ଜାମିନ ମିଳିବା ପରେ ମହାତ୍ମା ଗାନ୍ଧିଙ୍କୁ ମନେ ପକାଇଲେ ରାହୁଲ ଗାନ୍ଧି, ଟ୍ବିଟ୍ କରି ଲେଖିଲେ ଏମିତି
ନୂଆଦିଲ୍ଲୀ ୨୩/ ୦୩: ମୋଦି ସାଙ୍ଗିଆକୁ ନେଇ ବିବାଦୀୟ ବୟାନ ଦେଇ ଦୋଷୀ ସାବ୍ୟସ୍ତ ହେବା ପରେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଜାମିନ ପ୍ରଦାନ କରିଛନ୍ତି କୋର୍ଟ । ଗୁଜରାଟ ସୁରତ ଜିଲ୍ଲା କୋର୍ଟରେ ଏହି ମାମଲା ବିଚାରାଧୀନ ଥିଲା । ୨୦୧୯ ଲୋକସଭା ନିର୍ବାଚନ ବେଳେ ମୋଦି ସାଙ୍ଗିଆକୁ ନେଇ ବିବାଦୀୟ ବୟାନ ଦେଇଥିଲେ ରାହୁଲ ଗାନ୍ଧି । ଏ ନେଇ ବିଜେପି ନେତା ତଥା ବିଧାୟକ ପୂର୍ଣ୍ଣେଶ୍ ମୋଦି ମାମଲା ରୁଜୁ କରିଥିଲେ । ମାମଲାର ଶୁଣାଣି ଗତ ଶୁକ୍ରବାର କରାଯାଇଥିବା ବେଳେ ଗୁରୁବାର ରାୟ ପ୍ରକାଶ ପାଇଛି । ଯେଉଁଥିରେ ରାହୁଲଙ୍କୁ ଦୋଷୀ ସାବ୍ୟସ୍ତ କରାଯିବା ସହିତ ୨ ବର୍ଷର ଜେଲ୍ ଦଣ୍ଡ ଓ ୧୫ ହଜାର ଟଙ୍କାର ଆର୍ଥିକ ଦଣ୍ଡ ଶୁଣାଇଥିଲେ କୋର୍ଟ ।
ଜାମିନ ମିଳିବା ପରେ ପ୍ରତିକ୍ରିୟା ରଖିଛନ୍ତି କଂଗ୍ରେସ ନତା ତଥା ସାଂସଦ ରାହୁଲ ଗାନ୍ଧି । ମହାତ୍ମା ଗାନ୍ଧିଙ୍କ ଏକ ଉକ୍ତିକୁ ମନେ ପକାଇବା ସହିତ ଟ୍ବିଟ୍ କରି ସେ ଲେଖିଛନ୍ତି, ‘ମୋର ଧର୍ମ ସତ୍ୟ ଓ ଅହିଂସା ଉପରେ ଆଧାରିତ । ସତ୍ୟ ହେଉଛି ମୋ ଭଗବାନ । ଅହିଂସା ହେଉଛି ତାହାକୁ ପାଇବାର ସାଧନ-ମହାତ୍ମା ଗାନ୍ଧି’।
मेरा धर्म सत्य और अहिंसा पर आधारित है। सत्य मेरा भगवान है, अहिंसा उसे पाने का साधन।
— Rahul Gandhi (@RahulGandhi) March 23, 2023
– महात्मा गांधी
ସୂଚନା ଥାଉକି, ୨୦୧୯ ଲୋକସଭା ନିର୍ବାଚନ ବେଳେ ମୋଦି ସାଙ୍ଗିଆ (ମୋଦି ସରନେମ୍)କୁ ନେଇ ବିବାଦୀୟ ବୟାନ ଦେଇଥିଲେ ରାହୁଲ । ଏ ନେଇ ତାଙ୍କ ବିରୁଦ୍ଧରେ ଅପରାଧିକ ମାମଲା ରୁଜୁ ହୋଇଥିଲା । କୋର୍ଟ ଏହି ମାମଲାର ଶୁଣାଣି କରି କଂଗ୍ରେସ ନେତାଙ୍କୁ ଦୋଷୀ ସାବ୍ୟସ୍ତ କରିଥିଲେ ।
ଆଇପିସିର ଧାରା ୫୦୪ ଅନୁଯାୟୀ ରାହୁଲ ଗାନ୍ଧିଙ୍କୁ ଦୋଷୀ ସାବ୍ୟସ୍ତ କରିବା ସହିତ ୨ ବର୍ଷର ଜେଲ ଦଣ୍ଡାଦେଶ ଶୁଣାଇଥିଲେ ସୁରତ୍ ଜିଲ୍ଲା କୋର୍ଟ । ୨୦୧୯ ଲୋକସଭା ନିର୍ବାଚନ ବେଳେ ରାହୁଲ ଗାନ୍ଧି କର୍ଣ୍ଣାଟକର କୋଲାରରେ ଏକ ରାଲିକୁ ସମ୍ବୋଧିତ କରି କହିଥିଲେ ଯେ, ‘ସମସ୍ତ ଚୋରଙ୍କ ସାଙ୍ଗିଆ ମୋଦି କାହିଁକି?’ ରାହୁଲଙ୍କ ଏଭଳି ବୟାନ ପରେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲା ଭାରତୀୟ ଜନତା ପାର୍ଟି । ବିଜେପି ବିଧାୟକ ପୂର୍ଣ୍ଣେଶ ମୋଦି ରାହୁଲ ଗାନ୍ଧିଙ୍କ ବିରୁଦ୍ଧରେ ମାମଲା ରୁଜୁ କରିଥିଲେ । ସେବେଠାରୁ ମାମଲା କୋର୍ଟରେ ବିଚାରାଧୀନ ଥିଲା ।
ଗତ ଶୁକ୍ରବାର ଏହି ମାମଲାର ଶୁଣାଣି କରାଯାଇଥିବା ବେଳେ ରାୟ ସଂରକ୍ଷିତ ରଖିଥିଲେ କୋର୍ଟ । ଗୁରୁବାର ଏହାର ରାୟ ପ୍ରକାଶ ପାଇଥିବା ବେଳେ କୋର୍ଟରେ ରାହୁଲ ଗାନ୍ଧି ଉପସ୍ଥିତ ଥିଲେ । ପୂର୍ବରୁ ମଧ୍ୟ ୩ ଥର ସେ କୋର୍ଟରେ ହାଜର ହୋଇଥିଲେ । ଅବଶ୍ୟ ଦୋଷୀ ସାବ୍ୟସ୍ତ ହେବା ପରେ ପରେ କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି । ୧୦ ହଜାର ଟଙ୍କାର ବ୍ୟକ୍ତିଗତ ମୁଚାଲିକା ବଦଳରେ ରାହୁଲଙ୍କୁ ଜାମିନ ପ୍ରଦାନ କରିଛନ୍ତି ନ୍ୟାୟାଳୟ ।
