ବ୍ରାହ୍ମଣୀଗାଁ, ୧୫/୫ : କନ୍ଧମାଳ ଜିଲ୍ଲାର ଶେଷ ସୀମାରେ ରହିଛି ବ୍ରାହ୍ମଣୀଗାଁ। ଏଠି ପଛଘୁଞ୍ଚା ଦେଇଛି ବିକାଶ। ଏଠି ଲୋକଙ୍କ ପାଖରେ ପହଞ୍ଚି ପାରିନି ୫ଜି ନେଟୱର୍କ ସେବା। ଗତ କିଛି ଦିନ ହେବ ଏହି ଅଞ୍ଚଳରେ BSNL ନେଟୱର୍କ ସେବା ବାଧାପ୍ରାପ୍ତ ହେଉଛି। ଏଥିପ୍ରତି କୌଣସି ସରକାରୀ ଅଧିକାରୀଙ୍କ ଦୃଷ୍ଟି ପଡ଼ୁନି। ଏହି ସମସ୍ୟାର ସ୍ଥାୟୀ ସମାଧାନ କରାଯାଉ ନଥିବାରୁ ଅଞ୍ଚଳବାସୀ ଅସନ୍ତୋଷ ପ୍ରକାଶ କରିଛନ୍ତି। 

ବ୍ରାହ୍ମଣୀଗାଁ ବଜାରର ପେଣ୍ଠସ୍ଥଳୀ ଭାବରେ ଜଣାଶୁଣା। ଏଠାରେ ଅଧିକାଂଶ ସମୟରେ ବ୍ୟାଙ୍କରେ ଟଙ୍କା ନେଣଦେଣ, ସ୍କୁଲ, କଲେଜ ଏବଂ ବିଭିନ୍ନ ସରକାରୀ ଅଫିସ କାମ ଅନଲାଇନ୍‌ରେ କରାଯାଏ। ଏଠାରେ ଏକମାତ୍ର ସରକାରୀ ନେଟୱର୍କ ସୁବିଧା ରହିଥିବା ବେଳେ ଅନ୍ୟ କୌଣସି ବିକଳ୍ପ ପନ୍ଥା ନାହିଁ। ତେଣୁ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ଅଭିଯୋଗ କଲେ ସୁଦ୍ଧା କେହି ଶୁଣୁନାହାଁନ୍ତି। ଏଥିପ୍ରତି କୌଣସି ସରକାରୀ ଅଧିକାରୀଙ୍କ ଦୃଷ୍ଟି ପଡ଼ୁନି। ବୋଧେ ସରକାରୀ ଅଧିକାରୀ ଡିଜିଟାଲ୍ ଇଣ୍ଡିଆରେ ବ୍ରାହ୍ମଣୀଗାଁକୁ ଯୋଡ଼ିବାକୁ ଚାହୁଁ ନାହାଁନ୍ତି। ଏପରିକି ସୋସିଆଲ ମିଡିଆ ଏବଂ ଗଣମାଧ୍ୟମରେ ନେଟୱର୍କ ସୁବିଧା ପାଇଁ ସରକାରଙ୍କୁ ଗୁହାରୀ କଲେ ମଧ୍ୟ ଫଳ ଶୂନ। 

ବ୍ରାହ୍ମଣୀଗାଁରେ ଏକ ନୂତନ ୫ଜି ନେଟୱର୍କ୍ ସେବା ସୁବିଧା ପାଇଁ ଜନସାଧାରଣରେ ପ୍ରତିବାଦ ହେଉଛି। ସରକାର ଏହାର ସ୍ଥାୟୀ ସମାଧାନ ନିମନ୍ତେ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।