ନୂଆଦିଲ୍ଲୀ: ପାକିସ୍ତାନକୁ ୩.୭ ବିଲୟନ ଡଲାର ଋଣ ଦେବାକୁ ଯାଉଛି ଚୀନ୍‌ । ଦୁଇ ଦେଶ ମଧ୍ୟରେ ଏନେଇ ଏକ ଚୁକ୍ତି ମଧ୍ୟ ଚୂଡ଼ାନ୍ତ ହୋଇଛି । ଏହା ସହ ପୁଣି ଥରେ ପାକିସ୍ତାନକୁ ଋଣ ଜାଲରେ ଛନ୍ଦି ଦେବ ଚୀନ ।  ଚୀନ୍ ଠାରୁ ଏହି ଋଣ ପାଇବା ପରେ ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାର ୧୨.୪ ବିଲିୟନ ଡଲାରକୁ ବୃଦ୍ଧି ପାଇବ । ଗତ ସପ୍ତାହରେ ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାର ୮.୯ ବିଲିୟନ ଡଲାରକୁ ହ୍ରାସ ପାଇଥିଲା । ଫଳରେ ପାକିସ୍ତାନ ଦେବାଳିଆ ହେବାର ଆଶଙ୍କା ବୃଦ୍ଧି ପାଇଥିଲା । ତେବେ ଏହି ଋଣ ପାକିସ୍ତାନକୁ IMF ଦେଇଥିବା ଲକ୍ଷ୍ୟ ପୂରଣ କରିବାରେ ସାହାଯ୍ୟ କରିବ ବୋଲି ଆଶା କରାଯାଉଛି । 

ରିପୋର୍ଟ ଅନୁଯାୟୀ, ମେ ୧୯ରେ ପାକିସ୍ତାନର ଉପ-ପ୍ରଧାନମନ୍ତ୍ରୀ ଏବଂ ବୈଦେଶିକ ମନ୍ତ୍ରୀ ଇସାକ ଦାରବେଜିଂ ଗସ୍ତ କରିଥିଲେ ଏବଂ ଏହି ସମୟରେ ଦୁଇ ଦେଶ ମଧ୍ୟରେ ଋଣ ସମ୍ପର୍କରେ ଏକ ଚୁକ୍ତି ହୋଇଥିଲା । ପାକିସ୍ତାନ ଚୀନ୍ ଠାରୁ ନେଇଥିବା ଋଣର ହାରାହାରି ସୁଧ ହାର ୭.୫ ପ୍ରତିଶତ  ରହିଛି। ପାକିସ୍ତାନ ଋଣ ମାଗିବାର ଏହି ଧାରା ନୂଆ ନୁହେଁ। ପାକିସ୍ତାନର ସମ୍ପୂର୍ଣ୍ଣ ଆର୍ଥିକ ରଣନୀତି ଏବେ ଚୀନ୍ ଚାରିପାଖରେ ଘୂରି ବୁଲୁଛି। ବେଜିଂରୁ ନଗଦ ଋଣ, CPEC (ଚୀନ-ପାକିସ୍ତାନ ଅର୍ଥନୈତିକ କରିଡର) ଅଧୀନରେ ନିର୍ମାଣ ହେଉଥିବା ଅସମ୍ପୂର୍ଣ୍ଣ ପ୍ରକଳ୍ପ ଏବଂ ଚୀନ୍ ବ୍ୟାଙ୍କଗୁଡ଼ିକରୁ ନିରନ୍ତର ନିଆଯାଇଥିବା ଜରୁରୀକାଳୀନ କ୍ରେଡିଟ୍ ଲାଇନ୍ ପାକିସ୍ତାନର ଆର୍ଥିକ ନୀତିକୁ ସମ୍ପୂର୍ଣ୍ଣ ଭାବରେ ଚୀନ୍ ଉପରେ ନିର୍ଭରଶୀଳ କରିଛି ।

ବର୍ତ୍ତମାନ ପାକିସ୍ତାନ ଉପରେ ଚୀନର ମୋଟ ଋଣ ପ୍ରାୟ ୨୬ ବିଲିୟନ ଡଲାର ହେବ । ଏଥିରେ ନଗଦ ଜମା, ବାଣିଜ୍ୟିକ ଋଣ ଏବଂ ରପ୍ତାନି-ଆମଦାନୀ ଆର୍ଥିକ ସହାୟତା ଅନ୍ତର୍ଭୁକ୍ତ । ଜୁନ୍ ୨୦୨୫ରେ ପ୍ରକାଶିତ ରିପୋର୍ଟ ଅନୁସାରେ, ପାକିସ୍ତାନରେ ନଗଦ ନିଅଣ୍ଟ, ଟଙ୍କା ଅସ୍ଥିର ଏବଂ ଖାଦ୍ୟ ଓ ଇନ୍ଧନ ମୂଲ୍ୟ ନିରନ୍ତର ବୃଦ୍ଧି ପାଉଛି । ବୈଦେଶିକ ନିବେଶ ପ୍ରାୟ ବନ୍ଦ ହୋଇଯାଇଛି ଏବଂ ବିଦ୍ୟୁତ୍ ଓ କଞ୍ଚାମାଲ ଅଭାବରୁ ଘରୋଇ ଶିଳ୍ପଗୁଡ଼ିକ ଘାଟାରେ ଚାଲୁଛନ୍ତି । 

ଇସଲାମାବାଦର ନୀତି ନିର୍ଦ୍ଧାରକମାନେ ଅନ୍ତର୍ଜାତୀୟ ଏଜେନ୍ସିଗୁଡ଼ିକର ଚେତାବନୀକୁ ଅଣଦେଖା କରିଛନ୍ତି ଏବଂ କେବଳ 'ଚୀନ ସମର୍ଥନ' ଉପରେ ନିର୍ଭର କରିଛନ୍ତି। କିନ୍ତୁ ସୁଧ ହାର ବୃଦ୍ଧି ପାଉଛି ଏବଂ ପରିଶୋଧ ସମୟସୀମା ନିକଟତର ହେଉଛି। ପାକିସ୍ତାନକୁ ଆଗାମୀ ୧୨ ମାସରେ ପ୍ରାୟ ୨୫-୨୭ ବିଲିୟନ ଡଲାର ଦେବାକୁ ପଡିବ । ଚୀନ୍, ସାଉଦି ଆରବ ଏବଂ ୟୁଏଇକୁ ଅଧିକ ଋଣ ପରିଶୋଧ କରିବ ପାକିସ୍ତାନ ।