ଟ୍ରକ୍ ଓ ବୋଲେରୋ ମୁହାଁମୁହିଁ ଧକ୍କା, ୨ ମୃତ ୩ ଆହାତ
ବାଉଁଶୁଣୀ, ୨୪/୦୫ : ବୌଦ୍ଧ ଜିଲ୍ଲା ଦେଇ ଯାଇଥିବା ୫୭ ନଂ ଜାତୀୟ ରାଜପଥ ବୌଦ୍ଧ ଥାନା କମଳପୁର ନିକଟରେ ଦୁର୍ଘଟଣା। ବୁଧବାର ସକାଳ ୩ ଟାରେ ଏକ ଟ୍ରକ୍ ଓ ବୋଲେରୋ ମୁହାଁମୁହିଁ ଧକ୍କା ହୋଇଛନ୍ତି। ଫଳରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ୩ ଜଣ ଗୁରୁତର ଆହତ ହୋଇଥିବା ଜଣାପଡିଛି ।
ସୂଚନା ଅନୁଯାୟୀ, ବାଉଁଶୁଣୀ ଥାନା ପୋଲିସ ଏକ ବୋଲେରୋ OD 03 E 5163 ଭଡ଼ା ନେଇ କଟକକୁ ଏକ ୱ।ରେଣ୍ଟିର ସନ୍ଧାନରେ ଯାଇ ଫେରୁଥିବା ବେଳେ ବିପରୀତ ଦିଗରୁ ଆସୁଥିବା ଏକ ମାର୍ବଲ ପଥର ବୋଝେଇ ଟ୍ରକ୍ OD 25 M 0095 ସହ ମୁହାଁମୁହିଁ ଧକ୍କା ହୋଇଛି। ଫଳରେ ବୋଲେରୋ ଡ଼୍ରାଇଭର ବାଉଁଶୁଣୀ ଗଡ ଭିତର ଗ୍ରାମର ପ୍ରଶାନ୍ତ ରଣା ଓ ଗାଡ଼ିରେ ବସିଥିବା ବାଉଁଶୁଣୀ ଥାନାରେ କାର୍ଯ୍ୟରତ ହୋମଗାର୍ଡ ଜଗନ୍ନାଥ ମେହେରଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି । ସେହିପରି ଥାନା ଏଏସଆଇ ନାଗାରାଜ ପ୍ରଧାନ ଓ ସୁଶାନ୍ତ ସାହୁ ଓ ଉଦୟନାଥ ଜାନୀ ଗୁରୁତର ଆହତ ହୋଇଛନ୍ତି। ଉଭୟ ଗୁରୁତର ଓ ମୃତ ଯୁବକଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସରେ ବୌଦ୍ଧ ଜିଲ୍ଲା ଡାକ୍ତରଖାନାକୁ ନିଆଯାଇଥିଲା । ସେଠାରୁ ନାଗାରାଜ ପ୍ରଧାନ ଓ ସୁଶାନ୍ତ ସାହୁଙ୍କ ଅବସ୍ଥା ଅଧିକ ଗୁରୁତର ହେବାରୁ ତାଙ୍କୁ ଭୁବନେଶ୍ବର ପଠାଯାଇଥିଲା ଓ ଉଦୟନାଥ ଜାନୀ ସୁସ୍ଥ ଥିବା ଜଣାପଡିଛି ।
ଘଟଣାସ୍ଥଳରେ ବାଉଁଶୁଣୀ ଥାନା ଅଧିକାରୀ ଅରୁଣ ସିଂଙ୍କ ସମେତ ସମସ୍ତ କର୍ମଚାରୀ, ବାଉଁଶୁଣୀ ଡ଼୍ରାଇଭର ମହାସଂଘର ସମସ୍ତ କର୍ମକର୍ତ୍ତା ପହଞ୍ଚି ସମସ୍ତ ଗୁରୁତର ଓ ମୃତ ଯୁବକଙ୍କୁ ବୌଦ୍ଧ ଡାକ୍ତରଖାନାକୁ ନେଇଥିଲେ । ଉଭୟଙ୍କ ମୃତ୍ୟୁର ଖବର ଶୁଣି ବାଉଁଶୁଣୀ ଅଞ୍ଚଳରେ ଶୋକର ଛାୟା ଖେଳିଯାଇଛି।
