ନୂଆଦିଲ୍ଲୀ,୨୬।୫: ପୁରା ଦେଶରେ ପୁଣିଥରେ କରୋନା ସଂକ୍ରମଣ ମାମଲା ଧିରେ ଧିରେ ବଢିବାରେ ଲାଗିଛି। ସ୍ବାସ୍ଥ୍ୟ ମନ୍ତ୍ରଣାଳୟର ତାଜା ସୂଚନା ଅନୁସାରେ, ଗତ ଏକ ସପ୍ତାହରେ ଭାରତରେ କୋଭିଡ୍-୧୯ର ମୋଟ ୭୫୦ ନୂଆ ମାମଲା ସାମନାକୁ ଆସିଛି। ଯେଉଁଥିରେ ସବୁଠାରୁ ଅଧିକ ସଂକ୍ରମଣ କେରଳରେ ୪୦୦ ଓ ଦିଲ୍ଲୀରେ ୧୦୦ରୁ ଅଧିକ କେସ୍ ରିପୋର୍ଟ କରାଯାଇଛି। ଏହା ସହ ସାରା ଦେଶରେ ୧୦୦୦ରୁ ଅଧିକ ଆକ୍ଟିଭ କେସ୍ ରହିଛି।
ଦେଶର ଅଧିକାଂଶ ସ୍ଥାନରେ କରୋନା କେସ୍ ଜୋରଦାର ବଢିବାରେ ଲାଗିଛି। ସ୍ବାସ୍ଥ୍ୟ ମନ୍ତ୍ରଣାଳୟ ଲୋକଙ୍କ ଭୟଭୀତ ନହୋଇ କେବଳ ସାବଧାନ ରହିବାକୁ ଅପିଲ କରିଛନ୍ତି। ଅଧିକାରୀଙ୍କ କହିବା ଅନୁସାରେ, ବର୍ତ୍ତମାନ ସଂକ୍ରମଣ ହାର କମ୍ ରହିଛି ଓ ହସ୍ପିଟାଲରେ ଭର୍ତ୍ତି ହେବାର ଆବଶ୍ୟକତା ଖୁବ୍ କମ୍। ବୟସ୍କ, ଗର୍ଭବତୀ ମହିଳା ଓ ପୂର୍ବରୁ ଅସୁସ୍ଥ ଥିବା ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି।
କେରଳରେ ଗତ ୨୪ ଘଣ୍ଟାରେ ୩୩୫ ନୂଆ କେସ୍ ସାମାନକୁ ଆସିଛି। ଏହି ସଂଖ୍ୟା ବଢି ୪୩୦ ହୋଇଯାଇଛି। ମହାରାଷ୍ଟ୍ରରେ ୧୫୩ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି। ଏହା ସହ ସେଠାରେ ଏବେ ୨୦୯ ଆକ୍ଟିଭ କେସ୍ ରହିଛି। ସେଭଳି ଦିଲ୍ଲୀରେ ୯୯ ନୂଆ ରୋଗୀଙ୍କ ସହ ମୋଟ ଆକ୍ଟିଭ କେସ୍ ୧୦୪ ହୋଇଯାଇଛି। ଏହାଛଡା ଗୁଜରାଟରେ ୮୩, କର୍ଣ୍ଣାଟକରେ ୪୭, ଉତ୍ତର ପ୍ରଦେଶରେ ୧୫ ଓ ପଶ୍ଚିମବଙ୍ଗରେ ୧୨ ଆକ୍ଟିଭ କେସ୍ ରହିଛି। କେନ୍ଦ୍ର ସ୍ବାସ୍ଥ୍ୟ ସଚିବ ଶନିବାର କୋଭିଡ୍ର ସ୍ଥିତି ସମୀକ୍ଷା କରିଛନ୍ତି। ମନ୍ତ୍ରଣାଳୟ କହିଛି ଅଧିକାଂଶ ମାମଲା ହାଲକା ରହିଛି। ରୋଗୀ ହୋମ୍ ଆଇସୋଲେସନ୍ରେ ଠିକ୍ ହୋଇ ଯାଉଛନ୍ତି। କେରଳ, ତାମିଲନାଡୁ, ମହାରାଷ୍ଟ୍ର ଓ କର୍ଣ୍ଣାଟକରେ ଅଧିକ ରହିଛି ସଂକ୍ରମଣ ମାମଲା।
