ଭୁବନେଶ୍ୱର/ଚନ୍ଦ୍ରଶେଖରପୁର,୧୮/୧୦: ଶୈଳଶ୍ରୀବିହାର ଗ୍ରୀଡ୍ ସବ୍ଷ୍ଟେସନ ପଛରେ ଯୁବକଙ୍କୁ ପଥରରେ ଛେଚି ବୀଭତ୍ସ ହତ୍ୟା ମାମଲାରେ ଚନ୍ଦ୍ରଶେଖରପୁର ଥାନା ପୁଲିସକୁ ସଫଳତା ମିଳିଛି । ପୁଲିସ ମୃତ ଯୁବକଙ୍କ ପରିଚୟ ପାଇଥିବା ବେଳେ ହତ୍ୟାକାରୀକୁ ମଧ୍ୟ ଗିରଫ କରିଛି । ମୃତକ ହେଲେ କେନ୍ଦୁଝର ଜିଲ୍ଲା ବାଂଶପାଳ ଥାନା ଅଧୀନ କଡ଼ଖସଡ଼ାର ଅଜୁ ଓରଫ ଅନାଦି ଦେହୁରୀ । ସେ ଚନ୍ଦ୍ରଶେଖରପୁର ଥାନା ନୀଳାଦ୍ରିବିହାରରେ ଏକ ନିର୍ମାଣାଧୀନ ବିଲି୍ଡଂରେ ରହୁଥିଲେ। ହତ୍ୟାକାରୀ ହେଲେ ଉକ୍ତ ନିର୍ମାଣାଧୀନ ବିଲ୍ଡିଂରେ ଶ୍ରମିକ ଭାବେ କାମ କରୁଥିବା ଗଞ୍ଜାମ ଭଞ୍ଜନଗର ଥାନା ଗୁଜୁରାଲିର ଶଙ୍କର ନାୟକ ଓରଫ ଶଙ୍କର ବେହେରା(୨୦) । ପୁଲିସ ହତ୍ୟାକାଣ୍ଡରେ ବ୍ୟବହୃତ ରକ୍ତଭିଜା ପଥର, ଶଙ୍କରର ରକ୍ତଭିଜା ସାର୍ଟ ଏବଂ ମୃତ ଅଜୁଙ୍କ ଚପଲ ଓ ମୋବାଇଲ ମଧ୍ୟ ହତ୍ୟାକାରୀ ଶଙ୍କରଠାରୁ ଜବତ କରିଛି ।
ପୁଲିସ ସୂଚନା ଅନୁଯାୟୀ, ଗତ ୧୩ ତାରିଖ ସକାଳେ ଶୈଳଶ୍ରୀବିହାର ଗ୍ରୀଡ୍ ସବ୍ଷ୍ଟେସନ ପଛପଟ ନାଳ କଡ଼ରେ ଅଜୁଙ୍କ କ୍ଷତବିକ୍ଷତ ମିଳିଥିଲା । ମୁହଁକୁ ପଥରରେ ଛେଚି ଦିଆ ଯାଇଥିବାରୁ ମୃତକଙ୍କ ପରିଚୟ ମିଳି ନଥିଲା । ସ୍ଥାନୀୟ କର୍ପୋରେଟର ଯଶୋଧାରା ପ୍ରଧାନଙ୍କ ଅଭିଯୋଗ ଆଧାରରେ ପୁଲିସ ଥାନା କେସ୍ ନଂ-୬୩୧/୨୦୨୫ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ।
ଚପଲରୁ ମିଳିଲା ପରିଚୟ
ମୃତକଙ୍କ ପରିଚୟ ମିଳି ନଥିବାରୁ ପୁଲିସ ତଦନ୍ତକୁ ଆଗେଇ ପାରି ନଥିଲା । ଆଖପାଖ ବସ୍ତି ଲୋକଙ୍କୁ ଡାକି ପୁଲିସ ପରିଚୟ ପାଇବା ପାଇଁ ଚେଷ୍ଟା ଚଳାଇଥିଲେ ମଧ୍ୟ ବିଫଳ ହୋଇଥିଲା । ତେଣୁ ପରିଚୟ ଜାଣିବା ପାଇଁ ପୁଲିସ ମୃତକଙ୍କ ପୋଷ୍ଟର ଛପାଇ ବିଭିନ୍ନ ସ୍ଥାନରେ ଲଗାଇବା ସହ ସେଥିରେ ପରିଚୟ ଦେବା ବ୍ୟକ୍ତିଙ୍କୁ ୨୫ ହଜାର ଟଙ୍କାର ପୁରସ୍କାର ରାଶି ଦେବାକୁ ଘୋଷଣା କରିଥିଲା । ସେପଟେ ମୃତଦେହ ନିକଟରୁ ମିଳିଥିବା ଚପଲ ମିଳିଥିଲା । ତେଣୁ ପୁଲିସ ଉକ୍ତ ଚପଲକୁ ଧରି ନିକଟସ୍ଥ ବସ୍ତି ଅଞ୍ଚଳରେ ଲୋକଙ୍କୁ ପଚରାଉଚରା କରିଥିଲା । ଅନୁସନ୍ଧାନ ଚଳାଇ ପୁଲିସ ଶେଷରେ ଉକ୍ତ ଚପଲ ଅଜୁଙ୍କର ବୋଲି ଜାଣିବାକୁ ପାଇଥିଲା । ଅଜୁ ନୀଳାଦ୍ରିବିହାରରେ ଏକ ନିର୍ମାଣାଧୀନ ବିଲ୍ଡିଂରେ ଏୟାରଫିଲ୍ଡ ଥାନା ଅଞ୍ଚଳର ଜଣେ ଠିକାଦାରଙ୍କ ଅଧୀନରେ ରାଜମିସ୍ତ୍ରୀ ଭାବେ କାମ କରୁଥିବା ଜଣାପଡ଼ିଥିଲା ।
ହତ୍ୟାକାରୀ ଚିହ୍ନଟ ହେଲା କିପରି
ଠିକାଦାର ଓ ତାଙ୍କ ଅଧୀନରେ କାମ କରୁଥିବା ଅନ୍ୟ ଶ୍ରମିକମାନଙ୍କୁ ପୁଲିସ ପଚରାଉଚରା ପରେ ଶଙ୍କର ବେହେରାର ଅଜୁ ଘନିଷ୍ଠ ସାଙ୍ଗ ଥିବା ଜାଣିବାକୁ ପାଇଥିଲା । ମୃତଦେହ ମିଳିବା ପୂର୍ବ ରାତିରେ ଶଙ୍କର ଓ ଅଜୁ ଏକାଠି ବୁଲୁଥିବା ଅନ୍ୟ ଶ୍ରମିକମାନେ ପୁଲିସକୁ କହିଥିଲେ । ତେଣୁ ପୁଲିସ ଶଙ୍କରକୁ ଖୋଜାଖୋଜି କରିଥିଲା । ଶଙ୍କର ଫେରାର୍ ଥିବା ବେଳେ ତାର ବଡ଼ଭାଇ ପଞ୍ଚାନନଙ୍କୁ ପୁଲିସ ଉଠାଇ ଆଣି ଜେରା କରିଥିଲା । ଶଙ୍କ ହିଁ ଅଜୁଙ୍କୁ ହତ୍ୟା କରି ଗାଁକୁ ପଳାଇଥିବା ପୁଲିସ ପଞ୍ଚାନନଙ୍କଠାରୁ ଜାଣିବାକୁ ପାଇଥିଲା । ତେଣୁ ଚନ୍ଦ୍ରଶେଖରପୁର ଥାନା ପୁଲିସର ଏକ ଟିମ୍ ଗତକାଲି ଗଞ୍ଜାମ ଭଞ୍ଜନଗରରେ ଚଢ଼ଉ କରି ଶଙ୍କରକୁ ଉଠାଇ ଆଣିଥିଲା । ତାଠାରୁ ରକ୍ତଭିଜା ସାର୍ଟ ଓ ଅଜୁଙ୍କ ମୋବାଇଲ ଜବତ କରିଥିଲା ।
ହତ୍ୟାର କାରଣ
ଶଙ୍କର ପୁଲିସକୁ ଦେଇଥିବା ବୟାନ ଅନୁଯାୟୀ, ଅଜୁ ସବୁବେଳେ ମଦପିଇ ନିଶାସକ୍ତ ଅବସ୍ଥାରେ ତାଙ୍କ ବଡ଼ଭାଇ ପଞ୍ଚାନନଙ୍କୁ ଗାଳିଗୁଲଜ କରୁଥିଲେ । ଫଳରେ ପଞ୍ଚାନନ ଅପମାନ ବୋଧ କରୁଥିଲେ । ତେଣୁ ସବୁଦିନ ପାଇଁ ଅଜୁଙ୍କୁ ରାସ୍ତାରୁ ହଟାଇବାକୁ ଶଙ୍କର ଷଡ଼ଯନ୍ତ୍ର ରଚିଥିଲା । ୧୨ ତାରିଖ ରାତିରେ ଶଙ୍କର ଅଜୁଙ୍କୁ ମଦ ପିଇବାକୁ ଚୁନୁକୋଳି ବସ୍ତିକୁ ଡାକି ନେଇଥିଲା । ସେଠାରେ ଅତ୍ୟଧିକ ମଦ ପିଆଇ ଦେଇଥିଲା । ସେଠାରୁ ସେମାନେ ଚାଲିଚାଲି ଫେରୁଥିବା ବେଳେ ଅତ୍ୟଧିକ ନିଶା ଯୋଗୁ ଅଜୁ ଗ୍ରୀଡ୍ ସବ୍ଷ୍ଟେସନ ପଛ ରାସ୍ତାରେ ପଡ଼ି ଯାଇଥିଲେ । ଏହାର ସୁଯୋଗ ନେଇ ଶଙ୍କର ପାଖରେ ପଡ଼ିଥିବା ଏକ ପଥରକୁ ତାଙ୍କ ମୁଣ୍ଡରେ ଛେଚି ଦେଇଥିଲା । ବାରମ୍ବାର ପଥରରେ ଛେଚିବା ଫଳରେ ଅଜୁଙ୍କର ଘଟଣାସ୍ଥଳରେ ମୃତ୍ୟୁ ହୋଇ ଯାଇଥିଲା । ତା’ପରେ ଶଙ୍କର ଅଜୁଙ୍କ ମୋବାଇଲ ନେଇ ସେଠାରୁ ପଳାଇଥିଲା । ହତ୍ୟାକାଣ୍ଡ ସମ୍ପର୍କରେ ସେ ତାଙ୍କ ବଡ଼ଭାଇ ପଞ୍ଚାନନଙ୍କୁ ଜଣାଇବା ସହ ଗାଁକୁ ପଳାଇ ଯାଇଥିଲା ।
ସେପଟେ ଶଙ୍କରଠାରୁ ପୁଲିସ ଅଜୁଙ୍କ ମୋବାଇଲ ଜବତ କରିବା ପରେ ସେଥିରୁ ତାଙ୍କ ପତ୍ନୀ ଗୀତା ଦିଘଲଙ୍କ ଫୋନ୍ ନମ୍ବର ପାଇଥିଲା । ତାଙ୍କୁ ଯୋଗାଯୋଗ କରି ଅଜୁଙ୍କୁ ହତ୍ୟା କରାଯାଇଥିବା ପୁଲିସ ଜଣାଇଥିଲା । ଆଜି ସକାଳେ ବାପଘରେ କନ୍ଧମାଳରେ ଥିବା ଗୀତା ଚନ୍ଦ୍ରଶେଖରପୁର ଥାନାରେ ପହଞ୍ଚିଥିଲେ । ହତ୍ୟାକାଣ୍ଡ ପୂର୍ବ ରାତିରେ ସେ ସ୍ୱାମୀ ଅଜୁଙ୍କ ସହ ମୋବାଇଲରେ କଥା ହୋଇଥିବା କହିଥିଲେ । ଅଜୁ ଠିକାଦାରଙ୍କଠାରୁ ଦରମା ବାବଦ ସେଦିନ ୩୦ ହଜାର ଟଙ୍କା ପାଇଥିବା ଗୀତାଙ୍କୁ ଜଣାଇଥିଲେ । ଏଥିସହ ଫୋନ୍ ପେ’ ମାଧ୍ୟମରେ ଟଙ୍କା ପଠାଇବା ପାଇଁ କହିଥିଲେ । ରାତିରେ ସେ ଶଙ୍କର ସହ ମାର୍କେଟିଂରେ ଯାଉଥିବା ମଧ୍ୟ କହିଥିଲେ ।
ହେଲେ ଟଙ୍କା ନ ପଠାଇବାରୁ ଗୀତା ରାତିରେ ଅଜୁଙ୍କୁ ଫୋନ୍ କରିବାରୁ ତାଙ୍କ ମୋବାଇଲ ସୁଇଚ୍ ଅଫ୍ ଦେଖାଇଥିଲା । ତା’ ପରଠାରୁ ସେ ବାରମ୍ବାର ଫୋନ୍ କରୁଥିଲେ ମଧ୍ୟ ମୋବାଇଲ ଲାଗି ନଥିଲା । ତେଣୁ ଶଙ୍କର ଅଜୁଙ୍କଠାରୁ ୩୦ ହଜାର ଟଙ୍କା ଆତ୍ମସାତ କରିବା ସହ ତାଙ୍କୁ ହତ୍ୟା କରିଥିବା ଗୀତା ପୁଲିସ ନିକଟରେ ଅଭିଯୋଗ କରିଛନ୍ତି । କ୍ୟାପିଟାଲ ହସ୍ପିଟାଲ ଶବାଗାରରେ ରଖା ଯାଇଥିବା ଅଜୁଙ୍କ ମୃତଦେହକୁ ପୁଲିସ ଆଜି ଗୀତାଙ୍କୁ ହସ୍ତାନ୍ତର କରିଛି । ଶଙ୍କରଙ୍କୁ ଗିରଫ କରି ପୁଲିସ ଅପରାହ୍ଣରେ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି ।
