ଆଇରନ୍ ମ୍ୟାନ୍ ଚୋବାଇଥିବା ଚୁଇଙ୍ଗମ୍ ହେଉଛି ନିଲାମ, ଅନଲାଇନ୍ରେ ଲାଗିଛି ଏତିକି ଲକ୍ଷ ଟଙ୍କାର ଡାକ
news18
ନୂଆଦିଲ୍ଲୀ ୦୧/୦୪: ଆମେରିକାରେ ଏକ ବିଚିତ୍ର ଘଟଣା ଦେଖାଯାଇଛି। ଏଠାରେ ଆଜିକାଲି ଅନଲାଇନ୍ ଇ-କମର୍ସ ସାଇଟ୍ ଇ-ବେରେ ଏକ ଚୋବା ହୋଇଥିବା ଚୁଇଙ୍ଗମ୍ ବିକ୍ରି ହେଉଛି। ଏକ ସାଧାରଣ ଚୋବାହୋଇଥିବା ଚୁଇଙ୍ଗମ୍ ଅନଲାଇନରେ ବିକ୍ରି ହେଉଛି । ସବୁଠୁ ଆଶ୍ଚର୍ଯ୍ୟର କଥା ହେଉଛି ଏହି ଚୁଇଙ୍ଗମର ଦାମ୍। ଏହା ୧୦-୨୦ ଟଙ୍କା ନୁହେଁ, ୩୨ ଲକ୍ଷ ଟଙ୍କାରେ ବିକ୍ରି ହେଉଛି।
ଆପଣ ଭାବୁଥିବେ, ଚୋବାହୋଇଥିବା ଏହି ଚୁଇଙ୍ଗମରେ କଣ ଏମିତି ଖାସ ରହିଛି ଯେ ଯାହାର ମୂଲ୍ୟ ଏତେ ଅଧିକ। ପ୍ରକୃତରେ, ଯିଏ ଏହାକୁ ଇ-ବେରେ ନିଲାମ କରିବାକୁ ଯୋଜନା କରିଛନ୍ତି, ସେ ଦାବି କରିଛନ୍ତି ଯେ ଏହି ଚୁଇଙ୍ଗମ ହଲିଉଡର ପ୍ରସିଦ୍ଧ ଅଭିନେତା ରବର୍ଟ ଡାଉନି ଜୁନିଅରଙ୍କର। ରବର୍ଟ ଡାଉନି ଜୁନିଅର, ଯାହାଙ୍କୁ ଦୁନିଆ ଆଇରନ୍ ମ୍ୟାନ ଭାବରେ ଜାଣେ। ମାର୍ଭେଲ ଫିଲ୍ମରେ ଆଇରନ୍ ମ୍ୟାନ୍ ଭୂମିକାରେ ଅଭିନୟ କରିବା ପରେ ସେ ଏତେ ପ୍ରସିଦ୍ଧ ହୋଇଛନ୍ତି ଯେ ଲୋକମାନେ ତାଙ୍କ ଚୋବାଯାଇଥିବା ଚୁଇଙ୍ଗମ୍ ପାଇଁ ୩୨ ଲକ୍ଷ ଟଙ୍କା ଦେବାକୁ ପ୍ରସ୍ତୁତ ଅଛନ୍ତି। ଚୁଇଙ୍ଗମର ପ୍ରାରମ୍ଭିକ ମୂଲ୍ୟ ୩୨ ଲକ୍ଷ ଟଙ୍କା ଥିଲା, ତଥାପି, ଏହି ନିଲାମର ଶେଷ ତାରିଖ ମାର୍ଚ୍ଚ ୩୧ ଥିଲା ଏବଂ ଟେଣ୍ଡର ସମୟ ସମାପ୍ତ ହୋଇଛି। ବର୍ତ୍ତମାନ ଏହାର ମୂଲ୍ୟ ୱେବସାଇଟରେ ୪୫ ଲକ୍ଷ ଟଙ୍କା ବୋଲି ଉଲ୍ଲେଖ କରାଯାଇଛି।
ନ୍ୟୁୟର୍କ ପୋଷ୍ଟର ରିପୋର୍ଟ ଅନୁଯାୟୀ, ଗତ ମାସରେ, ରବର୍ଟ ତାଙ୍କ ବନ୍ଧୁ ଜନ୍ ଫାଭ୍ରୋଙ୍କ ହଲିଉଡ୍ ୱାକ୍ ଅଫ୍ ଫେମ ସମାରୋହରେ ଯୋଗ ଦେଇଥିଲେ। ଯେଉଁଠାରେ ସେ ଚୁଇଙ୍ଗମ୍ ଖାଉଥିଲେ ଏବଂ ମଜାକ୍ରେ ସେ ନିଜ ବନ୍ଧୁଙ୍କ ନାମରେ ନାମିତ ଷ୍ଟାର୍ ଉପରେ ଚୁଇଙ୍ଗମ୍ ଲଗାଇଦେଇଥିଲେ।
