ବେଜିଂ,୧୦।୮: ଚୀନରରାଜନୀତି ଦୁନିଆରେ ବଢିଲା ଚର୍ଚ୍ଚା। ୱାଲ ଷ୍ଟ୍ରିଟ୍ ଜର୍ଣ୍ଣାଲ ରିପୋର୍ଟ ଅନୁଯାୟୀ, ଜୁଲାଇ ଶେଷ ଭାଗରେ ବିଦେଶ ଗସ୍ତରୁ ଫେରିବା ପରେ ବରିଷ୍ଠ କୂଟନୀତିଜ୍ଞ ଲିଉ ଜିଆନଚାଓଙ୍କୁ ବେଜିଂର କର୍ତ୍ତୃପକ୍ଷ ପଚରାଉଚରା ପାଇଁ ଅଟକ ରଖିଥିଲେ। ଏହି କାର୍ଯ୍ୟ ଏପରି ସମୟରେ ହୋଇଛି ଯେତେବେଳେ ସେ ନିକଟ କିଛି ବର୍ଷଗୁଡ଼ିକରେ ଚୀନର ବିଦେଶ ନୀତିର ସବୁଠାରୁ ସକ୍ରିୟ ଚେହେରା ମଧ୍ୟରୁ ଜଣେ ହୋଇଯାଇଥିଲେ।
ଲିଉ ଜିଆନଚାଓଙ୍କୁ ଚୀନର ସମ୍ଭାବ୍ୟ ବୈଦେଶିକ ମନ୍ତ୍ରୀ ଭାବରେ ଦେଖାଯାଏ। ରିପୋର୍ଟ ଅନୁଯାୟୀ, ଜୁଲାଇ ଶେଷ ଭାଗରେ ବିଦେଶ ଗସ୍ତରୁ ବେଜିଂ ଫେରିବା ପରେ ୬୧ ବର୍ଷୀୟ ଲିଉଙ୍କୁ ଅଟକ ରଖାଯାଇଥିଲା। ନ୍ୟୁଜ୍ ଏଜେନ୍ସି ରଏଟର୍ସ ଅନୁଯାୟୀ, ବର୍ତ୍ତମାନ ଏହି ମାମଲାରେ ଚୀନ୍ ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଦିଆଯାଇ ନାହିଁ। ଚୀନ୍ ସରକାରଙ୍କ ରାଜ୍ୟ ପରିଷଦ ସୂଚନା କାର୍ଯ୍ୟାଳୟ ଏବଂ କମ୍ୟୁନିଷ୍ଟ ପାର୍ଟିର ଅନ୍ତର୍ଜାତୀୟ ସମ୍ପର୍କ ବିଭାଗ ତୁରନ୍ତ ପ୍ରତିକ୍ରିୟା ଦେଇନାହିଁ। ଲିଉ ଜିଆନଚାଓ ହେଉଛନ୍ତି ଚୀନ୍ କମ୍ୟୁନିଷ୍ଟ ପାର୍ଟି ବିଭାଗର ମୁଖ୍ୟ। ଯିଏକି ବିଦେଶୀ ରାଜନୈତିକ ଦଳଗୁଡ଼ିକ ସହିତ ସମ୍ପର୍କ ପରିଚାଳନା କରନ୍ତି। ୨୦୨୨ ମସିହାରେ ଏହି ଦାୟିତ୍ୱ ଗ୍ରହଣ କରିବା ପରଠାରୁ, ସେ ୨୦ ରୁ ଅଧିକ ଦେଶ ଗସ୍ତ କରିଛନ୍ତି ଏବଂ୧୬୦ ରୁ ଅଧିକ ଦେଶର ଅଧିକାରୀମାନଙ୍କୁ ଭେଟିଛନ୍ତି।
ଲିଉଙ୍କ ବ୍ୟସ୍ତବହୁଳ ବିଦେଶ ଯାତ୍ରା ଏବଂ ବିଶେଷକରି ୱାଶିଂଟନରେ ପୂର୍ବତନ ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନଙ୍କ ସହ ତାଙ୍କର ସାକ୍ଷାତକାର ଏହି କଳ୍ପନାଜଳ୍ପନାକୁ ତ୍ୱରାନ୍ୱିତ କରିଥିଲା ଯେ ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଥିବା ଲିଉଙ୍କୁ ପରବର୍ତ୍ତୀ ବୈଦେଶିକ ମନ୍ତ୍ରୀ କରିବା ପାଇଁ ପ୍ରସ୍ତୁତି ଚାଲିଛି। ଲିଉଙ୍କୁ ଅଟକ ରଖିବା ଏପର୍ଯ୍ୟନ୍ତର ସର୍ବୋଚ୍ଚ ସ୍ତରୀୟ କୂଟନୈତିକ ତଦନ୍ତ ଭାବରେ ଦେଖାଯାଉଛି। ପୂର୍ବରୁ ୨୦୨୩ ରେ, ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ନିକଟତର କୁହାଯାଉଥିବା କିନ୍ ଗାଙ୍ଗଙ୍କୁ ବୈଦେଶିକ ମନ୍ତ୍ରୀ ପଦରୁ ହଟାଇ ଦିଆଯାଇଥିଲା। ସେହି ସମୟରେ କିନ୍ ଗାଙ୍ଗ ବିଷୟରେ ବିବାହତ୍ତୋର ସମ୍ପର୍କର ଗୁଜବ ବ୍ୟାପିଥିଲା। ଚୀନର ଉତ୍ତର-ପୂର୍ବ ପ୍ରଦେଶ ଜିଲିନରେ ଜନ୍ମଗ୍ରହଣ କରିଥିବା ଲିଉ ଜିଆନଚାଓ ବେଜିଂ ଫରେନ୍ ଷ୍ଟଡିଜ୍ ବିଶ୍ୱବିଦ୍ୟାଳୟରୁ ଇଂରାଜୀରେ ସ୍ନାତକ ଏବଂ ଅକ୍ସଫୋର୍ଡ ବିଶ୍ୱବିଦ୍ୟାଳୟରୁ ଆନ୍ତର୍ଜାତୀୟ ସମ୍ପର୍କରେ ଅଧ୍ୟୟନ କରିଥିଲେ। ଏହା ପରେ, ସେ ବୈଦେଶିକ ବ୍ୟାପାର ମନ୍ତ୍ରଣାଳୟରେ ଅନୁବାଦକ ଭାବରେ ତାଙ୍କର ପ୍ରଥମ ପଦବୀ ଗ୍ରହଣ କରିଥିଲେ। ଲିଉ ବ୍ରିଟେନରେ ଚୀନ୍ ଦୂତାବାସରେ କାର୍ଯ୍ୟ କରିଥିଲେ ଏବଂ ପରେ ଇଣ୍ଡୋନେସିଆ ଏବଂ ଫିଲିପାଇନ୍ସରେ ରାଷ୍ଟ୍ରଦୂତ ଥିଲେ। ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଭାବରେ, ସେ ତାଙ୍କର ସ୍ପଷ୍ଟବାଦୀ ଏବଂ କେତେକ ସମୟରେ ମଜାଦାର ଉତ୍ତର ପାଇଁ ଜଣାଶୁଣା।
