ସୋର,୦୫/୦୭: ଶ୍ୱଶୁର ଘରକୁ ଯାଇ ଶବ ହୋଇ ଫେରିଲେ ବିଏସଏଫ ଯବାନ ଦିବ୍ୟରଞ୍ଜନ । ଗାଁରେ ଉତ୍ତେଜନା ହେବାରୁ ବିଳମ୍ବିତ ରାତି ପର୍ଯ୍ୟନ୍ତ ହୋଇପାରିଲାନି ଶବ ସତ୍କାର । ଶ୍ୱଶୁର ଘର ଲୋକଙ୍କୁ ଅଟକ ରଖିଲେ ଗାଁଲୋକେ । ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ପଥରପେଣ୍ଟ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ପଥରପେଣ୍ଟ ପଞ୍ଚାୟତ ବଗଲପୁର ଗ୍ରାମର ସ୍ୱର୍ଗତ କରୁଣାକର ସାହୁଙ୍କ ସାନ ପୁତ୍ର ଦିବ୍ୟରଞ୍ଜନ(୩୯ବର୍ଷ) ଦିଲ୍ଲୀରେ ବିଏସଏଫ ଯବାନ ଭାବେ କାର୍ଯ୍ୟ କରି ଆସୁଥିଲେ। ଗତ ଗୁରୁବାର ଦିନ ଚିକିତ୍ସଧିନ ମାଙ୍କୁ ଭୁବନେଶ୍ୱର ଏମ୍ସ ହସ୍ପିଟାଲରେ ଦେଖା କରି ସହଦେବଖୁଣ୍ଟା ଥାନା ରାଣୀପାଟଣା ଅଞ୍ଚଳର ନିଜ ଶ୍ୱଶୁର ଘର ତିଲିକା ବେହେରାଙ୍କ ଘରକୁ ବୁଲିବାକୁ ଯାଇଥିଲେ । ସେଠାରେ ପୂର୍ବରୁ ଦିବ୍ୟରଞ୍ଜନଙ୍କ ପତ୍ନୀ ସଂଯୁକ୍ତା ଓ ୧୨ ବର୍ଷର ଝିଅ ଦିବ୍ୟାଙ୍ଗଶୀ ରହୁଥିଲେ । ଶୁକ୍ରବାର ସକାଳେ ଶ୍ୱଶୁର ଘର ଲୋକେ ଦିବ୍ୟରଞ୍ଜନଙ୍କ ମୃତ୍ୟୁ ହୋଇଥିବା ନେଇ ତାଙ୍କ ପରିବାର ଲୋକଙ୍କୁ ଜଣାଇଥିଲେ ।ଦିବ୍ୟରଞ୍ଜନଙ୍କ ଭାଇ ସୌମ୍ୟରଞ୍ଜନ ଘଟଣାସ୍ଥଳରେ ପହଞ୍ଚି ତାଙ୍କ ଭାଇ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ । ଏହା ଜାଣିବା ପରେ ଦିବ୍ୟରଞ୍ଜନଙ୍କ ଶ୍ୱଶୁର ଘର ଲୋକେ ତାଙ୍କ ଭାଇକୁ ମାରିଦେଇଥିବା ସହଦେବଖୁଣ୍ଟା ଥାନାରେ ଲିଖିତ ଅଭିଯୋଗ କରିଛନ୍ତି । ଶୁକ୍ରବାର ସନ୍ଧ୍ୟା ୬ଟାରେ ଦିବ୍ୟରଞ୍ଜନଙ୍କ ମୃତଦେହ ବଗଲପୁରକୁ ଅଣାଯାଇଥିଲା । ମୃତଦେହ ପହଞ୍ଚିବା ପରେ ବାଗଲପୁରରେ ଉତ୍ତେଜନା ପ୍ରକାଶ ପାଇବା ସହିତ ଦିବ୍ୟରଞ୍ଜନକୁ ତାର ଶ୍ୱଶୁର ଘର ଲୋକେ ମାରି ଦେଇଥିବା ଅଭିଯୋଗ ହୋଇଥିଲା ।
ସେପଟେ ଏହି ଘଟଣା ସମ୍ପର୍କରେ ଦିବ୍ୟରଞ୍ଜନଙ୍କ ସ୍ତ୍ରୀ ସଂଯୁକ୍ତା ତାଙ୍କ ସ୍ୱାମକୁ ହତ୍ୟା ଅସ୍ୱୀକାର କରିବା ସହିତ ବିଷ ପିଇଥିବା ପ୍ରକାଶ କରିଥିଲେ । ଉତ୍ତେଜନା ବିଷୟରେ ଖବର ପାଇ ଖନ୍ତାପଡ଼ା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ଅନ୍ୟପଟେ ଶ୍ୱଶୁର ଘରୁ ଆସିଥିବା ଦିବ୍ୟରଞ୍ଜନଙ୍କ ପତ୍ନୀ ସଂଯୁକ୍ତା, ଶାଳୀ ଭାଉଜ ସୋନିଆ ବେହେରା, ଶାଶୁ କଲ୍ୟାଣି ବେହେରା, ନଣନ୍ଦ ସୁଜାତା ରାଣୀ ସିଂହଙ୍କୁ ଦିବ୍ୟରଞ୍ଜନ ପରିବାର ଓ ଗ୍ରାମବାସୀ ଅଟକ ରଖିଥିଲେ ।
