ଭୋଗରାଇ,୧୧/୧୧: ଅଶାନ୍ତ ହେଉଛି କଲେଜ ପରିସର । ସୁରକ୍ଷିତ ନୁହନ୍ତି ଛାତ୍ର । ଭୋଗରାଇ ଗ୍ରାମ୍ୟ ଉଚ୍ଚ ଶିକ୍ଷା ପ୍ରତିଷ୍ଠାନର ଯୁକ୍ତ ୩ ଛାତ୍ରକୁ ଅଣଛାତ୍ରଙ୍କ ମରଣାନ୍ତକ ଆକ୍ରମଣ । ଆକ୍ରମଣରେ ମୁଣ୍ଡ ଫାଟି ରକ୍ତାକ୍ତ ଅବସ୍ଥାରେ ଛାତ୍ର ଜଣକ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଆକ୍ରମଣ କରି ଅଣଛାତ୍ର ଫେରାର ହୋଇଛନ୍ତି । ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଗ୍ରାମ୍ୟ ଉଚ୍ଚ ଶିକ୍ଷା ପ୍ରତିଷ୍ଠାନର ଯୁକ୍ତ ୩ ଛାତ୍ର ଜଣକ କଲେଜରେ ଥିବା ବେଳେ ଅଣଛାତ୍ର ତାଙ୍କ ଉପରକୁ ମରଣାନ୍ତକ ଆକ୍ରମଣ କରିଥିଲେ । ଫଳରେ ଛାତ୍ରଙ୍କ ମୁଣ୍ଡ ଫାଟି ଯାଇଥିଲା । ସେ ରକ୍ତାକ୍ତ ହୋଇ ଘଟଣାସ୍ଥଳରେ ତଳେ ପଡ଼ି ଯାଇଥିଲେ । ଏହା ଦେଖି ଅନ୍ୟ ଛାତ୍ରମାନେ କଲେଜ କର୍ତୃପକ୍ଷଙ୍କୁ ଜଣାଇଥିଲେ । ଖବର ପାଇ କଲେଜର କିଛି ଲୋକ ଆସି ଗୁରୁତର ଆବସ୍ଥାରେ ଛାତ୍ରଙ୍କୁ ନିକଟସ୍ଥ ଚିକିତ୍ସାଳୟରେ ଭର୍ତ୍ତି କରାଇଥିଲେ ।
ଅନ୍ୟପଟେ ଆକ୍ରମଣକାରୀ ଅଣଛାତ୍ର ଫେରାର ହୋଇ ଯାଇଥିବା ବେଳେ କଲେଜ ପରିସରରେ ଅଶାନ୍ତିକର ପରିବେଶ ସୃଷ୍ଟି ହୋଇଛି । ତେଣୁ ଘଟଣାସ୍ଥଳରେ କଲେଜ ଅଧ୍ୟକ୍ଷ ଉପସ୍ଥିତ ରହି ବୁଝାସୁଝା କରୁଛନ୍ତି । ତେବେ ଏହି ଆକ୍ରମଣର କାରଣ କ’ଣ ତାହା ବର୍ତ୍ତମାନ ସ୍ପଷ୍ଟ ଜଣାପଡ଼ି ନାହିଁ ।
