ଲକ୍ଷ୍ନୌ: ଉତ୍ତର ପ୍ରଦେଶର ୭ଟି ବିଧାନସଭା ଆସନରେ ଉପନିର୍ବାଚନ ହେବାକୁ ଯାଉଛି । କରହଲ୍, କୁଣ୍ଡର୍କି, ଗାଜିଆବାଦ, ଫୁଲପୁର, ମାଝଓ୍ବାନ, କଟେହରି ଏବଂ ଖୈର ଆସନରେ ପ୍ରାର୍ଥୀ ଦେଇଛି ବିଜେପି । କରହଲରୁ ଅନୁଜେଶ ଯାଦବ, କୁନ୍ଦର୍କୀରୁ ରାମବୀର ସିଂ ଠାକୁର, ମାଝଓ୍ବାନରୁ ସୁସ୍ମିତା ମୌର୍ଯ୍ୟ, କଟେହରିରୁ ଧର୍ମରାଚ ନିଷାଦ, ଖୈରରୁ ସୁରେନ୍ଦ୍ର ଦିଲେର, ଫୁଲପୁରରୁ ଦୀପକ ପଟେଲ, ଗାଜିଆବାଦରୁ ସଂଜୀବ ବର୍ମାଙ୍କୁ ଟିକେଟ୍ ଦେଇଛି ଭାରତୀୟ ଜନତା ପାର୍ଟି । କିନ୍ତୁ କାନପୁର ଆସନରେ ବର୍ତ୍ତମାନ ସୁଦ୍ଧା ପ୍ରାର୍ଥୀ ଦେଇନାହିଁ ଦଳ ।
କଟେହରିରୁ ବିଜେପି ପ୍ରାର୍ଥୀ ହୋଇଥିବା ଧର୍ମରାଜ ନିଷାଦ ପୂର୍ବତନ ବିଏସପି ନେତା । ବିଏସପି ଟିକେଟରେ ସେ ୩ ଥର ବିଧାୟକ ହୋଇଥିବା ବେଳେ ଥରେ ମନ୍ତ୍ରୀ ହୋଇଥିଲେ । ୨୦୨୨ ପୂର୍ବରୁ ବିଜେପିରେ ସାମିଲ ହୋଇଥିଲେ ଧର୍ମରାଜ । ସେହିଭଳି ମାଝଓ୍ବାନରୁ ସୁସ୍ମିତା ମୌର୍ଯ୍ୟ ବିଜେପିର ପୂର୍ବତନ ବିଧାୟକଙ୍କ ବିପକ୍ଷରେ ନିର୍ବାଚନ ଲଢ଼ିବେ । ଅଲୀଗଡ଼ର ଖୈର ଆସନରୁ ପ୍ରାର୍ଥୀ ହୋଇଥିବା ସୁରେନ୍ଦ୍ର ଦିଲେର, ବିଜେପିର ପୂର୍ବତନ ସାଂସଦ ରାଜବୀର ଦିଲେରଙ୍କ ପୁଅ । ଫୁଲପୁର ଆସନରୁ ପ୍ରାର୍ଥୀ ହୋଇଥିବା ଦୀପକ ପଟେଲ ବିଜେପିର ପୂର୍ବତନ ସାଂସଦ କେଶରୀ ଦେବୀ ପଟେଲଙ୍କ ପୁଅ ।
୭ ଆସନରେ ପ୍ରାର୍ଥୀ ଘୋଷଣା ପରେ ଦଳର ମୁଖପାତ୍ର ମନୀଷ ଶୁକ୍ଳା କହିଛନ୍ତି, ଏନଡିଏରେ ଏକଜୁଟତା ଅଛି । କୌଣସି ବିବାଦ ନାହିଁ । ଅଖିଳେଶ ଯାଦବ ମହାରାଷ୍ଟ୍ରରେ କଂଗ୍ରେସ ଉପରେ ଚାପ ପକାଉଛନ୍ତି । ଚାପ ପକାଇବାର ରାଜନୀତି ଇଣ୍ଡି ମେଣ୍ଟରେ ହେଉଛି । ବିଜେପି ୭ଟି ଆସନ ଲାଗି ପ୍ରାର୍ଥୀ ଘୋଷଣା କରିଛି ଏବଂ ବାକି ୨ଟିରେ ଖୁବଶୀଘ୍ର ପ୍ରାର୍ଥୀଙ୍କ ନାମ ଘୋଷଣା କରିବ ବିଜେପି ।
