ନୂଆଦିଲ୍ଲୀ : ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଅବୈଧ କବଜା ବିରୋଧରେ ଏମସିଡି ପୁଣି ଥରେ ଆକ୍ସନ ଆରମ୍ଭ କରି ଦେଇଛି। ଏମସିଡି ସୋମବାର ମଧ୍ୟ ବେଆଇନ କବଜା ବିରୋଧରେ ଅଭିଯାନ ଚଲାଇ ଥିଲା। ଏବେ ମଙ୍ଗଳବାର ଉତ୍ତର ପୂର୍ବ ଦିଲ୍ଲୀର ଖଜୁରୀ ଅଞ୍ଚଳରେ ବେଆଇନ କବଜା ବିରୋଧରେ ଏହାର କାର୍ଯ୍ୟାନୁଷ୍ଠାନ ସାମନାକୁ ଆସିଛି। ମଙ୍ଗଳବାର ଦେଢ କିଲୋମିଟରର ଦୀର୍ଘ ସଡ଼କରେ ନଗର ନିଗମ କବଜାକୁ ହଟେଇ ଦେଇଛି। ନିଗମର ଶାହଦରା ଉତ୍ତରୀ ଜୋନ୍ରେ ଫୁଟପାଥରେ ଦୀର୍ଘ ସମୟରୁ ବେଆଇନ କବଜା ରହି ଥିଲା।
ସ୍ଥାନୀୟ ନିବାସୀମାନେ ଏହି ସମ୍ୱନ୍ଧରେ ନିଗମ ପ୍ରଶାସନକୁ ଅଭିଯୋଗ ମଧ୍ୟ କରି ଥିଲେ। ଏହି କାର୍ଯ୍ୟାନୁଷ୍ଠାନ ବେଳେ ବୁଲଡୋଜରର ବ୍ୟବହାର କରାଯାଇଛି। କାର୍ଯ୍ୟାନୁଷ୍ଠାନରେ ଜେସିବି ମେସିନ ମାଧ୍ୟମରେ ବେଆଇନ କବଜାକୁ ହଟାଇ ଜିନିଷକୁ ଜବତ କରାଯାଇଛି। ଏହି ସମୟରେ ନିଗମର ବିଭାଗ ଗୁଡ଼ିକର ଅଧିକାରୀ, କର୍ମଚାରୀଙ୍କ ସହ ଦିଲ୍ଲୀ ପୁଲିସର ଟିମ୍ ମଧ୍ୟ ଉପସ୍ଥିତ ରହି ଥିଲେ।
ଏହା ପୂର୍ବରୁ ଦିଲ୍ଲୀ ନଗର ନିଗମ ସୋମବାର ଶାହଦରା ଉତ୍ତର ଓ ଦକ୍ଷିଣ ଜୋନରେ ବେଆଇନ କବଜା ବିରୋଧରେ ଅଭିଯାନ ଚଲାଇ ଥିଲେ। ଏମସିଡି ଶାହଦରା ଉତ୍ତର ଓ ଦକ୍ଷିଣ ଜୋନ୍ରେ ରାସ୍ତା ଗୁଡିକରୁ କବଜାକୁ ହଟାଇ ଥିଲେ। ପ୍ରାପ୍ତ ସୂଚନା ମୁତାବିକ, ଏମସିଡି ସୋମବାର ୱାର୍ଡ-୨୧୮ ସୁନ୍ଦରନଗରୀର କବରସ୍ଥାନ ରୋଡ୍ରୁ ପାଖାପାଖି ଅଧ କିଲୋମିଟର ଯାଏ ସଡ଼କରେ କରାଯାଇ ଥିବା ଅସ୍ଥାୟୀ କବଜାକୁ ହଟାଇଛନ୍ତି।
