ନୂଆଦିଲ୍ଲୀ,୦୨/୦୮: ବାଂଲାଦେଶର ନୂଆ ମାନଚିତ୍ରରେ ଓଡ଼ିଶା ସମେତ ପଶ୍ଚିମବଙ୍ଗ, ଆସାମ, ମେଘାଳୟ, ତ୍ରିପୁରା, ବିହାର, ଝାଡ଼ଖଣ୍ଡର କେତେକ ଅଂଶକୁ ଦେଖାଯାଇଛି । ଏହାକୁ ନେଇ ବିବାଦ ଦେଖାଦେଇଥିବାବେଳେ ଏହି ପ୍ରସଙ୍ଗ ସଂସଦରେ ଉଠିଛି । କଂଗ୍ରେସ ନେତା ରଣଦୀପ ସିଂ ସୂର୍ଯେୱାଲା ରାଜ୍ୟସଭାରେ ଏହି ପ୍ରଶ୍ନ ଉଠାଇଛନ୍ତି ।
ସୂର୍ଯେୱାଲା କହିଛନ୍ତି, ସରକାର ଏ ନେଇ କ’ଣ କରୁଛନ୍ତି । ଲିଖିତ ଜବାବରେ ବିଦେଶମନ୍ତ୍ରୀ ଏସ୍. ଜୟଶଙ୍କର କହିଛନ୍ତି, ଏହା ଉପରେ କଡ଼ା ନଜର ରଖାଯାଇଛି । ସରକାର ଏଭଳି ଉଦ୍ଦେଶ୍ୟମୂଳକ ଘଟଣାରେ ମୁକାବିଲା କରିବା ଲାଗି ସମ୍ପୂର୍ଣ୍ଣ ପ୍ରସ୍ତୁତ ।
ବିଦେଶ ମନ୍ତ୍ରଣାଳୟ ଅନୁସାରେ, ଏହି ବିବାଦୀୟ ମାନଚିତ୍ର ଗତ ଏପ୍ରିଲ ୧୪ରେ ଢାକା ୟୁନିଭର୍ସିଟିରେ ଆୟୋଜିତ ଏକ ପ୍ରଦର୍ଶନୀରେ ଲଗାଯାଇଥିଲା । ଢାକାରେ ଥିବା ଇସ୍ଲାମିକ ଗ୍ରୁପ୍ ‘ସଲ୍ତନତ୍ -ଏ-ବାଂଲା’ ତରଫରୁ ଏହି ଗ୍ରେଟର ବାଂଲାଦେଶ ମାନଚିତ୍ର ପ୍ରସ୍ତୁତ କରାଯାଇଥିବା ଅଭିଯୋଗ ରହିଥିଲା ।
