ନୂଆଦିଲ୍ଲୀ,୨୩/୦୫; ଚୀନକୁ ଏକ ବଡ଼ ଦୁର୍ଘଟଣାର ଖବର ସାମ୍ନାକୁ ଆସୁଛି । ଚୀନର ଶାଂସି ପ୍ରଦେଶରେ ଏକ କୋଇଲା ଖଣିରେ ଭୟଙ୍କର ବିସ୍ଫୋରଣ ହୋଇଛି । ରିପୋର୍ଟ ଲେଖାଯିବା ସୁଦ୍ଧା ଦୁର୍ଘଟଣାରେ ୯୦ ଜଣଙ୍କର ମୃତ୍ୟୁ ଘଟିଛି । ୯ ଜଣ ଏପର୍ଯ୍ୟନ୍ତ ନିଖୋଜ ଅଛନ୍ତି । ଗତ ଦଶନ୍ଧି ମଧ୍ୟରେ ଚୀନର ସବୁଠାରୁ ଭୟଙ୍କର କୋଇଲା ଖଣି ଦୁର୍ଘଟଣା ବୋଲି କହୁଯାଉଛି । ଦୁର୍ଘଟଣା ସମୟରେ ଖଣିରେ ୨୪୭ ଶ୍ରମିକ କାମ କରୁଥିଲେ । ସରକାରୀ ଖବର ଏଜେନ୍ସି ଜିନହୁଆ ଅନୁଯାୟୀ,ରାଜଧାନୀ ବେଜିଂଠାରୁ ପ୍ରାୟ ୫୨୦ କିଲୋମିଟର ଦୂରରେ ଶାଂସି ପ୍ରଦେଶର କିନୟୁଆନ କାଉଣ୍ଟିରେ ଥିବା ଏକ କୋଇଲା ଖଣିରେ ବିସ୍ଫୋରଣ ଘଟିଛି । ଦୁର୍ଘଟଣା ପୂର୍ବରୁ ଏକ କାର୍ବନ ମନୋକ୍ସାଇଡ୍ ଆଲର୍ଟ ଜାରି କରାଯାଇଥିଲା । ଏହାର କିଛି ସମୟ ପରେ ବିସ୍ଫୋରଣ ଘଟିଥିଲା । ଫସି ରହିଥିବା ଶ୍ରମିକଙ୍କ ଉଦ୍ଧାରକାର୍ଯ୍ୟ ଜାରି ରହିଛି । ରାଷ୍ଟ୍ରପତି ସି ଜିନପିଙ୍ଗ ଘଟଣାସ୍ଥଳରେ ଶୀଘ୍ର ଉଦ୍ଧାର କାର୍ଯ୍ୟ ପାଇଁ ନିର୍ଦ୍ଦେଶ ଦେଇଛନ୍ତି । ଦୁର୍ଘଟଣାର କାରଣ ତଦନ୍ତ ଓ ଦାୟୀ ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି ।
ବିସ୍ଫୋରଣ ପରେ ଅନେକଙ୍କୁ ଉଦ୍ଧାର କରାଯାଇଥିଲା, କିନ୍ତୁ ଅନେକ ଫସି ରହିଛନ୍ତି । ଏପର୍ଯ୍ୟନ୍ତ ୯୦ ଜଣଙ୍କ ମୃତ୍ୟୁ ନିଶ୍ଚିତ ହୋଇଛି। ରିଲିଫ୍ ଏବଂ ଉଦ୍ଧାର ଦଳ ନିଖୋଜ ଶ୍ରମିକଙ୍କୁ ନିରନ୍ତର ଖୋଜି ଖୋଜି ଜାରି ରହିଛି । ଦୁର୍ଘଟଣା ପରେ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଉଦ୍ଧାର ଦଳଗୁଡ଼ିକୁ ନିଖୋଜମାନଙ୍କୁ ଖୋଜିବା ପାଇଁ ଯଥାସମ୍ଭବ ପ୍ରୟାସ କରିବାକୁ ନିର୍ଦ୍ଦେଶ ଦେଇଛନ୍ତି । ସେ କହିଛନ୍ତି ଯେ, ଦୁର୍ଘଟଣା ପାଇଁ ଦାୟୀ ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ । ଶାଂସି ହେଉଛି ସର୍ବବୃହତ କୋଇଲା ଉତ୍ପାଦକ ପ୍ରଦେଶ । ଯଦିଓ ଚୀନ୍ ଖଣି ସୁରକ୍ଷାରେ ଉନ୍ନତି ଆଣିଛି ବୋଲି ଦାବି କରିଛି, ତଥାପି ଦୁର୍ଘଟଣା ବଢି ବଢି ଚାଲିଛି । ଫେବୃଆରୀ ୨୦୨୩ରେ, ଆଭ୍ୟନ୍ତରୀଣ ମଙ୍ଗୋଲିଆର ଏକ କୋଇଲା ଖଣିରେ ଭୂସ୍ଖଳନ ଘଟି ୫୩ ଜଣ ଶ୍ରମିକଙ୍କ ମୃତ୍ୟୁ ହୋଇଥିଲା । ଗତ ମାସରେ, ଶାଂସିର ଲୁଲିଆଙ୍ଗ ଅଞ୍ଚଳରେ ଏକ ଖଣି ଦୁର୍ଘଟଣାରେ ୪ ଜଣ ପ୍ରାଣ ହରାଇଥିଲେ ।
ଏହା ବି ପଢନ୍ତୁ...Ivanka Trump: ରାଷ୍ଟ୍ରପତି ଟ୍ରମ୍ପଙ୍କ ଝିଅ ଇଭାଙ୍କାଙ୍କୁ ହତ୍ୟା ଉଦ୍ୟମ; ସାମ୍ନାକୁ ଆସିଲା ଇରାନ୍ କନେକ୍ସନ୍, ବ୍ଲୁ ପ୍ରିଣ୍ଟ କରିଥିଲା ସନ୍ଦିଗ୍ଧ
ସି ଜିନପିଙ୍ଗ କହିଛନ୍ତି ଯେ, ସମସ୍ତ ସରକାରୀ ବିଭାଗ ଏବଂ ରାଜ୍ୟ ଏହି ଦୁର୍ଘଟଣାରୁ ଶିକ୍ଷା ଗ୍ରହଣ କରିବା ଉଚିତ। ଭବିଷ୍ୟତରେ ଏପରି ବଡ଼ ଦୁର୍ଘଟଣାକୁ ରୋକିବା ପାଇଁ କାର୍ଯ୍ୟସ୍ଥଳ ସୁରକ୍ଷା ନିୟମକୁ ସୁଦୃଢ଼ କରିବାକୁ ସେ ଆହ୍ୱାନ କରିଛନ୍ତି । ଚୀନରେ ବର୍ତ୍ତମାନ ବର୍ଷା ଋତୁ ତେଣୁ ବନ୍ୟା ଏବଂ ଅନ୍ୟାନ୍ୟ ପ୍ରାକୃତିକ ବିପଦକୁ ରୋକିବା ପାଇଁ ପ୍ରସ୍ତୁତିକୁ ମଜବୁତ କରାଯିବା ଉଚିତ୍ । ଚୀନ୍ ପ୍ରଧାନମନ୍ତ୍ରୀ ଲି କେକିଆଙ୍ଗ କହିଛନ୍ତି ଯେ, ନିଖୋଜ ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ସମସ୍ତ ପ୍ରକାରର ପ୍ରୟାସ କରାଯିବା ଉଚିତ୍। ସେ ଦୁର୍ଘଟଣାର କାରଣ ଏବଂ ଦୋଷୀଙ୍କୁ ଦଣ୍ଡ ଦେବା ପାଇଁ ଶୀଘ୍ର ତଦନ୍ତ କରିବାକୁ ଆହ୍ୱାନ କରିଛନ୍ତି ।
