ନୂଆଦିଲ୍ଲୀ: ଝାଡ଼ଖଣ୍ଡ ବିଧାନସଭା ନିର୍ବାଚନ ଲାଗି ଏନଡିଏରେ ଆସନ ବୁଝାମଣା ଶେଷ ହୋଇଛି । ଶୁକ୍ରବାର ରାଞ୍ଚିରେ ରାଜ୍ୟ ବିଜେପି କାର୍ଯ୍ୟାଳୟରେ ବିଜେପି ଏବଂ ଆଜସୁ ମିଳିତ ଭାବେ ସାମ୍ବାଦିକ ସମ୍ମିଳନୀ କରି ଏନେଇ ଘୋଷଣା କରିଛନ୍ତି । ଝାଡ଼ଖଣ୍ଡରେ ବିଜେପି (୬୮), ଆଜସୁ (୧୦), ଜେଡିୟୁ (୨) ଏବଂ ଏଲଜେପି(ରାମବିଳାସ) ଗୋଟିଏ ଆସନରେ ନିର୍ବାଚନ ଲଢ଼ିବା ନେଇ ସ୍ଥିର ହୋଇଛି । ଆଗାମୀ ବିଧାନସଭା ନିର୍ବାଚନ ପାଇଁ ବିଜେପି ନିଜର ସହଯୋଗୀ ଦଳଗୁଡ଼ିକ ସହ ଆସନ ବୁଝାମଣା କରିଛି ।
ଆଜି ଆୟୋଜିତ ସାମ୍ବାଦିକ ସମ୍ମିଳନୀରେ ବିଜେପିର ନିର୍ବାଚନ ପ୍ରଭାରୀ ଶିବରାଜ ସିଂ ଚୌହାନ ଏବଂ ସହପ୍ରଭାରୀ ହିମନ୍ତ ବିଶ୍ବ ଶର୍ମା ଉପସ୍ଥିତ ଥିଲେ । ଗଣମାଧ୍ୟମକୁ ପ୍ରତିକ୍ରିୟା ଦେଇ ଶିବରାଜ ସିଂ ଚୌହାନ କହିଛନ୍ତି, ରାଜ୍ୟରେ ବିଜେପି, ଆଜସୁ, ଜେଡିୟୁ ଏବଂ ଏଲଜେପି ସହ ମିଶି ନିର୍ବାଚନ ଲଢ଼ିବ । ନିର୍ବାଚନୀ ପ୍ରଚାର ମଧ୍ୟ ମିଳିମିଶି କରିବୁ । ଏହି ସମୟରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବ ଶର୍ମା, ଝାଡ଼ଖଣ୍ଡ ବିଜେପି ମୁଖ୍ୟ ବାବୁଲାଲ ମାରାଣ୍ଡି, ଆଜସୁ ମୁଖ୍ୟ ସୁଦେଶ ମହତୋ ପ୍ରମୁଖ ଉପସ୍ଥିତ ଥିଲେ ।
ନିର୍ବାଚନ ଆୟୋଗଙ୍କ ଘୋଷଣାଅନୁସାରେ, ଝାଡ଼ଖଣ୍ଡରେ ବିଧାନସଭା ନିର୍ବାଚନ ୨ଟି ପର୍ଯ୍ୟାୟରେ ଅନୁଷ୍ଠିତ ହେବ । ନଭେମ୍ବର ୧୩ରେ ପ୍ରଥମ ଏବଂ ନଭେମ୍ବର ୨୦ରେ ଦ୍ବିତୀୟ ପର୍ଯ୍ୟାୟ ନିର୍ବାଚନ ହେବ। ଏହା ସହ ନଭେମ୍ବର ୨୩ରେ ଭୋଟ ଗଣତି ହେବା ସହ ନିର୍ବାଚନୀ ଫଳାଫଳ ପ୍ରକାଶ ପାଇବ । ସୂଚନାଯୋଗ୍ୟ, ଝାଡ଼ଣ୍ଡରେ ୮୧ଟି ବିଧାନସଭା ଆସନ ରହିଛି । ସେଥିମଧ୍ୟରୁ ୪୪ଟି ଆସନ ଅଣସଂରକ୍ଷିତ ହୋଇଥିବା ବେଳେ ୨୮ଟି ଆସନ ଏସ୍ଟି ଏବଂ ୯ଟି ଆସନ ଏସ୍ସି ପ୍ରାର୍ଥୀଙ୍କ ପାଇଁ ସଂରକ୍ଷିତ । ତେବେ ନିର୍ବାଚନ ଆୟୋଗଙ୍କ ଅନୁସାରେ, ଝାଡ଼ଖଣ୍ଡରେ ୨.୬ କୋଟି ମତଦାତା ଅଛନ୍ତି ।
