ସ୍କୁଲ ବସ୍ ଧକ୍କାରେ ସିକ୍ୟୁରିଟି ଗାର୍ଡଙ୍କ ମୃତ୍ୟୁ, ଡ୍ରାଇଭର ଅଟକ
ରାଉରକେଲା ୩୧/୦୩: ରିଂରୋଡର ସ୍ପେସ ଛକ ଠାରେ ଏକ ଘରୋଇ ବସ ଧକ୍କାରେ ଜଣେ ସିକ୍ୟୁରିଟି ଗାର୍ଡଙ୍କ ମୃତ୍ୟୁ ଘଟିଛି। ମୃତକ ହେଲେ ସେକ୍ଟର-୪ ଅଞ୍ଚଳରେ ରହୁଥିବା ବୈକୁଣ୍ଠ ବାରିକ। ଛେଣ୍ଡ ଥାନା ପୁଲିସ ଶବ ଜବତ କରି ଡାକ୍ତରଖାନା ବ୍ୟବଚ୍ଛେଦ ପାଇଁ ପଠାଯାଇଛି। ମୃତ ବୈକୁଣ୍ଠ ବିପିୟୁଟି ପରିସରରେ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରନ୍ତି। ଦୁର୍ଘଟଣାଗ୍ରସ୍ତ ବସକୁ ପୁଲିସ ଜବତ କରିବା ସହ ଚାଳକଙ୍କୁ ଗିରଫ କରି ତଦନ୍ତ ଚଳାଇଛି।
ସୂଚନା ଅନୁସାରେ, ଶୁକ୍ରବାର ସକାଳ ୬ଟା ସମୟରେ ବୈକୁଣ୍ଠ ବାଇକ ଯୋଗେ କାମକୁ ଯାଉଥିଲେ। ସ୍ପେସ ଛକ ଠାରେ ପଛପଟୁ ଏକ ଘରୋଇ ସ୍କୁଲର ବସ ଆସି ତାଙ୍କୁ ଧକ୍କା ଦେଇଥିଲା। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଡାକ୍ତରଖାନା ନିଆଯାଇଥିଲା। ମାତ୍ର ହସ୍ପିଟାଲରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ସୂଚନା ମିଳିଛି।
