ଭୁବନେଶ୍ୱର,୧୬/୦୭: ଆସନ୍ତାକାଲି ଆମେ ଆଠଟି ଦଳ ମିଳିତ ଭାବେ ବନ୍ଦ ଡାକରା ଦେଇଛୁ । ତାହାକୁ ଆପଣମାନେ ସମର୍ଥନ ଦିଅନ୍ତୁ ବୋଲି ପିସିସି ସଭାପତି ଭକ୍ତଚରଣ ଦାସ ଅନୁରୋଧ କରିଛନ୍ତି । ଶାନ୍ତି, ଶୃଙ୍ଖଳା ଭାବେ ବନ୍ଦକୁ ସମର୍ଥନ କରିବାକୁ ନିବେଦନ କରିଛନ୍ତି । ଏହି ବନ୍ଦରୁ ଜରୁରୀକାଳୀନ ସେବାକୁ ବାଦ ଦେବାକୁ ସେ କହିଛନ୍ତି ।
କଂଗ୍ରେସ ଭବନରେ ମିଳିତ ବିରୋଧୀ ଦଳ ସାମ୍ବାଦିକ ସମ୍ମିଳନୀରେ ଭକ୍ତଚରଣ ଦାସ ଏହା କହିଛନ୍ତି। ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି, ଫକୀରମୋହନ ମହାବିଦ୍ୟାଳୟରେ ଛାତ୍ରୀ ସୌମ୍ୟାଶ୍ରୀଙ୍କୁ ନିର୍ଯାତନା ଦେଇ ଆତ୍ମହତ୍ୟା କରିବାକୁ ବାଧ୍ୟ କରିବା ଘଟଣାରେ ଶାନ୍ତିପୂର୍ଣ ବନ୍ଦ ପାଳନ କରାଯିବ। ସମୁଦାୟ ଚକ, ଅଖ ବନ୍ଦ କରାଯିବ। ସବୁ ବସ୍ ଓ ଟ୍ରକ୍ ସଙ୍ଘକୁ ଅନୁରୋଧ କରୁଛୁ ସହଯୋଗ କରନ୍ତୁ । ସ୍କୁଲ, କଲେଜ ବନ୍ଦ ହେବ । ଅଭିଭାବକମାନେ ସହଯୋଗ କରନ୍ତୁ। ବ୍ୟବସାୟୀ ମାନେ ସହଯୋଗ କରନ୍ତୁ। ଔଷଧ ଦୋକାନ ସମେତ ବିଭିନ୍ନ ଅତ୍ୟାବଶ୍ୟକ ସେବାକୁ ବନ୍ଦରୁ ବାଦ ଦିଆଯିବ । ସରକାର ବଳ ପ୍ରୟୋଗ କଲେ ଅସୁବିଧାରେ ପଡିବେ ବୋଲି ଜୟଦେବ ଜେନା କହିଛନ୍ତି।
ଅନ୍ୟମାନଙ୍କ ମଧ୍ୟରେ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କଡ଼ାମ, ପିସିସି ଉପସଭାପତି ତାରାପ୍ରସାଦ ବାହିନୀପତି, ଆରଜେଡିର ହେମନ୍ତ କୁମାର, ସିପିଏମର ସୁରେଶ ଚନ୍ଦ୍ର ପାଣିଗ୍ରାହୀ, ଆଶିଷ କାନୁନଗୋ ପ୍ରମୁଖ ବନ୍ଦକୁ ସମର୍ଥନ କରିବାକୁ ଅନୁରୋଧ କରିଛନ୍ତି। ରାଜ୍ୟରେ ମହିଳା କମିଶନ ଅଧ୍ୟକ୍ଷ ନିଯୁକ୍ତ ନକରିବାରୁ ଖୋଭ ପ୍ରକାଶ କରିଛନ୍ତି।
