ଭୁବନେଶ୍ୱର,୨୯/୦୮: କୋରାପୁଟରୁ  ଯାଜପୁର, କେନ୍ଦୁଝରରୁ କଟକ, ଗଞ୍ଜାମରୁ  ଢେଙ୍କାନାଳ ଯାଏଁ ଭାଙ୍ଗୁଛି ବିଜେଡି ଗଡ଼ । ମାଡ଼ୁଛି  ବିଜେପି । ଗୋଟିଏ ପରେ ଗୋଟିଏ ବ୍ଲକ ଦଖଲ  କରି ଚାଲିଛି ବିଜେପି । ସରକାରକୁ ଆସିବା ପରେ  ପ୍ରାୟ ୧୪ଟି ବ୍ଲକ ବିଜେପି ଦଖଲକୁ ପଳାଇଲାଣି ।  ଦଳର ଦାବି- ଏ ତାଲିକା ଆହୁରି ଲମ୍ବିବ ।  

୨୦୨୭ ପଞ୍ଚାୟତ ନିର୍ବାଚନ ପୂର୍ବରୁ ବଳ  ବଢ଼ାଇ ଚାଲିଛି ବିଜେପି । ରାଜ୍ୟରେ ବିଜେପି  କ୍ଷମତାକୁ ଆସିବା ପରେ ତୃଣମୂଳ ସ୍ତରରେ  ବିଜେଡି ଭାଙ୍ଗିବା ଆରମ୍ଭ କରିଛି । ଅନେକ ବ୍ଲକ  ଅଧ୍ୟକ୍ଷ, ଉପାଧ୍ୟକ୍ଷ, ସମିତିସଭ୍ୟ ଏବଂ ସରପଞ୍ଚ  ଶଙ୍ଖ ଶିବିରରୁ ସିଧା ପଦ୍ମ ଦଳକୁ ଡିଆଁ ମାରୁଛନ୍ତି ।  ଯେଉଁଠି ବ୍ଲକ ଅଧ୍ୟକ୍ଷ ବିଜେପି ଆଡ଼କୁ ଢଳୁ  ନାହାନ୍ତି, ସେଠି ଅନାସ୍ଥା ଚାଲ୍‌ରେ ବିଜେଡିକୁ ମାତ୍‌  ଦେଉଛି ବିଜେଡି ।  

କେଉଁଠି ଅନାସ୍ଥା ତ କେଉଁଠି ମିଶ୍ରଣ  ଗୋଟିରେ ବିଜେପି ବ୍ଲକ ଦଖଲ କରି ଚାଲିଛି ।  ଗଞ୍ଜାମ ଓ କେନ୍ଦୁଝରରେ ବିଜେଡିକୁ ସବୁଠୁ  ବଡ଼ ଝଟକା ଲାଗିଛି । ବିଜେପି ସରକାର ହେବା  ପରେ ଗଞ୍ଜାମର ଖଲ୍ଲିକୋଟ, କବିସୂର୍ଯ୍ୟନଗର,  ପୁରୁଷୋତ୍ତମପୁର ବ୍ଲକ ବିଜେଡି ହାତରୁ  ଖସିଯାଇଛି । ବେଲଗୁଣ୍ଠା ବି ବିଜେପି ନଜରରେ ରହିଛି । 

ବିଜେଡିର ଗଡ଼ ଥିବା ଯାଜପୁର ଦଖଲ ପାଇଁ  ମିଶନରେ ବାହାରିଛି ବିଜେପି । ବଡ଼ଚଣା ବ୍ଲକର  ଅଧ୍ୟକ୍ଷ, ଉପାଧ୍ୟକ୍ଷ ବିଜେଡି ଛାଡ଼ି ବିଜେପିକୁ  ଡେଇଁଛନ୍ତି ସମର୍ଥିତ ସମିତିସଭ୍ୟଙ୍କ ସହ ।  ଏହାସହ ବଡ଼ଚଣା ଏବେ ବିଜେପି ଦଖଲରେ ।  ଧର୍ମଶାଳା ବି ଖୁବଶୀଘ୍ର ବିଜେପି ଦଖଲକୁ  ଆସିଯିବ । ଅନାସ୍ଥା ଭୟରେ ପୂର୍ବତନ ବିଧାୟକ ପ୍ରଣବ ବଳବନ୍ତରାୟଙ୍କ ଭାଇ ପ୍ରଭାତ ବଳବନ୍ତରାୟ  ଧର୍ମଶାଳା ବ୍ଲକ ଅଧ୍ୟକ୍ଷ ପଦରୁ ଇସ୍ତଫା ଦେବା  ପରେ ଏହା ଏକପ୍ରକାର ବିଜେପି ହାତକୁ ଯିବା ଥୟ ହୋଇଯାଇଛି ।  

