଂ ସେମାନଙ୍କର ଜଣେ ସାଙ୍ଗଙ୍କୁ ଗିରଫ କରାଯାଇଛି। ଏହି ଭୟାନକ ଘଟଣାରେ ସାମିଲଥିବା ଅଭିଯୁକ୍ତମାନେ ହେଉଛନ୍ତି ଛାତ୍ରୀ ଜଣକ ପଢୁଥିବା କଲେଜର ପଦାର୍ଥ ବିଜ୍ଞାନ ଅଧ୍ୟାପକ ନରେନ୍ଦ୍ର, ଜୀବ ବିଜ୍ଞାନ ଅଧ୍ୟାପକ ସନ୍ଦୀପ ଏବଂ ସେମାନଙ୍କର ସାଙ୍ଗ ଅନୁପ। ଏହି ତିନିଜଣ ଦକ୍ଷିଣ କନ୍ନଡ ଜିଲ୍ଲାର ମୁଡ଼ବିଦ୍ରିରେ ଥିବା ଏକ ଘରୋଇ କଲେଜ ସହ ଜଡ଼ିତ ଅଛନ୍ତି।
ପୋଲିସ ଜାରି କରିଥିବା ସୂଚନା ଅନୁଯାୟୀ, ନରେନ୍ଦ୍ର ପ୍ରଥମେ ଛାତ୍ରୀଙ୍କୁ ଅଧ୍ୟୟନ ସାମଗ୍ରୀ ଦେବାର ବାହାନା କରି ତାଙ୍କ ସହ ବନ୍ଧୁତା ଗଢ଼ିଥିଲେ। ଏହାସହ ନିୟମିତ ଚାଟ ମାଧ୍ୟମରେ ଉଭୟେ ସମ୍ପର୍କ ବଜାୟ ରଖିଥିଲେ। ତେବେ ଛାତ୍ରୀଜଣଙ୍କ ବେଙ୍ଗାଲୁରୁକୁ କିଛି କାମରେ ଆସିବା ସମୟରେ ନରେନ୍ଦ୍ର ଅଧିକ ନୋଟ୍ସ ଦେବାର ବାହାନାରେ ତାଙ୍କୁ ମାରଥାହାଲ୍ଲିସ୍ଥିତ ଅନୁପଙ୍କ ଘରକୁ ନେଇ ଦୁଷ୍କର୍ମ କରିଥିଲେ ଏବଂ ଏହି ଘଟଣା ବାହାରେ ପ୍ରକାଶ ନ କରିବାକୁ ଧମକ ଦେଇଥିଲେ। ପରେ ଅନୁପ ତାଙ୍କୁ ସିସିଟିଭି ଫୁଟେଜ ଥିବା ଦାବି କରି ବ୍ଲାକମେଲ କରି ତାଙ୍କ ସହ ଆଉଥରେ ଦୁଷ୍କର୍ମ କରିଥିଲେ। ଏହାପରେ ସନ୍ଦୀପ ମଧ୍ୟ ନରେନ୍ଦ୍ରଙ୍କ ସହ ତାଙ୍କର ଫଟୋ ଓ ଭିଡିଓ ଥିବା ଦାବି କରି ଛାତ୍ରୀ ଜଣଙ୍କୁ ବ୍ଲାକମେଲ କରିବା ସହ ଦୁଷ୍କର୍ମ କରିଥିଲେ।
ଏହିଭଳି ବାରମ୍ୱାର ଘଟିବା ପରେ ଛାତ୍ରୀଜଣଙ୍କ ବାଧ୍ୟ ହୋଇ ତାଙ୍କ ପରିବାରଙ୍କୁ ଏ ବିଷୟରେ ଜଣାଇଥିଲେ। ତାଙ୍କ ପରିବାର ଲୋକ ଏହି ଘଟଣା ଜାଣିବା ପରେ କର୍ଣ୍ଣାଟକ ରାଜ୍ୟ ମହିଳା ଆୟୋଗଙ୍କ ନିକଟରେ ଏନେଇ ଅଭିଯୋଗ କରିଥିଲେ। ଯାହାପରେ ମାରଥାହାଲ୍ଲି ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଥିଲା। ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ତିନି ଅଭିଯୁକ୍ତଙ୍କୁ ଗିରଫ କରି କୋର୍ଟରେ ହାଜର କରିଛି।
କର୍ଣ୍ଣାଟକ ରାଜ୍ୟ ମହିଳା ଆୟୋଗର ଅଧ୍ୟକ୍ଷା ନାଗଲକ୍ଷ୍ମୀ ଚୌଧୁରୀ କହିଛନ୍ତି, “ଅଭିଯୁକ୍ତମାନେ ଜଣକ ପରେ ଜଣେ ଛାତ୍ରୀଙ୍କୁ ବ୍ଲାକମେଲ କରି ଶୋଷଣ କରିଛନ୍ତି। ଏଥି ନିମନ୍ତେ ଅବିଯୁକ୍ତମାନେ ଇନଷ୍ଟାଗ୍ରାମ ଓ ଫେସବୁକ ଆଦିର ସାହାରା ନେଇଥିଲେ।” ଏହିଭଳି ସମାନ ଘଟଣା ସୀମିତ ବ୍ୟବଧାନରେ ବାରମ୍ୱାର ଘଠୁଥିବାରୁ ଶିକ୍ଷାନୁଷ୍ଠାନରେ ଛାତ୍ରୀମାନଙ୍କ ସୁରକ୍ଷା ଓ ଶିକ୍ଷକମାନଙ୍କର ଦାୟିତ୍ୱ ଉପରେ ଗମ୍ଭୀର ପ୍ରଶ୍ନ ଉଠାଇଛି।
ପୋଲିସ ଏହି ମାମଲାରେ ସିସିଟିଭି ଫୁଟେଜ ଓ ଅନ୍ୟାନ୍ୟ ପ୍ରମାଣ ସଂଗ୍ରହ କରି ତଦନ୍ତ ଜାରି ରଖିଛି। ଅଭିଯୁକ୍ତମାନଙ୍କୁ ପୋଲିସ ବର୍ତ୍ତମାନ ବିଚାର ବିଭାଗୀୟ ହାଜତକପ ପଠାଇଦେଇଛି।
