ତିରୁଅନନ୍ତପୁରମ୍: ବ୍ରିଟିଶ ରୟାଲ ନେଭିର ଏକ ଏଫ-୩୫ବି ଲାଇଟନିଂ ଷ୍ଟେଲଥ ଯୁଦ୍ଧ ବିମାନ, ଯାହାର ମୂଲ୍ୟ ପ୍ରାୟ ୧୧୦ ମିଲିୟନ ଡଲାର, ଜୁନ ୧୪ ତାରିଖରେ ତିରୁଅନନ୍ତପୁରମ ଆନ୍ତର୍ଜାତୀୟ ବିମାନବନ୍ଦରରେ ଜରୁରୀ ଅବତରଣ କରିବା ପରେ ଦୁଇ ସପ୍ତାହରୁ ଅଧିକ ସମୟ ଧରି ଅଟକି ରହିଛି। ବ୍ରିଟିଶ ହାଇ କମିଶନ ବୁଧବାର ଦିନ କହିଛନ୍ତି ଯେ ବିମାନଟିରେ ହାଇଡ୍ରୋଲିକ ତ୍ରୁଟି ଯୋଗୁଁ ଏହା ଏଚଏମଏସ ପ୍ରିନ୍ସ ଅଫ ଓ୍ଵେଲ୍ସ ବିମାନବାହୀ ଜାହାଜକୁ ଫେରି ପାରି ନାହିଁ। ଏହି ବିମାନଟିକୁ କେରଳରେ ମରାମତି କରାଯିବ ବୋଲି ନିଷ୍ପତ୍ତି ନିଆଯାଇଛି। ଏଥିପାଇଁ ଯୁକ୍ତରାଷ୍ଟ୍ରରୁ ଏକ ବିଶେଷଜ୍ଞ ଇଞ୍ଜିନିୟର ଟିମ୍ ଏବଂ ଆବଶ୍ୟକୀୟ ଉପକରଣ ସହିତ ଶୀଘ୍ର ଆସି ପହଞ୍ଚିବେ ବୋଲି ସୂଚନା ଦେଇଛନ୍ତି। ତେବେ, ମରାମତି କେବେ ସମ୍ପୂର୍ଣ୍ଣ ହେବ ତାହାର କୌଣସି ନିର୍ଦ୍ଦିଷ୍ଟ ସମୟ ବର୍ତ୍ତମାନ ସୁଦ୍ଧା ଜଣାପଡ଼ି ପାରିନାହିଁ।
ଏହି ଏଫ-୩୫ବି, ଯାହା ଏକ ପଞ୍ଚମ ପିଢ଼ିର ଷ୍ଟେଲଥ ଯୁଦ୍ଧବିମାନ, ସର୍ଟ ଟେକଅଫ ଏବଂ ଭୂଲମ୍ବ ଅବତରଣ (STOVL) କ୍ଷମତା ପାଇଁ ଜଣାଶୁଣା। ଏହା ଏଚଏମଏସ ପ୍ରିନ୍ସ ଅଫ ଓ୍ଵେଲ୍ସରୁ ଭାରତୀୟ ନୌସେନା ସହିତ ଯୌଥ ସାମୁଦ୍ରିକ ଅଭ୍ୟାସ ପରେ ଫେରୁଥିବା ସମୟରେ ଖରାପ ପାଗ ଏବଂ କମ ଇନ୍ଧନ ଯୋଗୁଁ ଜରୁରୀ ଅବତରଣ କରିଥିଲା। ବିମାନଟି ବିମାନବନ୍ଦରର ବେ ନମ୍ବର ୪ରେ ଖୋଲା ଜାଗାରେ ରହିଛି ଏବଂ କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (CISF) ଦ୍ଵାରା ସୁରକ୍ଷିତ ରହିଛି।
ଭାରତୀୟ ବାୟୁସେନା (IAF) ଏହି ବିମାନର ମରାମତି ଏବଂ ଫେରସ୍ତ ପାଇଁ ସମସ୍ତ ଆବଶ୍ୟକୀୟ ସହାୟତା ଯୋଗାଇ ଦେଉଛି। ଏୟାର ଇଣ୍ଡିଆ ଏବଂ ଭାରତୀୟ ଅଧିକାରୀମାନେ ବିମାନଟିକୁ ଏକ ହ୍ୟାଙ୍ଗାରକୁ ସ୍ଥାନାନ୍ତର କରିବା କିମ୍ବା ଅସ୍ଥାୟୀ ଶେଡ଼ ନିର୍ମାଣ କରିବା ପାଇଁ ପ୍ରସ୍ତାବ ଦେଇଥିଲେ, କିନ୍ତୁ ବ୍ରିଟିଶ ଅଧିକାରୀମାନେ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି। ସୂଚନା ଅନୁଯାୟୀ, ଏହି ନିଷ୍ପତ୍ତି ଏଫ-୩୫ବିର ସମ୍ବେଦନଶୀଳ ଷ୍ଟେଲଥ ଏବଂ ସେନସର ପ୍ରଯୁକ୍ତିବିଦ୍ୟାକୁ ଗୋପନୀୟ ରଖିବା ପାଇଁ ନିଆଯାଇଛି।
ବିମାନବନ୍ଦର କର୍ତ୍ତୃପକ୍ଷ ଏହି ବିମାନ ପାଇଁ ପାର୍କିଂ ଶୁଳ୍କ ଲାଗୁ କରିବାକୁ ଯୋଜନା କରୁଛନ୍ତି, ଯାହା ଏକ ବିବାଦୀୟ ପଦକ୍ଷେପ ହୋଇପାରେ ବୋଲି ବିଶେଷଜ୍ଞମାନେ ମତ୍ତ ପ୍ରକାଶ କରିଛନ୍ତି। ଯଦି ମରାମତି ସଫଳ ନ ହୁଏ, ତେବେ ବିମାନଟିକୁ ଏକ ସାମରିକ ଟ୍ରାନ୍ସପୋର୍ଟ ବିମାନ ମାଧ୍ୟମରେ ଫେରାଇ ନିଆଯାଇପାରେ ବୋଲି ଯୋଜନା ରହିଛି।
ଏହି ଘଟଣା ସୋସିଆଲ ମିଡିଆରେ ମଧ୍ୟ ଆଲୋଚନାର ବିଷୟ ହୋଇଛି। ଏକ ମଜାଳିଆ ଘଟଣା କ୍ରମେ, କେହି ଜଣେ ଏହି ବିମାନଟିକୁ ଅନଲାଇନ ମାର୍କେଟପ୍ଲେସ OLXରେ ୪ ମିଲିୟନ ଡଲାରରେ ବିକ୍ରି ପାଇଁ ତାଲିକାଭୁକ୍ତ କରିଥିବା ଏକ ସ୍କ୍ରିନସଟ ଭାଇରାଲ ହୋଇଥିଲା। ଯାହା ପରେ ମିଥ୍ୟା ବୋଲି ପ୍ରମାଣିତ ହୋଇଥିଲା।
ବ୍ରିଟିଶ ହାଇ କମିଶନ ଏବଂ ଭାରତୀୟ ଅଧିକାରୀମାନେ ଏହି ସମସ୍ୟାର ଶୀଘ୍ର ସମାଧାନ ପାଇଁ ମିଳିତ ଭାବେ କାର୍ଯ୍ୟ କରୁଛନ୍ତି। ଏହି ଅସାଧାରଣ ଘଟଣା ଏକ ବିଦେଶୀ ଦେଶରେ ବ୍ରିଟିଶ ଏଫ-୩୫ବିର ପ୍ରଥମ ଥର ପାଇଁ ଅଟକି ରହିବାର ରେକର୍ଡ ସୃଷ୍ଟି କରିଛି।