ଏହା ପୂର୍ବରୁ କେନ୍ଦୁଝର ଜିଲ୍ଲାର ସଦର,  ସାହାରପଡ଼ା, ପାଟଣା ବ୍ଲକକୁ ବିଜେଡି ହାତରୁ  ଛଡ଼ାଇ ନିଜ ଅକ୍ତିଆରକୁ ନେଇଛି ଶାସକ ବିଜେପି  ଦଳ । ମୟୂରଭଞ୍ଜର ଉଦଳା, ନବରଙ୍ଗପୁରର  ତେନ୍ତୁଳିଖୁଣ୍ଟି ଏବଂ କୋରାପୁଟର ଜୟପୁର ବ୍ଲକକୁ  ଦଖଲକୁ ନେଇ ସାରିଲାଣି ବିଜେପି । ଢେଙ୍କାନାଳର  ସଦର ବ୍ଲକ ବିଜେଡି ହାତରୁ ବିଜେପିକୁ  ପଳାଇଛି । କେନ୍ଦ୍ରାପଡ଼ାର ମହାକାଳପଡ଼ା ବ୍ଲକରେ  ଅନାସ୍ଥା ଆଣି ବିଜେପି ବିଜେଡିକୁ କ୍ଷମତାଚ୍ୟୁତ  କରିବାରେ ସଫଳ ହୋଇଛି । ନିକଟରେ  ଜଟଣୀ ବ୍ଲକରୁ ବିଜେଡିକୁ କ୍ଷମତାଚ୍ୟୁତ  କରିବାକୁ ଉଦ୍ୟମ ହୋଇଥିଲା । ସାମୟିକ  ଭାବେ ଏ ବିପଦ ବିଜେଡି ପାଇଁ ଟଳିଯାଇଛି ।  ମାତ୍ର ଆଗକୁ କ’ଣ ହେବ, କହିବା ମୁସ୍କିଲ । 

ଏହାବାଦ୍‌ ବି ବହୁ ବ୍ଲକରେ ବିଜେଡିର  ଅଧ୍ୟକ୍ଷ, ଉପାଧ୍ୟକ୍ଷ ବିଜେପି ସହ ଭିତିରି  ବୁଝାମଣା କରି କ୍ଷମତାରେ ଅଛନ୍ତି । ଯେଉଁଠି  ବିଜେପିର ବିଧାୟକ ଅଛନ୍ତି, ସେଠାରେ ବିଜେଡି  ବ୍ଲକ ଅଧ୍ୟକ୍ଷମାନେ ବିଧାୟକଙ୍କ କଥାରେ କାମ  କରୁଛନ୍ତି । ଆଉ ଯେଉଁଠି ବିଜେଡି ବିଧାୟକ  ଅଛନ୍ତି, ସେଠାରେ ବି କେତେକ ବ୍ଲକ ଅଧ୍ୟକ୍ଷ ଭିତିରି ବୁଝାମଣା କରି ଶାସକ ଦଳ ସହ  ସୁସମ୍ପର୍କ ରକ୍ଷା କରୁଥିବା ଖବର ମିଳୁଛି ।  ତୃଣମୂଳସ୍ତରରେ ଏଭଳି ସ୍ଥିତି ବିଜେଡି ଶିବିର  ପାଇଁ ଆଣିଛି ମୁଣ୍ଡବ୍ୟଥା ।