ଭୁବନେଶ୍ୱର,୨୮/୦୨: ବଳୁଆ ହେବ ସଂଗଠନ । ତୃଣମୂଳସ୍ତରରୁ ଦଳକୁ ଅଧିକ ସଂଗଠିତ ଓ ସଶକ୍ତ କରିବାକୁ ତେଜିଛି ସାଂଗଠନିକ ନିର୍ବାଚନ ପ୍ରକ୍ରିୟା । ସପ୍ତାହକ ଭିତରେ ଘୋଷଣା ହେବ ବିଜେଡି ବ୍ଳକ ସଭାପତିଙ୍କ ନାମ । ୧୫ ସୁଦ୍ଧା ଜିଲ୍ଲା ସଭାପତି । ତା’ପଛକୁ ଆସିବ ରାଜ୍ୟ ପରିଷଦ ତାଲିକା । ସମ୍ଭବତଃ ମାର୍ଚ୍ଚ ଶେଷ ସୁଦ୍ଧା ସମସ୍ତ ନିର୍ବାଚନ ପ୍ରକ୍ରିୟା ସରିବ । ଆସନ୍ତା ଏପ୍ରିଲ ପହିଲା ଓଡ଼ିଶା ଦିବସରେ ବିଜେଡିର ନବକଳେବର ସହ ନବୀନଙ୍କ ନୂଆ ଟିମ୍ ଘୋଷଣା ହୋଇପାରେ ।
୨୦୨୪ର ବଡ଼ ବିପର୍ଯ୍ୟୟ ପରେ ଦଳକୁ ଆଉ ଥରେ ନୂଆ ରୂପରେ ଛିଡ଼ା କରିବାକୁ ବିଜେଡି ସଭାପତି ନବୀନ ପଟ୍ଟନାୟକ ପୂରା ଦମ୍ରେ ଲାଗି ପଡ଼ିଛନ୍ତି । ନବୀନଙ୍କ ଆଗରେ ବଡ଼ ଆହ୍ୱାନ- ସାଂଗଠନିକ ଟିମ୍କୁ କିଭଳି ନୂଆ ରୂପରେଖ ଦେବେ? କେଉଁ ନେତାଙ୍କୁ କି ଭୂମିକା ମିଳିବ, ତାହା ଉପରେ ଏବେ ସଭିଙ୍କ ନଜର । ବଡ଼ କଥା ହେଲା, ଏଥର ବିଜେଡିରେ ସାଂଗଠନିକ ସମ୍ପାଦକ ପଦବି ରହିବ କି ନାହିଁ? ସୂତ୍ର ଅନୁସାରେ ଏଭଳି କୌଣସି ପଦବି ଆଉ ରଖିବେନି ନବୀନ । ସଂଗଠନରେ ନବୀନ ହିଁ ୧ ନମ୍ବର ପଦରେ ରହିବେ । ସଂଗଠନରେ କୌଣସି ୨ ନମ୍ବର ପଦ ରହିବନି । ପୂର୍ବତନ ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ନିର୍ବାଚନ ପରଠାରୁ ପ୍ରାୟତଃ ନିରବତା ଅବଲମ୍ବନ କରୁଛନ୍ତି । ଦଳରେ ତାଙ୍କ ପୂର୍ବ ପତିଆରା କଟିଛି । ଏବେ ବବିଙ୍କୁ ସଂଗଠନରେ ନବୀନ କି ଦାୟିତ୍ୱ ଓ ପଦ ଦେବେ, ତାହା ଦଳ ଭିତରେ ଓ ବାହାରେ ଆଲୋଚନର ବିଷୟ।
ଜିତିଥିବା ଓ ହାରିଥିବା ଦଳର ବରିଷ୍ଠ ଏବଂ ଅନୁଭବୀ ନେତାଙ୍କ ଭିତରେ ନବୀନ କାହାକୁ ଓଜନିଆ ପଦପଦବି ଦେବେ, ସେଥିପାଇଁ ସେ ଢେର କସରତ କରୁଛନ୍ତି । ଦଳୀୟ ସଂଗଠନରେ ତାଳମେଳ ରଖିବା ଓ ପଦ ପଦବିରେ ଠିକଣା ନେତାଙ୍କୁ ଦାୟିତ୍ୱ ଦେବା ନବୀନଙ୍କ ପାଇଁ ବଡ଼ ଚାଲେଞ୍ଜ । ଗୋଟିଏ ପଟେ ଦେବୀ ମିଶ୍ର, ପ୍ରସନ୍ନ ଆଚାର୍ଯ୍ୟ, ରଣେନ୍ଦ୍ର ପ୍ରତାପ ସ୍ୱାଇଁ, ବିକ୍ରମ ଆରୁଖ, ଚନ୍ଦ୍ରଶେଖର ସାହୁ, ଅଶୋକ ପଣ୍ଡାଙ୍କ ଭଳି ବରିଷ୍ଠ ନେତାଙ୍କୁ ସଂଗଠନରେ ବଡ଼ ଭୂମିକା ଦେବାର ଆହ୍ୱାନ ନବୀନଙ୍କ ସାମ୍ନାରେ ରହିଛି । ଅନ୍ୟପଟେ ସଞ୍ଜୟ ଦାସବର୍ମା, ଅରୁଣ ସାହୁ, ଅତନୁ ସବ୍ୟସାଚୀ ନାୟକ, ପ୍ରତାପ ଜେନା, ଦେବାଶିଷ ସାମନ୍ତରାୟଙ୍କ ଭଳି ଟାଣୁଆ ନେତାଙ୍କ ଭିତରେ ସମନ୍ୱୟ ରକ୍ଷା କରି ଶୃଙ୍ଖଳିତ ସାଂଗଠନିକ ଟିମ୍ ଗଢ଼ିବା ମଧ୍ୟ ନବୀନଙ୍କ ମୁଣ୍ଡବ୍ୟଥା ବଢ଼ାଇଛି । ନବୀନ ପାଦେ ଆଗକୁ ଗଲେ, ପାଦେ ପଛକୁ ଫେରୁଛନ୍ତି ।
ସୂତ୍ର ଅନୁସାରେ ଏଥର ନବୀନ ଏକ ରାଜନୈତିକ ବ୍ୟାପାର କମିଟି ଗଢ଼ିପାରନ୍ତି । ଏହି କମିଟିରେ ଦଳର ବରିଷ୍ଠ ଓ ସାଂଗଠନିକ ଦକ୍ଷତା ଥିବା ନେତାମାନଙ୍କ ଭିତରେ ଦାୟିତ୍ୱ ବଣ୍ଟାଯିବ । ସଂଗଠନରେ ବଡ଼ ପଦ ହାତେଇବାକୁ ବଡ଼ ନେତାମାନେ ବାରମ୍ବାର ନବୀନ ନିବାସ ଧାଉଁଛନ୍ତି । ନିଜ ଲବିକୁ ଜୋରଦାର କରୁଛନ୍ତି । କିଏ ବିଧାନସଭାର ନିଜ ପ୍ରଦର୍ଶନ କଥା କହୁଛି, ଆଉ କିଏ ନିଜ ପୁରୁଣା ରିପୋର୍ଟ କାର୍ଡକୁ ଦେଖାଉଛି ।
ବିଭିନ୍ନ ନିର୍ବାଚନମଣ୍ଡଳୀ ଓ ଜିଲ୍ଲାସ୍ତରରେ ବି ନବୀନଙ୍କ ପାଇଁ ଅନେକ ଅଡ଼ୁଆ ସ୍ଥିତି ଲାଗି ରହିଛି । ଜିଲ୍ଲା ଓ ନିର୍ବାଚନମଣ୍ଡଳୀ ସ୍ତରରେ ସଂଗଠନର ମଙ୍ଗ ଧରିବାକୁ ବହୁ ନେତା ଆଶାୟୀ ଅଛନ୍ତି । ଦଳୀୟ ନେତାଙ୍କ ମଧ୍ୟରେ ଛକାପଞ୍ଝା, ବାଦବିବାଦ ଏତେ ଯେ ଅସନ୍ତୋଷ ଖୋଲାଖୋଲି ଦାଣ୍ଡରେ ପଡ଼ି ହାଟରେ ଗଡ଼ୁଛି । ଏମିତିରେ ଜିଲ୍ଲା ସଭାପତିଙ୍କ ନାମ ଘୋଷଣା ପରେ ଅସନ୍ତୋଷ ଉଗ୍ର ରୂପ ନେଇପାରେ । ଏ ଭୟ ମଧ୍ୟ ବିଜେଡି ସୁପ୍ରିମୋଙ୍କୁ ଗୋଡ଼ାଉଛି । ବିଭିନ୍ନ ଜିଲ୍ଲାରେ ବହୁ ନେତା ସଂଗଠନରେ ବଡ଼ ପଦ ନେବାକୁ ଗୋଡ଼ ଟେକି ବସିଛନ୍ତି । କଟକ, ଜଗତସିଂହପୁର, ବାଲେଶ୍ୱର, ନବରଙ୍ଗପୁର, ଗଞ୍ଜାମ, ପୁରୀ, ମୟୂରଭଞ୍ଜ, ଭୁବନେଶ୍ୱର ସମେତ ବିଭିନ୍ନ ଜିଲ୍ଲାରେ ଏଭଳି ବିବାଦ ରହିଛି । ତାକୁ ତୁଟାଇବାକୁ ନବୀନ ନିବାସରୁ କିଛି ନେତାଙ୍କୁ ଡକରା ମଧ୍ୟ ଯାଉଛି ।
